குழு A மாநிலங்கள் ஏப்ரல் 17,  குழு B மாநிலங்கள் ஏப்ரல் 18 – முதல் அனைத்து ஆரம்பப் பள்ளி மாணவர்களும் நேருக்கு நேர் கல்வி கற்க பள்ளிக்குச் செல்ல அனுமதிக்கப்படுவதாக கல்வி அமைச்சகம் அறிவித்துள்ளது.

மார்ச் 21 முதல் ஆரம்பப் பள்ளிகளுக்குச் சுழற்சி முறையுடன் நேருக்கு நேர் வகுப்புகள் மற்றும் திங்கள்கிழமை முதல் இடைநிலைப் பள்ளிகளுக்கு சுழற்சி இல்லாமல் நேருக்கு நேர் பள்ளி அமர்வுகளின் செயல்முறையைப் பார்த்து இந்த முடிவு எடுக்கப்பட்டதாக கல்வி அமைச்சர் ராட்ஸி ஜிடின் கூறினார்.

தனது முகநூல் பக்கத்தில் பதிவேற்றம் செய்யப்பட்ட காணொளி ஒன்றில் அவர் இதனைத் தெரிவித்துள்ளார்.

குழு A – ஜொகூர், கெடா, கிளந்தான் மற்றும் திரங்கானுவை உள்ளடக்கியது மற்றும் பிற மாநிலங்கள் குழு Bயின் கீழ் வருகின்றன.

மூன்று, நான்கு மற்றும் ஐந்தாம் ஆண்டு மாணவர்கள் சுழற்சி முறையில் பள்ளிக்குச் செல்ல வேண்டும் என்று முன்னர் அமைச்சகம் நிர்ணயித்தது, குறிப்பாக 600 மாணவர்களைக் கொண்ட பள்ளிகளுக்கு, 600 பேருக்கும் குறைவான மாணவர்களைக் கொண்ட தொடக்கப் பள்ளிகள் மற்றும் தனியார் பள்ளிகளில் மாணவர்கள் சுழற்சி இல்லாமல் வகுப்புகளில் கலந்து கொள்ள வேண்டும்.

கோவிட்-19 உள்ளூர் கட்டத்திற்கு நாடு மாறியிருந்தாலும், மாணவர்கள் மற்றும் ஆசிரியர்கள் நிர்ணயிக்கப்பட்ட நிலையான இயக்க நடைமுறைகளுக்கு (SOP) இணங்குமாறு ராட்ஸி அறிவுறுத்தினார்.

SOP கடைப்பிடிப்பது முன்னுரிமை என்பதை பெற்றோர்கள் தங்கள் குழந்தைகளுக்கு தொடர்ந்து நினைவூட்ட வேண்டும் என்றும் அவர் அறிவித்தார்.