மலேசியாவின் அப்போதைய BN (Barisan Nasional) அரசாங்கத்தை கவிழ்க்க உதவுவதாக அமெரிக்கப் பிரதிநிதிகள் பாஸ் (PAS) தலைவர் அப்துல் ஹாடி அவாங்கிடம் கூறியதாக அவர் முன்வைத்த குற்றச்சாட்டு பொய்யானது என அமெரிக்கத் தூதரகம் தெரிவித்துள்ளது.

கோலாலம்பூரில் உள்ள அமெரிக்கத் தூதரகத்தின் பொறுப்பாளரான டேவிட் எச். கேம்பிள் ஜூனியர், மலேசியாகினியிடம் இன்று அதிகாலை வெளியிட்ட சுருக்கமான அறிக்கையில்:

“மலேசியாவின் அரசியல் தலைமையைத் தீர்மானிக்க அமெரிக்கா ஒருபோதும் முயற்சித்ததில்லை. இதற்கு மாறாகக் கூறப்படும் எந்தக் கூற்றும் பொய்யானது,” என்று தெரிவித்தார்.

நேற்று கோத்தா பாருவில் நடைபெற்ற PAS கட்சியின் 72ஆவது பொதுக்கூட்டத்தின் நிறைவு உரையில் ஹாடி, தமது கட்சிக்கு அந்த உதவி வழங்கப்பட்டதாகக் கூறப்படும் சம்பவம், அமெரிக்காவின் முன்னாள் அதிபர் பராக் ஒபாமா மலேசியாவுக்கு வந்திருந்த காலகட்டத்தில் இடம்பெற்றதாகத் தெரிவித்தார்.

அந்த நேரத்தில் PAS தலைவர்கள் சிலர் கோலாலம்பூரில் உள்ள அமெரிக்கத் தூதரகத்தில் நடைபெற்ற ஒரு நிகழ்ச்சிக்கு அழைக்கப்பட்டிருந்ததாகவும் அவர் கூறினார்.

ஒபாமா 2014 மற்றும் 2015ஆம் ஆண்டுகளில் மலேசியாவுக்கு இரண்டு முறை வருகை  புரிந்திருந்தார். அந்த இரு வருகைகளும் நஜிப் அப்துல் ரசாக் பிரதமராக இருந்த காலத்திலேயே இடம்பெற்றன.

நஜிப், SRC International நிறுவனத்தின் ரிம 42 மில்லியன் நிதி தொடர்பான அதிகார துஷ்பிரயோகம், குற்றவியல் நம்பிக்கை மோசடி மற்றும் பணமோசடி உள்ளிட்ட ஏழு குற்றச்சாட்டுகளில் 2020ஆம் ஆண்டு குற்றவாளியாகத் தீர்ப்பளிக்கப்பட்டு, தற்போது சிறையில் உள்ளார்.

அந்தச் சம்பவம் இடம்பெற்றதாகக் கூறப்படும் காலத்தில் PAS, Pakatan Rakyat கூட்டணியின் ஒரு பகுதியாக இருந்ததாக ஹாடி குறிப்பிட்டார்.

அப்போது தமது அரசியல் செயலாளர்களாக இருந்த கட்சியின் பொதுச் செயலாளர் தக்கியுதீன் ஹசான் மற்றும் துணைத் தலைவர் அஹ்மத் சம்சூரி மொக்தார் ஆகியோரும் அந்த நிகழ்வில் கலந்து கொண்டதாக அவர் தெரிவித்தார்.

முன்னாள் PAS பொதுச் செயலாளர் முஸ்தபா அலியுடன் தாமும் அந்த அழைப்பை ஏற்று நிகழ்ச்சியில் கலந்து கொண்டதாக ஹாடி கூறினார்.

DAP நாடாளுமன்ற உறுப்பினர்கள் விசாரணை கோரிக்கை

ஆர்.எஸ்.என்.ராயர்

இந்தக் குற்றச்சாட்டைத் தொடர்ந்து, ஜெலுத்தோங் நாடாளுமன்ற உறுப்பினர் RSN ராயர் மற்றும் கெப்போங் நாடாளுமன்ற உறுப்பினர் லிம் லிப் எங் ஆகியோர் தனித்தனியான அறிக்கைகளில், இந்த விவகாரம் குறித்து அரசாங்கம் விசாரணை நடத்த வேண்டும் என்று கோரினர்.

இந்தக் குற்றச்சாட்டு மிகவும் தீவிரமானது என்றும், ஹாடி ஏன் அப்போது பிரதமராக இருந்த நஜிப்பிடமோ, உள்துறை அமைச்சகத்திடமோ, வெளியுறவு அமைச்சகத்திடமோ, காவல்துறையிடமோ அல்லது தொடர்புடைய தேசிய பாதுகாப்பு அமைப்புகளிடமோ தகவல் தெரிவிக்கவில்லை என்றும் ராயர் கேள்வி எழுப்பினார்.

ராயர் இந்த விவகாரத்தை “துரோகம்” மற்றும் “தேசநிந்தனை” என்றும் குறிப்பிட்டார்.

இவ்வளவு பெரிய குற்றச்சாட்டை முன்வைக்கும் நிலையில், வெளிப்படைத்தன்மை மற்றும் பொறுப்புக்கூறலை மற்றவர்களிடம் PAS கோரிவிட்டு, வெளிநாட்டு அரசாங்கம் தொடர்புடையதாகக் கூறப்படும் இந்த விவகாரத்தில் மட்டும் மௌனம் காக்க முடியாது.

