சரவாக்கிலிருந்து சிலாங்கூருக்கு உயிருள்ள பன்றிகளை இறக்குமதி செய்வதற்கு 2025 ஜூலை மாதம் முதல் கடுமையான நிபந்தனைகளுடன் அனுமதி வழங்கப்பட்டுள்ளதாக விவசாயம் மற்றும் உணவுப் பாதுகாப்புத் துணை அமைச்சர் சான் பூங் ஹின் தெரிவித்தார்.

ஜூலை மாதம் முதல் கூச்சிங்கிலிருந்து போர்ட் கிளாங் வழியாக ஒவ்வொரு வாரமும் உயிருள்ள பன்றிகள் கொண்டுவரப்படுவதாகக் கூறப்படும் குற்றச்சாட்டுகள் குறித்து அவர் பதிலளித்தபோது, இந்த விவகாரம் புதிதானது அல்ல என்று குறிப்பிட்டார்.

“இத்தகைய குற்றச்சாட்டுகள் முன்வைக்கப்படும்போது, அவை உண்மைகள் மற்றும் ஆதாரங்களின் அடிப்படையில் இருக்க வேண்டும்,” என்று அவர் இன்று வெளியிட்ட அறிக்கையில் தெரிவித்தார்.

சரவாக் உணவுத் தொழில், மூலப்பொருட்கள் மற்றும் பிராந்திய மேம்பாட்டு அமைச்சர் ஸ்டீபன் ருண்டி உத்தோம்(Stephen Rundi Utom), விவசாயம் மற்றும் உணவுப் பாதுகாப்பு அமைச்சர் முகமது சாபு உள்ளிட்ட முக்கியத் தலைவர்கள், இதுகுறித்து ஏற்கெனவே நாடாளுமன்றத்தில் விளக்கம் அளித்துள்ளதாகவும் சான் குறிப்பிட்டார்.

அங்கீகரிக்கப்பட்ட உரிமங்களின் அடிப்படையில் மட்டுமே இந்த இறக்குமதிக்கு அனுமதி வழங்கப்படுவதாகவும், கடுமையான கட்டுப்பாட்டு நடைமுறைகள் பின்பற்றப்படுவதாகவும் அவர் விளக்கினார். இறக்குமதி செய்யப்படும் பன்றிகள், வேறு எந்த இடத்திலும் நிறுத்தப்படாமல் நேரடியாக ராவாங்கில் உள்ள இறைச்சிக் கூடத்திற்குக் கொண்டு செல்லப்பட வேண்டும்.

ஆப்பிரிக்க பன்றிக் காய்ச்சல் (ASF) பரவலால் பன்றிப் பண்ணைத் தொழிலில் ஏற்பட்ட பாதிப்புகளைத் தொடர்ந்து, சந்தையில் விநியோகத்தையும் விலைகளையும் நிலைப்படுத்த உதவும் நடவடிக்கைகளில் இதுவும் ஒன்றாகும்.

“போர்ட் கிளாங்கில் கால்நடைகளைக் கையாளும் பணிகள் கட்டுப்பாட்டுடனும் ஒழுங்குடனும் நடைபெறுவதை உறுதிசெய்ய, ஆரம்பத்திலிருந்தே கடுமையான நிலையான செயல்பாட்டு நடைமுறைகள் (SOP) வகுக்கப்பட்டுள்ளதாகவும் எனக்குத் தெரிவிக்கப்பட்டுள்ளது,” என்று அவர் கூறினார்.

போர்ட் கிளாங்கில் பன்றிகளைக் கையாள்வதற்கான கடுமையான நடைமுறைகள்

சான் பூங் ஹின்

மேலும் விளக்கமளித்த சான், உயிருள்ள பன்றிகளை இரவு 8 மணி முதல் அதிகாலை 5 மணி வரை மட்டுமே இறக்க அனுமதிக்கப்படுவதாகக் கூறினார்.

இதற்காகச் சிறப்புப் பெட்டிகள் பயன்படுத்தப்படுகின்றன. பின்னர் பன்றிகள் நேரடியாக லாரிகளில் ஏற்றப்பட்டு ராவாங்கில் உள்ள இறைச்சிக் கூடத்திற்குக் கொண்டு செல்லப்படுகின்றன.

இந்த நடைமுறையின் நோக்கம், துறைமுகத்தில் கால்நடைகளைக் கையாளும் நேரத்தைக் குறைப்பதுடன், தொற்றுப் பரவும் அபாயத்தையும் சுற்றுச்சூழலுக்கு ஏற்படக்கூடிய பாதிப்புகளையும் குறைப்பதாகும் என்று அவர் தெரிவித்தார்.

இந்த நடவடிக்கையால் துறைமுகத்தின் சுகாதாரமும் தூய்மையும் பாதிக்கப்படுவதாகக் கூறப்படும் குற்றச்சாட்டுகள், நடைமுறையில் உள்ள SOP மற்றும் நம்பகமான ஆதாரங்களை ஆய்வு செய்யாமல் முன்வைக்கப்படக் கூடாது என்றும் அவர் கூறினார்.

தவறான தகவல்களால் அரசியலாக்கப்படுகிறது

கடந்த ஏப்ரல் மாதம், சான் சரவாக்கின் சிமுன்ஜானில் உள்ள நவீன பன்றிப் பண்ணை ஒன்றுக்குச் சென்றதாகவும் தெரிவித்தார். அங்கு பண்ணையின் செயல்பாடுகள் மற்றும் சிங்கப்பூர், சிலாங்கூர் ஆகிய இடங்களுக்கு உயிருள்ள பன்றிகளை ஏற்றுமதி செய்யும் நடைமுறைகள் குறித்து அவர் பார்வையிட்டார்.

