எம்.பி.க்களுக்கான தொகுதி ஒதுக்கீடுகள் இந்த ஆண்டு 65% குறைக்கப்படலாம் என்று பெரிக்காத்தான் நேசனல் (PN) தக்கியுதீன் ஹசன்(Takiyuddin Hassan) கவலை தெரிவித்துள்ளார்.

அரசாங்கம் அதன் நிதியைக் கட்டுப்படுத்த நடவடிக்கை எடுத்து வரும் நிலையில், மக்களின் நலனுக்காக ஒதுக்கப்பட்ட ஒதுக்கீடுகளை அப்படியே விட்டுவிட வேண்டும் என்பதில் உறுதியாக இருப்பதாக அவர் குறிப்பிட்டார்.

“எம்.பி.க்கள் மூலம் வழங்கப்படும் ஒதுக்கீடுகள் மக்களுக்கு நேரடி நன்மைகளை வழங்குகின்றன, (அவர்கள்) இடையூறு செய்யக் கூடாது,” என்று அவர் இன்று ஒரு அறிக்கையில் தெரிவித்துள்ளார்.

கோத்தா பாரு எம்.பி., இந்த ஒதுக்கீடுகள் தங்கள் தொகுதிகளில் உள்ள எம்.பி.க்களின் சேவை மையங்கள்மூலம் அமலாக்க ஒருங்கிணைப்பு பிரிவு (Implementation Coordination Unit) மூலம் அனுப்பப்படுகிறது என்றார்.

15 வது பொதுத் தேர்தலின்போது (GE15) பக்காத்தான் ஹராப்பானின் தேர்தல் அறிக்கையில் சேர்க்கப்பட்ட ஒரு முன்முயற்சி என்பதால், நாடு முழுவதும் உள்ள அனைத்து எம்.பி.க்களுக்கும் ஒதுக்கீடுகள் வழங்கப்படும் என்று உறுதியளிக்குமாறு பிரதமர் அன்வார் இப்ராஹிமை PN வலியுறுத்தியுள்ளது என்றும் அவர் கூறினார்.

“சமமான தொகுதி ஒதுக்கீடு” என்ற தலைப்பிலான தேர்தல் அறிக்கையில் ஒரு புள்ளியைத் தக்கியுடின் மேற்கோள் காட்டினார், அதில் ஹராப்பான் கட்சி பாகுபாடின்றி எம்.பி.க்களுக்கு அவர்களின் தொகுதிகளில் உள்ள வாக்காளர்களின் நலன்களுக்காகச் சமமான தொகுதி மேம்பாட்டு நிதியை (Constituency Development Funds) வழங்கும் என்று குறிப்பிடப்பட்டுள்ளது.

நிதி ஒதுக்கீடுகள் நாடாளுமன்றத்தின் மூலம் அனுப்பப்பட வேண்டும், பிரதமர் அலுவலகம் (PMO) மூலம் அல்ல என்றும் அது கூறுகிறது.

“கூட்டரசு அரசாங்கம், குறிப்பாக மலேசியாவின் நிதியமைச்சராக இருக்கும் பிரதமர், மக்களின் நலன்களுக்கு முன்னுரிமை அளிக்க வேண்டும் என்றும், எதிர்க்கட்சிக்கு எதிரான துஷ்பிரயோகம் மற்றும் பழிவாங்கல் போன்ற கூறுகளைக் குறைக்க வேண்டும் என்றும் PN எதிர்பார்க்கிறது”.

பிப்ரவரி 2 அன்று, மலேசியாகினி எம்.பி.க்கள் 2023 ஆம் ஆண்டுக்கான தொகுதிப் பங்கீடுகளை 70% மேலாகக் குறைக்கலாம், அதாவது ரிம 3.8 மில்லியனிலிருந்து ரிம1.3 மில்லியனாகக் குறைக்கப்படலாம்.

பிரதம மந்திரி துறையின் (PMD) பிரிவான ICU, ஜனவரி தொடக்கத்தில் அரசாங்க எம்.பி.க்களுக்கு அவர்களின் சேவை மைய நிதி RM300,000 ஆக இருக்கும் என்று அறிவுறுத்தியதாக நம்பப்படுகிறது.

நேரடி மானியங்கள் (OG) ரிம1.5 மில்லியனிலிருந்து ரிம 1 மில்லியனாகக் குறைக்கப்படும் என்று ICU மூலம் பின்வரிசையாளர்களுக்குத் தெரிவிக்கப்பட்டது.

பல சட்டமியற்றுபவர்கள் குறைப்புகளால், தொகுதி பிரச்சனைகளை விரைவாகத் தீர்க்கவும், மக்களின் வாழ்க்கையை மேம்படுத்தவும் முடியாது என்று புலம்புகின்றனர்.