இதில் தொடர்புடைய அமெரிக்க அதிகாரிகளை உடனடியாக கைது செய்திருக்க முடியும். இத்தனை ஆண்டுகளாக PAS ஏன் அமைதியாக இருந்தது?

“இது தேசிய பாதுகாப்பு தொடர்பான விவகாரம். ஒரு கட்சி மாநாட்டில் சாதாரணமாகப் பெருமையாகப் பேசக்கூடிய விஷயம் அல்ல,” என்று அவர் மேலும் கூறினார்.

அந்தச் சந்திப்பில் யார் கலந்து கொண்டனர், அது எப்போது மற்றும் எங்கே நடைபெற்றது, அதற்கு யார் அனுமதி வழங்கினர், என்ன விவாதிக்கப்பட்டது, மிக முக்கியமாக, வெளிநாட்டு அரசாங்கத்தின் பிரதிநிதிகள் மலேசியாவில் சட்டப்பூர்வமாகத் தேர்ந்தெடுக்கப்பட்ட அரசாங்கத்தை அகற்றுவதற்கு செல்வாக்கு செலுத்த, நாட்டைச் சீர்குலைக்க அல்லது அதற்கு உதவ முயன்றார்களா என்பதைக் குறித்து மலேசியர்கள் அறிந்து கொள்ள வேண்டும் என்று ராயர் கூறினார்.

“இது PAS, Pakatan Harapan, BN அல்லது Perikatan Nasional பற்றிய விவகாரம் அல்ல. இது மலேசியா பற்றிய விவகாரம்,” என்றார் அவர்.

லிமும் இதேபோன்ற கருத்தைத் தெரிவித்தார்.

“எனக்கு தெளிவான பதில் வேண்டும். ஹாடி, தக்கியுதீன் அல்லது சம்சூரி ஆகியோர் இந்த விவகாரம் குறித்து மலேசிய அதிகாரிகளுக்கு தகவல் தெரிவித்தார்களா? தெரிவித்திருந்தால், எப்போது, யாரிடம் தெரிவித்தனர்? இல்லையெனில், 12 ஆண்டுகளுக்கு முன்பு நடந்ததாகக் கூறப்படும் ஒரு சம்பவம் ஏன் இதுவரை தெரிவிக்கப்படவில்லை?

“காவல்துறை அவர்களிடம் வாக்குமூலம் பெற்று, சம்பந்தப்பட்ட அமெரிக்கப் பிரதிநிதியை அடையாளம் காண வேண்டும். உண்மையில் என்ன வழங்கப்பட்டது? அது வெறும் அரசியல் உரையாடலா, அல்லது அரசாங்கத்தை சட்டவிரோதமாகக் கவிழ்க்கும் திட்டமா?” என்று லிம் கூறினார்.

நாடாளுமன்ற ஜனநாயகத்தை வன்முறை அல்லது அரசியலமைப்புக்கு முரணான வழிகளில் கவிழ்க்கும் திட்டம் இருந்திருந்தால், குற்றவியல் சட்டத்தின் பிரிவு 124B கீழ் குற்றம் நடந்திருக்கிறதா என்பதை காவல்துறை விசாரிக்க வேண்டும் என்றும், யாராவது குற்றத் திட்டத்தை மறைத்து, அதை செயல்படுத்த உதவும் வகையில் திட்டமிட்டு தகவலை மறைத்திருந்தால், பிரிவுகள் 118 அல்லது 120 ஆகியவையும் பரிசீலிக்கப்பட வேண்டும் என்றும் அவர் கூறினார்.

“பிரிவுகள் 176 அல்லது 202 ஆகியவையும் பரிசீலிக்கப்பட வேண்டும். வழங்க வேண்டிய தகவல் திட்டமிட்டு மறைக்கப்பட்டிருந்தால், அவை பொருந்துமா என்பதை ஆய்வு செய்ய வேண்டும்.

“ஹாடி இந்தக் குற்றச்சாட்டை முன்வைத்துள்ளார். இப்போது அதற்கான ஆதாரத்தை அவர் வெளியிட வேண்டும். தேசிய இறையாண்மை என்பது அரசியல் உரைகளில் பயன்படுத்தப்படும் ஒரு பொருள் அல்ல,” என்று லிம் மேலும் கூறினார்.

PSM-ன் விமர்சனம்

எஸ் அருட்செல்வன்

PSM துணைத் தலைவர் எஸ். அருட்செல்வன், ஹாடியின் கூற்றை விமர்சித்ததுடன், PAS கடந்த காலங்களில் அமெரிக்க அதிகாரிகளுடன் மேற்கொண்ட தொடர்புகள் குறித்தும் கேள்வி எழுப்பினார்.

ஒபாமாவின் மலேசிய வருகையின்போது பல மலேசிய அரசுசாரா அமைப்புகளும் அரசியல் தலைவர்களும் அவரைச் சந்தித்து புகைப்படம் எடுத்துக்கொள்ள ஆர்வமாக இருந்ததாக அவர் குறிப்பிட்டார்.

ஆனால் PSM அதற்கு மாறாக, அந்த அழைப்பை ஏற்க மறுத்ததாக அருட்செல்வன் கூறினார்.

அப்போது கட்சியின் தலைவராக இருந்த டாக்டர் மைக்கேல் ஜெயக்குமார், அமெரிக்காவின் வெளியுறவுக் கொள்கை மற்றும் அது உலகில் ஏற்படுத்திய தாக்கம் குறித்து PSM-ன் விமர்சனங்களைத் தெரிவித்து, ஒபாமாவுக்கு ஒரு திறந்த கடிதமும் எழுதியதாக அவர் தெரிவித்தார்.