முன்னாள் பிரதமர் நஜிப் ரசாக்கிற்கான நிதி திரட்டும் பிரச்சாரத்தை விமர்சித்த மலாயாப் பல்கலைக்கழக  மாணவிக்கு ‘தேசிய மாணவர் சின்னம்’ என்ற அங்கீகாரம் வழங்கப்பட வேண்டும் என்று ஆளும் கட்சிப் பின்வரிசை நாடாளுமன்ற உறுப்பினர் ஒருவர் வலியுறுத்தியுள்ளார்.

ஊழலுக்கு எதிராகத் துணிச்சலுடன் குரல் கொடுத்ததற்காகப் பொருளாதாரத் துறை இளங்கலை மாணவி உம்மி உமைரா பகித் அங்கீகாரத்திற்குத் தகுதியானவர் என்று ஆர்.எஸ்.என் ராயர் கூறினார்.

அவரை ஒரு தேசிய மாணவர் ஆளுமையாக அங்கீகரிக்க வேண்டும் என்று நான் கேட்டுக்கொள்கிறேன், என இன்று மக்களவையில் உயர்கல்வி அமைச்சின் 2027-ஆம் ஆண்டு வரவுசெலவுத் திட்டத்தின் குழு நிலை விவாதத்தின் போது அவர் தெரிவித்தார்.

கோலாலம்பூரில் நடைபெற்ற சர்வதேச இளம் எதிர்காலத் தலைவர்கள் உச்சிமாநாட்டில் அரசியல் தலைவர்களுடனான கலந்துரையாடலின் போது, நஜிப்பின் 50 மில்லியன் ரிங்கிட் அபராதத்தைச் செலுத்துவதற்காக நிதி திரட்டும் பிரச்சாரத்தைக் கேள்விக்குள்ளாக்கியதன் மூலம் 23 வயதான உம்மி கடந்த மாதம் தலைப்புச் செய்திகளில் இடம்பிடித்தார்.

இந்த நன்கொடைகளைத் தான் கண்டதிலேயே மிகவும் முட்டாள்தனமான செயல் என்று அவர் வர்ணித்திருந்தது, பாராட்டுகளையும் விமர்சனங்களையும் ஒருசேரப் பெற்றது.

இதனைத் தொடர்ந்து தனக்கு இணையவழி மிரட்டல்கள் வந்ததாகவும், துன்புறுத்தலுக்கு ஆளானதாகவும் பின்னர் தெரிவித்த அவர், தனது கருத்துகளுக்காக மன்னிப்பு கேட்க மறுத்துவிட்டார்.

மாணவர்களுக்குக் கல்வித் தகுதிகளை வழங்குவதோடு மட்டும் பல்கலைக்கழகங்கள் நின்றுவிடக் கூடாது என்று ராயர் கூறினார். ஊழல், அதிகார துஷ்பிரயோகம் மற்றும் நேர்மையின்மை ஆகியவற்றுக்கு எதிராகக் குரல் கொடுக்கத் தயாராக இருக்கும் நேர்மையான பட்டதாரிகளையும் அவை உருவாக்க வேண்டும் என்று அவர் தெரிவித்தார்.

இதற்குப் பதிலளித்த உயர்கல்வி அமைச்சர் ஜாம்ப்ரி அப்துல் காதிர் மாணவர் தலைமைத்துவத்தை ஊக்குவிப்பதற்காகவும், இளைஞர்கள் தங்கள் கருத்துகளை வெளிப்படுத்த ஒரு தளத்தை வழங்குவதற்காகவும் அமைச்சின் பங்களிப்புடன் உம்மி பேசிய அந்த மன்றம் ஏற்பாடு செய்யப்பட்டதாகத் தெரிவித்தார்.

துணிச்சலுடன் முன்வந்து பேசக்கூடிய அதிகமான மாணவர் தலைவர்களைக் காணத் தான் விரும்புவதாகக் கூறிய அவர், அதே வேளையில் அவர்களின் கருத்துகள் உண்மைகளின் அடிப்படையில் அமைந்திருக்க வேண்டும் என்றும், பொறுப்புடனும் மரியாதையுடனும் வெளிப்படுத்தப்பட வேண்டும் என்றும் வலியுறுத்தினார்.

உம்மிக்கு ஏதேனும் அங்கீகாரம் வழங்கப்படுமா என்பது குறித்து ஜாம்ப்ரி எதுவும் தெரிவிக்கவில்லை.

இதனிடையே, மன அழுத்தத்திற்கு உள்ளாக்கப்படுவதாகக் கூறப்படும் விரிவுரையாளர்களுக்கு ஆதரவாகக் குரல் கொடுத்ததைத் தொடர்ந்து, தானும் தனது சகாக்கள் சிலரும் மலாக்காவில் உள்ள ஒரு தொழில்நுட்பப் பல்கலைக்கழகத்திற்குள் நுழையத் தடை விதிக்கப்பட்டதாக மாஸ் எர்மியாத்தி சம்சுதீன் குற்றம் சாட்டினார்.

அழுத்தத்திற்கு உள்ளாக்கப்பட்ட விரிவுரையாளர்களின் அவலநிலை குறித்து நாங்கள் கவலை தெரிவித்ததால், எனக்கும் எனது சகாக்கள் பலருக்கும் பல்கலைக்கழகத்திற்குள் நுழையத் தடை விதிக்கப்பட்டது, என்று அவர் கூறினார்.

விரிவுரையாளர்கள் தொடர்ந்து அழுத்தத்தை எதிர்கொண்டு வருவதாகக் குற்றம் சாட்டிய அவர், நாட்டின் தலைமைத்துவத்துடன் தங்களுக்கு உள்ள தொடர்புகள் காரணமாகத் தாங்கள் விமர்சனத்திற்கு அப்பாற்பட்டவர்கள் என்று பல்கலைக்கழகத் தலைவர்கள் நினைக்கிறார்களா என்றும் கேள்வி எழுப்பினார்.

அவர் அப்பல்கலைக்கழகத்தின் பெயரைக் குறிப்பிடவில்லை.

2025 செப்டம்பரில், விரிவுரையாளர்கள் தொடர்பான மிரட்டல் மற்றும் பகடிவதை  குற்றச்சாட்டுகளை மலாக்கா தொழில்நுட்பப் பல்கலைக்கழகம் மறுத்தது.

புதிய செயல்திறன் விதிமுறைகளை எதிர்த்த கல்விசார் ஊழியர்கள் மீது எந்தவொரு ஒழுங்கு நடவடிக்கையும் எடுக்கப்படவில்லை என்றும் அது தெரிவித்திருந்தது.

 

 

 

-fmt