அடுத்த மாதம் நடைபெறவிருக்கும் மாநிலத் தேர்தலில் 14வது பொதுத் தேர்தலில் (GE14) வென்ற 16 மாநில இடங்களையும் DAPபாதுகாக்கும் என்று சிலாங்கூர் DAP செயலாளர் இங் சே ஹான்(Ng Sze Han) கூறினார்.
பக்காத்தான் ஹராப்பானும் BNனும் தொகுதிப் பங்கீட்டிற்கு உடன்பட்டதாக அவர் கூறினார்.
“GE14 இல் வென்ற அனைத்து இடங்களையும் தக்க வைத்துக் கொள்ள DAP அதன் வேகத்தைத் தக்க வைத்துக் கொள்ளும் என்று நம்புகிறது,” என்று இங் (மேலே) சமீபத்தில் பெர்னாமாவுக்கு அளித்த பிரத்யேக பேட்டியில் கூறினார்.
DAP வென்ற 16 இடங்கள் செகின்சான், கோலா குபு பஹாரு, தெரடாய், துசூன் துவா, பாலகோங், செரி கெம்பாங்கன், கின்ராரா, சுபாங் ஜெயா, புக்கிட் காசிங், கம்போங் துங்கு, பண்டார் உத்தாமா, பண்டார் பாரு கிள்ளான், பாண்டமாறன், கோத்தா கெமுனிங், பண்திங் மற்றும் சுங்கை பெலெக்.
இருப்பினும், தெரதாய் மாநில சட்டமன்ற உறுப்பினர் பிரையன் லாய் வை சோங்(Bryan Lai Wai Chong) கடந்த ஆண்டு வாரிசானில் சேருவதற்கு முன்பு 2021 இல் கட்சியை விட்டு வெளியேறிச் சுயேட்சையாக மாறியபோது DAP ஒரு இடத்தை இழந்தது.
சிலாங்கூர் மாநில சட்டமன்றம் கலைக்கப்படுவதற்கு முன்பு உள்ளூர் அரசாங்கம், பொதுப் போக்குவரத்து மற்றும் புதிய கிராம வளர்ச்சிக்குப் பொறுப்பான நிர்வாகக் கவுன்சிலராக இருந்த இங், இரண்டு முறை தான் வகித்த கின்றாரா தொகுதியைப் பாதுகாக்கத் தயாராக இருப்பதாகக் கூறினார்.
“கின்ராராவில் (போட்டியிட) வாய்ப்பு வழங்கப்பட்டால், ஆம். ஆனால், மீண்டும், இறுதி முடிவை எடுக்கும் பொறுப்பை, கட்சிக்கே விட்டு விடுகிறேன். இந்த 16 இடங்களும் தனிநபர்களுக்குச் சொந்தமானவை அல்ல, மாறாக டிஏபி மற்றும் ஹராப்பானுக்கு சொந்தமானவை என்பதை நான் எப்போதும் வலியுறுத்துகிறேன்,” என்று அவர் மேலும் கூறினார்.
ஜூன் 23 அன்று மாநில சட்டமன்றம் கலைக்கப்படுவதற்கு முன்பு, ஹரப்பான் 40 இடங்களைக் கொண்டிருந்தது – PKR (19), DAP (15), அமானா (6) – BN (ஐந்து), பெர்சத்து (நான்கு), பார்ட்டி பங்சா மலேசியா (இரண்டு), பாஸ், பெஜுவாங் மற்றும் வாரிசான் தலா ஒன்று, மற்றும் சுயேட்சை (ஒன்று).
ஆறு மாதங்களுக்கும் மேலாக மாநில சட்டமன்றக் கூட்டங்களைத் தவிர்த்ததால் பாடாங் கலி தொகுதி கடந்த பிப்ரவரி மாதம் காலியானதாக அறிவிக்கப்பட்டது.
சிலாங்கூர் ஹராப்பான் தலைவர் அமிருடின் ஷாரி, BN 56 மாநில இடங்களில் 20% அதிகமாகவும், ஹராப்பான் மீதமுள்ள இடங்களிலும் போட்டியிடும் என்று முன்னர் கூறியிருந்தார்.
சிலாங்கூர், கெடா, பினாங்கு, கிளந்தான், திரங்கானு மற்றும் நெகிரி செம்பிலான் ஆகிய தொகுதிகளுக்கு ஆகஸ்ட் 12-ம் தேதி தேர்தல் நடைபெறும்.