அந்தப் பயணத்தின்போது, குறிப்பிட்ட தரநிலைகளைப் பூர்த்தி செய்யும் கால்நடைப் போக்குவரத்துக் கப்பல்களைப் பயன்படுத்துவது உள்ளிட்ட உயிரியல் பாதுகாப்பு நடவடிக்கைகளை நேரில் பார்வையிட்டதாக அவர் கூறினார்.

“உண்மையான நிலவரத்தை ஆராயாமல் குற்றச்சாட்டுகளும் புகார்களும் முன்வைக்கப்படுவதை நான் மிகவும் வருத்தத்துடன் பார்க்கிறேன். சிலாங்கூர் சுல்தானின் உத்தரவுடன் இந்த விவகாரத்தைத் தொடர்புபடுத்தி, தவறான தகவல்களின் மூலம் அரசியலாக்கும் முயற்சிகளும் இடம்பெறுகின்றன,” என்று அவர் தெரிவித்தார்.

இதற்கு முன்னதாக, போர்ட் கிளாங் பகுதி மீனவர் சங்கத் தலைவர் அப்துல் ரஹ்மான் காச்சில், கடந்த ஜூலை மாதம் முதல் ஒவ்வொரு வாரமும் சரவாக்கின் கூச்சிங்கிலிருந்து சுமார் 800 உயிருள்ள பன்றிகள் கொண்டுவரப்படுவதாகக் கூறியிருந்தார்.

ஊடகச் செய்தியின்படி, அந்தப் பன்றிகள் கப்பல் மூலம் போர்ட் கிளாங்கிற்கு வந்து, பின்னர் இறைச்சிக் கூடமாக இருக்கலாம் என நம்பப்படும் ஓர் இடத்திற்குக் கொண்டு செல்லப்பட்டுள்ளன.

இதையடுத்து, சிலாங்கூர் பாஸ் இளைஞர் பிரிவு நேற்று மாநில அரசாங்கம் உடனடியாக நடவடிக்கை எடுக்க வேண்டும் என்று வலியுறுத்தியது. சிலாங்கூரில் பன்றிப் பண்ணை நடவடிக்கைகள் இருக்கக் கூடாது என்ற மாநில ஆட்சியாளரின் முந்தைய உத்தரவுடன் இந்த நடவடிக்கை ஒத்துப்போகிறதா என்றும் அது கேள்வி எழுப்பியது.

அந்தப் பிரிவின் துணைத் தலைவர் ஃபைஸுதீன் ஸாய், சுற்றுச்சூழல் மாசுபாடு, பொதுச் சுகாதாரம் மற்றும் போர்ட் கிளாங் பகுதியைச் சுற்றியுள்ள மீனவ சமூகத்தின் வாழ்வாதாரத்தின் மீதான தாக்கங்கள் குறித்து கவலை தெரிவித்தார்.

பன்றிப் பண்ணைகளுக்கு இனி அனுமதி இல்லை

ஜனவரி 10ஆம் தேதி, சிலாங்கூர் சுல்தான் ஷராஃபுதீன் இத்ரிஸ் ஷா, காற்று, மண் மற்றும் நீர் மாசுபாட்டால் மக்களின் நலன் பாதிக்கப்படலாம் என்ற கவலையின் காரணமாக, மாநிலத்தில் எந்தவொரு பன்றிப் பண்ணை நடவடிக்கைக்கும் தாம் ஒப்புதல் வழங்கப் போவதில்லை என்று அறிவித்திருந்தார்.

சீன சமூகத்தினர் உள்ளிட்ட முஸ்லிம் அல்லாத மக்களின் தேவைகளைப் பூர்த்தி செய்வதற்காக, பன்றி இறைச்சியை வெளிநாடுகளிலிருந்து இறக்குமதி செய்யலாம் என்றும் அவர் பரிந்துரைத்திருந்தார்.

சிலாங்கூர் மாநில முதல்வர் அமிருடின் ஷாரி, பிப்ரவரி மாதத்தில் வெளியிட்ட அறிக்கையில், மாநில ஆட்சியாளரின் உத்தரவுக்கு ஏற்ப, பன்றிப் பண்ணைகளுக்கான உரிமங்களை வழங்குவதை மாநில அரசு நிறுத்திவிட்டதாகவும், ஏற்கெனவே செயல்பட்டு வரும் பண்ணைகளை விரைவாக மூட நடவடிக்கை எடுக்கப்படும் என்றும் தெரிவித்திருந்தார்.

மாநில அரசு விசாரணை நடத்தும்

இந்த விவகாரம் மீண்டும் சர்ச்சையாகியுள்ள நிலையில், பன்றிகள் ஏற்றுமதி அல்லது இறக்குமதி செய்யப்படுவதன் நோக்கம் என்ன, இதில் சம்பந்தப்பட்டவர்கள் யார் என்பதைக் கண்டறிய விசாரணை நடத்தப்படும் என்று அமிருடின் தெரிவித்தார்.

ஊடகச் செய்திகளின்படி, கொண்டுவரப்படும் பன்றிகளில் ஒரு பகுதி, சிலாங்கூரை நுழைவுப் பாதையாகப் பயன்படுத்தி மற்ற மாநிலங்களுக்குக் கொண்டு செல்லப்படுவதாக நம்பப்படுவதாக அவர் கூறினார்.

இந்த விவகாரம் குறித்து முழுமையாக ஆய்வு செய்த பின்னரே, அடுத்தகட்ட நடவடிக்கைகள் தீர்மானிக்கப்படும் என்றும் மாநில அரசு தெரிவித்துள்ளது.