முன்னாள் பிரதமர் நஜிப் ரசாக் சம்பந்தப்பட்ட வழக்கு தொடர்பாக, அரசாங்கம் கூட்டாட்சி அரசியலமைப்பின் கோட்பாடுகளுக்கும், மாட்சிமை தங்கிய மாமன்னரின் முடிவுக்கும் கட்டுப்பட்டு நடக்கிறது என்று பிரதமர் அன்வார் இப்ராகிம் வலியுறுத்தினார்.

ஊழலையோ அல்லது நாட்டின் செல்வத்தைத் தனிப்பட்ட ஆதாயத்திற்காகப் பயன்படுத்துவதையோ நாடு சகித்துக்கொள்ளாது என்பதில் அரசாங்கத்தின் நிலைப்பாடு தெளிவாக உள்ளது.

நஜிப்பின் வழக்குச் சுற்றியுள்ள சர்ச்சைகளைப் பற்றி நாம் விவாதிக்கும்போது, நான் கூட்டாட்சி அரசியலமைப்பின் கோட்பாடுகளுக்குக் கட்டுப்படுகிறேன். ஆனால், அதே வேளையில் ஒரு பிரதமர் சட்டவியல் மற்றும் சட்டத்தின் அடிப்படையில் தனது கருத்துக்களையும் ஆலோசனைகளையும் வழங்குவதை அது தடுக்காது.

இந்த நாடு ஊழலையோ மற்றும் நாட்டின் செல்வத்தைச் சூறையாடும் செயலையோ சகித்துக்கொள்ளாது, என்று நேற்று இரவு பாங்கியில் நடைபெற்ற ‘3 தலைமுறைகளின் பாராட்டு இரவு உணவு மற்றும் போராட்டத்தின் பாரம்பரியத்தைத் தொடர்தல்’ என்ற நிகழ்வில் உரையாற்றும்போது அவர் கூறினார்.

லெம்பாகா தபோங் ஹாஜி, பெல்டா மற்றும் 1எம்டிபி உள்ளிட்ட இதற்கு முன்பு பொதுமக்களின் கவனத்தை ஈர்த்த பல நிறுவனங்கள் சார்ந்த பிரச்சனைகளையும் அன்வார் சுட்டிக்காட்டினார். அதே வேளையில், நாட்டின் செல்வத்தைச் சூறையாடியதாகக் குற்றம் சாட்டப்பட்டவர்கள் அதற்கு முழுப் பொறுப்பேற்க வேண்டும்.

தபோங் ஹாஜி, பெல்டா, 1எம்டிபி… நாட்டின் செல்வத்தைச் சூறையாடியவர்கள் அதற்குப் பதிலளிக்க வேண்டும். எனவே, முடிவு எதுவாக இருந்தாலும், அது நமது நாட்டைப் பாதுகாப்பதில் இருந்து விலகிச் செல்லக் கூடாது, என்று அவர் கூறினார்.

ஆர்எம்42 மில்லியன் எஸ்ஆர்சி இன்டர்நேஷனல் எஸ்டிஎன் பிஎச்டி நிதி முறைகேடு வழக்கில் குற்றவாளி என நிரூபிக்கப்பட்டதைத் தொடர்ந்து, 73 வயதான நஜிப், 2022 ஆகஸ்ட் 23 முதல் காஜாங் சிறையில் அடைக்கப்பட்டு தண்டனை அனுபவித்து வருகிறார்.

செப்டம்பர் 18 அன்று, மாமன்னர் சுல்தான் இப்ராகிம், நஜிப்பிற்கு நிபந்தனையுடனான மன்னிப்பை வழங்கினார். இதன் மூலம், அவர் எஸ்ஆர்சி இன்டர்நேஷனல் வழக்கில் தனது மீதமுள்ள சிறைத்தண்டனையை 2028 ஆகஸ்ட் 23 வரை வீட்டுக்காவலில் அனுபவிக்க அனுமதிக்கப்படுகிறார். இருப்பினும், இது ஆர்எம்50 மில்லியன் அபராதத்தைச் செலுத்துவதற்கும், நிர்ணயிக்கப்பட்ட நிபந்தனைகளுக்குக் கட்டுப்படுவதற்கும் உட்பட்டதாகும்.

இந்நிகழ்வில் மலேசிய முஸ்லிம் இளைஞர் இயக்கம், மலேசிய இஸ்லாமிய தஃவா சங்கம் மற்றும் மலேசிய தேசிய முஸ்லிம் மாணவர் சங்கம் ஆகியவற்றின் 2,000-க்கும் மேற்பட்ட உறுப்பினர்கள் கலந்துகொண்டனர்.

 

 

 

 

-fmt