அட்டர்னி ஜெனரல் துசுகி முக்தார், நஜீப் அப்துல் ரசாக்கின் வீட்டுக் காவல் உத்தரவு தொடர்பான அதிகாரப்பூர்வ நீதித்துறை ஆவணங்களில் பிழைகள் இருந்திருக்கக் கூடாது என்று வலியுறுத்தினார்.
எஸ்.ஆர்.சி இன்டர்நேஷனல் (SRC International) ஊழல் வழக்கில் முன்னாள் பிரதமரின் தண்டனை தொடர்பான கோலாலம்பூர் உயர் நீதிமன்றத்தின் விடுவிப்பு உத்தரவு (Order of Discharge) ஆவணத்தில் “தெளிவான” தவறுகள் இருந்ததாக துசுகி சுட்டிக்காட்டினார்.
“சம்பந்தப்பட்ட தரப்பினர் தீர்க்கமாக செயல்பட்டிருந்தால் இது நடந்திருக்காது. இந்தத் தவறு மிகத் தெளிவானது மற்றும் தேவையில்லாத பிரச்சினைகளை ஏற்படுத்தியுள்ளது,” என்று பெரிட்டா ஹாரியான் (Berita Harian) செய்தி அறிக்கை குறிப்பிட்டவாறு அவர் கூறினார்.
இருப்பினும், தான் எந்தக் குறிப்பிட்ட பிழையைக் குறிப்பிடுகிறேன் என்பது குறித்து துசுகி விரிவாக விளக்கவில்லை.
நஜீப் தனது 50 மில்லியன் ரிங்கிட் அபராதத்தைச் செலுத்தியவுடன் அவரை உடனடியாக விடுதலை செய்ய உயர் நீதிமன்றம் உத்தரவிட்டதை அடுத்து இந்த சர்ச்சை எழுந்தது.
இருப்பினும், அவருக்கு வழங்கப்பட்ட நிபந்தனை அடிப்படையிலான மன்னிப்பின் படி, ஆகஸ்ட் 23, 2028 வரை அவர் தனது மீதமுள்ள தண்டனையை வீட்டுக் காவலில் அனுபவிக்க வேண்டும் என்றும் நீதிமன்றம் தீர்ப்பளித்தது.
இது அட்டர்னி ஜெனரல் சேம்பர்ஸ் (AGC) இந்த உத்தரவை அமல்படுத்துவதை தற்காலிகமாக நிறுத்தி வைக்க வழிவகுத்தது. மேலும், இந்த நடவடிக்கை பேரரசரின் (Yang di-Pertuan Agong) உத்தரவை மீறும் அபாயத்தைக் கொண்டுள்ளதாக இஸ்தானா நெகாரா (Istana Negara) உட்பட பல்வேறு தரப்பிலிருந்தும் விமர்சனங்களை ஈர்த்தது.
ஆனால், AGC இதனை மறுத்துள்ளதோடு, நஜீப்பின் உரிமைகள் பாதுகாப்படுவதை உறுதி செய்வதற்கே இந்த நடவடிக்கை எடுக்கப்பட்டது என்றும் வலியுறுத்தியுள்ளது.
நஜீப்பின் நிபந்தனை மன்னிப்பில் உள்ள சட்ட சிக்கல்கள், குறிப்பாக அவரது தனிப்பட்ட 1MDB தண்டனையில் அதன் தாக்கம் குறித்து பேரரசரிடம் விளக்குவதற்காக, அந்த அமைப்பு பேரரசரைச் சந்திக்க அனுமதி கோரும் என்று நவம்பர் 7 அன்று செய்தி வெளியானது.
