மலேசியக் கப்பல் ஒன்று செங்கடலைக் (Red Sea) கடந்து செல்ல அனுமதி வழங்கப்பட்டுள்ளதாகவும், அது அடுத்த மாதம் தொடக்கத்தில் மலாக்காவை வந்தடையும் என்றும் பிரதமர் அன்வார் இப்ராஹிம் தெரிவித்துள்ளார்.

மலேசியாவின் வெளியுறவுக்கொள்கை மற்றும் பிற நாடுகளுடனான நல்லுறவு ஆகியவை பல முக்கியமான சிக்கல்கள் மற்றும் கப்பல் போக்குவரத்து நெருக்கடிகளைத் திறம்படக் கையாள உதவியுள்ளதை இந்த முன்னேற்றம் நிரூபிப்பதாக அவர் கூறினார்.

போர்ட் டிக்சனில் உள்ள மலேசிய ராணுவத்தின் அடிப்படைப் பயிற்சி மையத்தில் நடைபெற்ற “செமராக் கெனெகாரான்” (Semarak Kenegaraan) நிகழ்ச்சியில் உரையாற்றிய பிரதமர்:

“சவூதி அரேபியாவின் யான்புவில் (Yanbu) இருந்து செங்கடல் வழியாகப் புறப்பட்ட மற்றொரு பெட்ரோனாஸ் (Petronas) கப்பலுக்கு அனுமதி வழங்கப்பட்டுள்ளதாக பெட்ரோனாஸ் தலைவர் மற்றும் குழுமத் தலைமை நிர்வாக அதிகாரி தெங்கு தௌபிக் தெங்கு அஜிஸ் நேற்று எனக்குத் தெரிவித்தார். அஃது அல்ஹம்துலில்லாஹ், ஆகஸ்ட் தொடக்கத்தில் மலாக்காவிற்கு வந்து சேரும்,” என்று கூறினார்.

இந்நிகழ்ச்சியில் அரசாங்கத்தின் தலைமைச் செயலாளர் சம்சுல் அஸ்ரி அபு பக்கர், துணைத் பாதுகாப்பு அமைச்சர் அட்லி ஜஹாரி, பாதுகாப்புப் படைத் தளபதி மாலெக் ரசாக் சுலைமான் மற்றும் ராணுவத் தளபதி அஸ்ஹான் ஓத்மான் ஆகியோரும் கலந்துகொண்டனர்.

செங்கடலில் நிலவும் பதற்றம்

யேமனின் ஈரான் ஆதரவு ஹூதி (Houthi) அமைப்பினர் வர்த்தகக் கப்பல்கள் மீது நடத்தி வரும் தாக்குதல்களைத் தொடர்ந்து, செங்கடல் பகுதி தற்போது அதிக ஆபத்துள்ள கப்பல் பாதையாக மாறியுள்ளது.

கடந்த ஒரு தசாப்தத்திற்கும் மேலாக அண்டை நாட்டுடன் மோதலில் ஈடுபட்டு வரும் ஹூதி அமைப்பு, சவூதி அரேபியாவுடன் மீண்டும் மோதல் வெடித்த ஒரு வாரத்திற்குப் பிறகு, திங்கள்கிழமை சவூதி அரேபியக் கப்பல்களுக்கு “தடை” விதிப்பதாக அறிவித்தது.

பிரதமர் கூறுகையில், ஈரானின் உயர்மட்டத் தலைமையுடன் மலேசியா கொண்டுள்ள நல்லுறவு இரு நாடுகளுக்கும் இடையே நேரடித் தொடர்பை சாத்தியமாக்கியது என்றும், இது அமைதியான முறையிலும் விரைவாகவும் பிரச்சினையைத் தீர்க்க உதவியது என்றும் கூறினார்.

“அதிர்ஷ்டவசமாக, ஈரான் அரசாங்கத்துடன் எங்களுக்கு நல்லுறவு உள்ளது. அமெரிக்கா, வளைகுடா நாடுகள் மற்றும் ஈரானுடன் நாங்கள் நல்லுறவைப் பேணி வருகிறோம்”.

எனவே, போர் தொடங்கிய பிறகு சில மாதங்களுக்கு முன்பு பெட்ரோனாஸ் கப்பல் தடுக்கப்பட்டபோது, எங்கள் நல்லுறவு ஈரான் அதிபரை எளிதாகத் தொடர்பு கொள்ள எனக்கு உதவியது.

