தனது சொந்த கட்சித் தலைவர் உட்பட, தவறு செய்ததாகத் தோன்றும் எவரையும் கண்டிப்பதில் வெளிப்படையான முறையில் அறியப்பட்ட பாசிர் கூடாங் நாடாளுமன்ற உறுப்பினர் ஹசன் கரீம்(Hassan Karim) இந்த முறை பண்டோரா பேப்பர்ஸ் விசாரணை தொடர்பாகத் தனது போக்கை மாற்றியுள்ளார்.

அவ்வப்போது விமர்சனங்கள் எழுந்தபோதிலும், பிரதமர் அன்வார் இப்ராஹிம் தலைமையிலான அரசாங்கத்தை ஏன் ஆதரிக்கிறீர்கள் என்று கேட்கப்பட்டால், பண்டோரா பேப்பர்ஸ் கசிவு குறித்த விசாரணை ஒரு காரணம் என்று பிகேஆர் சட்டமன்ற உறுப்பினர் கூறினார்.

முந்தைய இஸ்மாயில் சப்ரி யாக்கோப் நிர்வாகத்தின் கீழ் இது நடக்கவில்லை என்று கூறிய ஹசன், முந்தைய நாடாளுமன்ற  சபாநாயகர் அசார் அசிசான் ஹருன்(Azhar Azizan Harun) இந்த விவகாரத்தை ஆகஸ்ட் அன்று சபையில் எழுப்ப நாடாளுமன்ற உறுப்பினர்களுக்கு வழிவிடவில்லை என்று கூறினார்.

“அன்வார் பிரதமரானபோதுதான், பண்டோரா பேப்பர்ஸ் விவகாரத்தை விசாரிக்க MACCக்கு தைரியம் வந்தது”.

“இது ஒரு சீர்திருத்தமாகவோ அல்லது ‘மதானி’ என்ற கருத்தாக்கமாகவோ கருதப்படவில்லை என்றால், பெரிக்காத்தான் நேசனலில் (PN) உள்ள எனது நண்பர்களுக்கு, வேறு என்ன சொல்வது என்று எனக்குத் தெரியவில்லை,” என்று ஹசன் (மேலே) இன்று ஒரு அறிக்கையில் கூறினார்.

அதே நேரத்தில், ஆவணங்களில் சம்பந்தப்பட்டவர்கள்மீதான விசாரணைகளில் MACC தேர்ந்தெடுக்கப்படக் கூடாது என்று சட்டமன்ற உறுப்பினர் வலியுறுத்தினார்.

முன்னாள் பிரதமர், முன்னாள் துணை பிரதமர், முன்னாள் நிதி அமைச்சர்கள், மாநில கவர்னர், முன்னாள் முதல்வர்கள், முன்னாள் பிரதமரின் குழந்தைகள் எனப் பலரையும் அவர் பட்டியலிட்டார்.

எனவே, மலேசியாவில் உள்ள இந்த முக்கிய நபர்களை உடனடியாக விசாரிக்க வேண்டிய கடமை MACCக்கு உள்ளது என்று அவர் கூறினார்.

“நீங்கள் விசாரிக்கப் போகிறீர்கள் என்றால், அனைவரையும் விசாரிக்கவும். தேர்வு செய்ய வேண்டாம். பண்டோரா பேப்பர்ஸில் பிரசுரமானவர்களின் பெயர்கள் அனைத்தும் மக்கள் விரல் நுனியில் அறிந்துள்ளனர்”.

“பண்டோரா ஆவணங்களின் உள்ளடக்கத்தின் உண்மை நீதிமன்றத்தில் நிரூபிக்கப்பட வேண்டும். அது தோல்வியுற்றால் (நிரூபிக்க), பண்டோரா பேப்பர்ஸின் வெளியீட்டாளர் அவதூறு செய்தார் என்று அர்த்தம், ”என்று ஹாசன் இன்று ஒரு அறிக்கையில் கூறினார்.

அவர்கள் நேர்மையானவர்கள் என்று கண்டறியப்பட்டால், அதுதான் விவகாரத்தின் முடிவு, ஆனால் அவர்கள் வரி ஏய்ப்பு செய்வதற்காக நாட்டிற்கு வெளியே சொத்து சேர்த்தது உண்மை என்றால், அவர்கள்மீது நீதிமன்றத்தில் வழக்குத் தொடரப்பட வேண்டும் என்று அவர் கூறினார்.

“இன்னும் சில நாட்களில், அன்வார் பிரதமராகப் பதவியேற்ற முதல் 100 நாட்கள் இதுவாகும்”.

எனவே, “பண்டோரா பேப்பர்ஸ் விவகாரத்தில் தம்புன் எம்.பி.க்கு பூமாலை அணிவித்து சல்யூட் கொடுங்கள், அவர் கூறிய வாக்கின் படிநடந்து கொள்கிறார்,” என்று ஹசன் கூறினார்.

தொடக்க நிலை

உலகெங்கிலும் உள்ள வரி புகலிடங்களில்(tax havens) ஷெல் நிறுவனங்கள் மற்றும் அறக்கட்டளைகளை நிறுவி நிர்வகிக்கும் 14 வெளிநாட்டு சேவை வழங்குநர்களிடமிருந்து நிதி ஆவணங்கள் மற்றும் பிற பதிவுகள் கசிந்ததை பண்டோரா பேப்பர்ஸ் குறிப்பிடுகிறது.

இந்த ஆவணங்கள் சர்வதேச புலனாய்வு பத்திரிகையாளர்களின் கூட்டமைப்பிற்கு (International Consortium of Investigative Journalists) வெளிப்படுத்தப்பட்டன, இது மலேசியாகினி உட்பட அதன் கூட்டாளர்களுக்கு அணுகலை வழங்கியது.

மலேசிய அரசியல்வாதிகளில் துணைப் பிரதமர் அஹ்மட் ஜாஹிட் ஹமிடி, சர்வதேச வர்த்தகம் மற்றும் தொழில்துறை அமைச்சர் தெங்கு ஜஃப்ருல் அப்துல் அஜிஸ், முன்னாள் நிதியமைச்சர் டைம் ஜைனுடின் மற்றும் பலர் தங்கள் சொத்துக்களை வரிப் புகலிடங்களில் வைத்திருந்ததாகக் கண்டறியப்பட்டது.

அவர்கள் ஒவ்வொருவரும் 2021 இல் தங்கள் கணக்குகள் முறையான நோக்கங்களுக்காகப் பயன்படுத்தப்பட்டதாகக் கூறினர்.