மே 12 முதல் 18 வரையிலான 20வது தொற்றுநோயியல் வாரத்தில் (ME20) டெங்கி காய்ச்சல் நேர்வுகள் 2,461 ஆக அதிகரித்துள்ளன, முந்தைய வாரத்தில் 2,338 நேர்வுகள் பதிவாகியுள்ளன.

டெங்கி காய்ச்சலால் ஏற்பட்ட பாதிப்புகளால் இரண்டு இறப்புகளும் இந்தக் காலகட்டத்தில் பதிவு செய்யப்பட்டுள்ளதாகச் சுகாதார இயக்குநர் ஜெனரல் டாக்டர் முஹம்மது ராட்ஸி அபு ஹாசன் தெரிவித்தார்.

2023 ஆம் ஆண்டின் இதே காலப்பகுதியில் 43,619 நேர்வுகளுடன் ஒப்பிடும்போது ME20 வரை பதிவான டெங்கி காய்ச்சல் நேர்வுகளின் மொத்த எண்ணிக்கை 59,681 ஆக உள்ளது, அதே நேரத்தில் டெங்கி காய்ச்சல் சிக்கல்களால் 42 இறப்புகள் பதிவாகியுள்ளன, அதே நேரத்தில் கடந்த ஆண்டு இதே காலப்பகுதியில் 28 இறப்புகள் பதிவாகியுள்ளன.

“ME20 இல் பதிவான அபாய  இடங்களின் எண்ணிக்கை, முந்தைய வாரத்தில் பதிவு செய்யப்பட்ட 60 இடங்களுடன் ஒப்பிடுகையில், 59 ஆக இருந்தது, சிலாங்கூரில் 44 இடங்கள் உள்ளன; கோலாலம்பூர், புத்ராஜெயா மற்றும் சரவாக்கில் தலா நான்கு இடங்கள்; கெடா (மூன்று); பேராக் (இரண்டு) மற்றும் பினாங்கு மற்றும் நெகிரி செம்பிலானில் தலா ஒரு பகுதி,” என்று அவர் இன்று ஒரு அறிக்கையில் கூறினார்.

இதற்கிடையில், ME20 இல் ஒரு சிக்குன்குனியா நேர்வு பதிவு செய்யப்பட்டுள்ளதாகவும், இன்றுவரை சிக்குன்குனியா நேருவுகளின் மொத்த எண்ணிக்கையானது 25 நேர்வுகள் ஆகும், திரளலைகள் எதுவும் பதிவாகவில்லை என்றும் அவர் கூறினார்.

ஜிகா வைரஸ் கண்காணிப்பைப் பொறுத்தவரை, 1,021 இரத்த மாதிரிகள் மற்றும் ஆறு சிறுநீர் மாதிரிகள் பரிசோதிக்கப்பட்டதாகவும், அனைத்து முடிவுகளும் எதிர்மறையாக இருப்பதாகவும் அவர் கூறினார்.

தற்போது பள்ளிகளுக்கு விடுமுறை என்பதால் டெங்கி காய்ச்சலை தடுக்க பள்ளி கட்டிடங்களுக்கு உள்ளேயும் வெளியேயும் உள்ள ஏடிஸ் கொசுக்கள் பெருகும் இடங்களை அழிப்பது, தண்ணீர் தேங்கக்கூடிய கொள்கலன்கள் அல்லது குப்பைகளை அப்புறப்படுத்துவது உள்ளிட்ட நடவடிக்கைகளை எடுக்கப் பள்ளிகள் மற்றும் நியமிக்கப்பட்ட துப்புரவு ஒப்பந்ததாரர்களுக்கு அறிவுறுத்தப்பட்டுள்ளது என்றார்.