“எனது அனுதாபங்களைத் தெரிவித்த பிறகு, பெட்ரோனாஸ் கப்பலை விடுவிக்குமாறு நான் அவரிடம் கேட்டுக்கொண்டேன். ஹார்முஸ் ஜலசந்தியைக் (Strait of Hormuz) கடக்க அனுமதிக்கப்பட்ட முதல் கப்பல்களில் பெட்ரோனாஸ் கப்பலும் ஒன்று, அது ஏற்கனவே பெங்கெராங்கை (Pengerang) வந்தடைந்துள்ளது,” என்று அவர் கூறினார்.

தொடரும் தாக்குதல்கள்

ஹார்முஸ் ஜலசந்தியைப் பாதுகாப்பாகக் கடக்க அனுமதி வழங்கப்பட்ட முதல் கப்பல்களில் மலேசியாவின் ஓஷன் தண்டர் (Ocean Thunder) டாங்கர் கப்பலும் ஒன்றாகும். இது ஏப்ரல் 17 அன்று ஜொகூரில் உள்ள பெங்கெராங் முனையத்தை பத்திரமாக வந்தடைந்தது.

உலகின் கச்சா எண்ணெய் மற்றும் எரிவாயுவில் 20 சதவீதம் கடந்து செல்லும் முக்கியமான குறுகிய கடல் பாதையான ஹார்முஸ் நீரிணை வழியான போக்குவரத்து, பிப்ரவரி 28 முதல் ஈரான் நாட்டின் நிலப்பரப்பு மற்றும் முக்கிய வசதிகள் மீது அமெரிக்கா மற்றும் இஸ்ரேல் தொடர்ந்து மேற்கொண்ட தாக்குதல்களைத் தொடர்ந்து பாதிக்கப்பட்டது.

இதைத் தொடர்ந்து அமெரிக்காவிற்கும் ஈரானுக்கும் இடையே அமைதி ஒப்பந்தம் குறித்த புரிந்துணர்வு ஒப்பந்தம் கையெழுத்தானது. அதிகபட்சமாக 60 நாட்களுக்குள் இறுதி ஒப்பந்தம் எட்டப்படும் என எதிர்பார்க்கப்பட்டது.

இருப்பினும், கடந்த வாரம் முதல் ஈரான் முழுவதும் அமெரிக்கா தொடர் தாக்குதல்களை நடத்தியுள்ளது. இதற்குப் பதிலடியாக, மேற்கு ஆசியாவின் பல நாடுகளில் அமெரிக்க ராணுவத்தால் பயன்படுத்தப்படுவதாகக் கூறப்படும் வசதிகள் மற்றும் தளங்கள் மீது தஹ்ரான் (Tehran) தாக்குதல் நடத்தியது.

கொள்கை ரீதியான நிலைப்பாடு

மேலும் கருத்து தெரிவித்த பிரதமர், அமெரிக்கா, சீனா, வளைகுடா நாடுகள் மற்றும் ஈரான் போன்ற முக்கிய வல்லரசுகளுடன் நல்லுறவைப் பேணும் அரசாங்கத்தின் அணுகுமுறை, மலேசியா தனது கொள்கை ரீதியான நிலைப்பாட்டில் எந்தவொரு சமரசமும் செய்துகொள்ளாமல் தனது மூலோபாய நலன்களைப் பாதுகாக்க முடியும் என்பதை நிரூபித்துள்ளதாக வலியுறுத்தினார்.

“சீனாவுடனோ அல்லது அமெரிக்காவுடனோ நான் ஏன் நல்லுறவைக் கொண்டிருக்கிறேன் என்று சிலர் கேட்கிறார்கள். ஒரு வளர்ந்து வரும் நாடாக, நாங்கள் நல்லுறவைப் பேணுகிறோம்”.

“ஆனால் காசாவில் நடக்கும் படுகொலைகள் அல்லது இஸ்லாமியக் குடியரசான ஈரான் மீதான அமெரிக்காவின் ராணுவத் தாக்குதல் என்று வரும்போது, இஸ்ரேல் மற்றும் அமெரிக்காவின் தாக்குதல்களைக் கண்டித்து சிறப்பு நாடாளுமன்றக் கூட்டத்தைக் கூட்டிய முதல் நாடுகளில் மலேசியாவும் ஒன்று,” என்று அவர் கூறினார்.