2014-ஆம் ஆண்டில் ஆட்சியை கவிழ்க்க அமெரிக்கா தங்களுக்கு உதவ முன்வந்ததாகக் கூறிய குற்றச்சாட்டு தொடர்பாக, பாஸ் கட்சித் தலைவர் அப்துல் ஹாடி அவாங்கை புக்கிட் அமான் தொடர்பு கொண்டுள்ளது.

ஹாடி அவாங்கின் அரசியல் செயலாளராகப் பணியாற்றும் பச்சோக் நாடாளுமன்ற உறுப்பினர் சியாஹிர் சுலைமான், இந்த விவகாரம் தொடர்பாக காவல்துறை ஹாடியின் அலுவலகத்தைத் தொடர்பு கொண்டதை உறுதிப்படுத்தியுள்ளார்.

இதுகுறித்து தோக் குருவிற்கு (ஹாடி அவாங்) தெரிவிக்கப்பட்டுள்ளது. அவர் காவல்துறைக்கு முழு ஒத்துழைப்பு வழங்கத் தயாராக உள்ளார். இதற்கான தேதியும் நேரமும் பின்னர் தீர்மானிக்கப்படும், என்று அவர் கூறினார்.

ஹாடியின் இந்தக் குற்றச்சாட்டு தொடர்பாக பண்டார் துன் ரசாக் பிகேஆர் (PKR) தலைவர்களான வி. ஜொனாதன், மஸ்லினா உஸ்மான் மற்றும் அமருல் ஹிஷாம் ஜலில் ஆகியோர் ஞாயிற்றுக்கிழமையன்று செராஸ் காவல் நிலையத்தில் மூன்று போலீஸ் புகார்களை அளித்துள்ளனர்.

கடந்த 2014-ஆம் ஆண்டில் அப்போதைய அமெரிக்க அதிபர் பராக் ஒபாமா மலேசியாவிற்கு வருகை தந்திருந்தபோது, ஆட்சியை கவிழ்ப்பதற்கு அமெரிக்கா தங்களுக்கு உதவ முன்வந்ததாக பாஸ் கட்சியின் 72-வது ஆண்டு பொதுக்கூட்டத்தில் ஹாடி அவாங் குறிப்பிட்டிருந்தார்.

அப்போது பாஸ் கட்சியின் உதவிப் பொதுச்செயலாளராக இருந்த தக்கியுதீன் ஹசானும், ஹாடியின் அரசியல் செயலாளராக இருந்த அகமத் சம்சுரி மொக்தாரும் இந்தச் சந்திப்பிற்காகத் தூதரகத்திற்குச் சென்றதாக அவர் கூறினார்.

இருப்பினும், தக்கியுதீனும் சம்சுரியும் அந்தச் சலுகையால் ஈர்க்கப்படாமல், அதை நிராகரிப்பதில் உறுதியாக இருந்ததாக அவர் தெரிவித்தார்.

இதற்கிடையில், கோலாலம்பூரில் உள்ள அமெரிக்கத் தூதரகம் ஹாடியின் இந்தக் குற்றச்சாட்டை மறுத்துள்ளதுடன், மலேசியாவை யார் வழிநடத்த வேண்டும் என்பதை அமெரிக்கா ஒருபோதும் தீர்மானிக்க முயன்றதில்லை என்றும் வலியுறுத்தியுள்ளது.

 

 

 

-fmt