சுபாங் ஜெயாவின் புத்ரா ஹைட்ஸ், ஜாலான் புத்ரா ஹார்மோனியில் எரிவாயு குழாய் தீ விபத்து நடந்த இடத்தில் மொத்தம் 20 நிறுவனங்கள் இன்று காலை விசாரணைகள் மற்றும் பாதுகாப்பு ஆய்வுகளைத் தொடங்கும்.

அவற்றில் காவல்துறை, தீயணைப்பு மற்றும் மீட்புத் துறை, Tenaga Nasional Berhad (TNB), பொதுப்பணித் துறை, உள்ளூர் அதிகாரிகள் மற்றும் பாதிக்கப்பட்ட பகுதியின் மாவட்ட அலுவலகம் ஆகியவை அடங்கும்.

பாதுகாப்பு குழுக்களின் நடமாட்டத்தை எளிதாக்குவதற்காக, ஜாலான் பெர்சியாரன் ஹார்மோனி தற்போதைக்கு படிப்படியாக மூடப்படுவதாகச் சுபாங் ஜெயா காவல்துறைத் தலைவர் வான் அஸ்லான் வான் மமட் தெரிவித்தார்.

சுபாங் ஜெயா போலீஸ் தலைவர் வான் அஸ்லான் வான் மாமத்

இருப்பினும், பாதிக்கப்பட்ட குடியிருப்பாளர்களுக்காக இது படிப்படியாக மீண்டும் திறக்கப்படும்.

“சம்பவ இடத்தில் விசாரணைகளை நடத்துவதற்கும் தேவையான பின்தொடர்தல் நடவடிக்கைகளைத் தீர்மானிப்பதற்கும் சம்பந்தப்பட்ட அனைத்து நிறுவனங்களுடனும் ஒரு விளக்கம் நடத்தப்படும்,” என்று அவர் செய்தியாளர்களிடம் கூறினார்.

சேதத்தை மதிப்பிடுதல்

இதற்கிடையில், தீயணைப்பு மற்றும் மீட்புத் துறையின் இயக்குநர் ஜெனரல் நோர் ஹிஷாம் முகமது, எரிவாயு குழாய் வெடிப்பால் பாதிக்கப்பட்ட வீடுகள் மற்றும் வாகனங்களுக்கு ஏற்பட்ட சேதத்தை மதிப்பிடுவது உட்பட பல முக்கிய பணிகளைத் தனது துறை தொடங்கியுள்ளது என்றார்.

தீ விபத்து போன்ற ஏதேனும் சாத்தியமான சம்பவங்களுக்குப் பதிலளிக்க ஒரு குழு தயார் நிலையில் உள்ளது என்றும் அவர் கூறினார்.

தீயணைப்பு மற்றும் மீட்புத் துறை இயக்குநர் ஜெனரல் நோர் ஹிஷாம் முகமது

“மின் வயரிங் தொடர்பான நிலைமையை மதிப்பிடுவதற்கு, குறிப்பாக ஆபத்தில் உள்ளவற்றை மதிப்பிடுவதற்கு நாங்கள் TNB உடன் இணைந்து பணியாற்றுவோம்… வயரிங் பாதுகாப்பானதா அல்லது கூடுதல் நடவடிக்கை தேவையா என்பதை நாங்கள் தீர்மானிப்போம், இதன் மூலம் அந்தப் பகுதியில் இணைப்புகளை விரைவில் மீட்டெடுக்க முடியும்,” என்று அவர் பெர்னாமாவிடம் கூறினார்.

வெடிப்பால் சேதமடைந்த அல்லது பாதிக்கப்பட்ட வீடுகளின் கட்டமைப்பு ஒருமைப்பாட்டிலும் குடியிருப்பாளர்களின் பாதுகாப்பை உறுதி செய்வதற்காகத் தனது துறை கவனம் செலுத்தி வருவதாக ஹிஷாம் மேலும் கூறினார்.

“பாதுகாப்பு அடிப்படையில், எரிவாயு வெடிப்பால் எரிந்த அல்லது பாதிக்கப்பட்ட வீடுகளை நாங்கள் ஆய்வு செய்யத் தொடங்குவோம். ஏதேனும் கட்டமைப்புகள் பாதுகாப்பற்றவை அல்லது ஆபத்தானவையெனக் கருதப்பட்டால், கூரைகள் போன்ற இடிப்புப் பணிகளை நாங்கள் மேற்கொள்ளலாம்,” என்று அவர் கூறினார்.

பாதிக்கப்பட்ட குடியிருப்பாளர்கள் தங்கள் வீடுகளுக்கு விரைவாகத் திரும்புவதற்கும், விசாரணைகளை விரைவுபடுத்துவதற்கும், மலாக்கா, நெகிரி செம்பிலான், கோலாலம்பூர் மற்றும் அதன் தலைமையகங்களிலிருந்து குழுக்களை அனுப்பியுள்ளதாகவும் ஹிஷாம் குறிப்பிட்டார்.