பள்ளி மாணவர்களின் பாதுகாப்பு மற்றும் நல்வாழ்வு குறித்த கவலைகள் அதிகரித்து வரும் நிலையில், பள்ளிகளில் நடக்கும் வன்முறைக்கு எதிராக கடுமையான நடவடிக்கை எடுக்குமாறு கல்வி அமைச்சகத்திற்கு பிரதமர் அன்வார் இப்ராகிம் உத்தரவிட்டுள்ளார்.

தற்கொலை, துஷ்பிரயோகம் மற்றும் வன்முறையில் ஈடுபடுவதும் உள்ளிட்ட குழந்தைகள் சம்பந்தப்பட்ட வழக்குகள், சிறுவயதிலிருந்தே ஒழுக்க வளர்ச்சி மற்றும் நெறிமுறை விழுமியங்களை வலுப்படுத்த வேண்டியதன் அவசியத்தை அடிக்கோடிட்டுக் காட்டுவதாக அவர் கூறினார். கல்விச் சிறப்பு மட்டுமே போதுமானதல்ல என்றும், மாணவர்களிடம் நல்ல நடத்தை, மரியாதை மற்றும் பொறுப்புணர்வு ஆகியவையும் வளர்க்கப்பட வேண்டும் என்றும் அவர் குறிப்பிட்டார்.

வன்முறையில் ஈடுபடுவதும் மற்றவர்களை அவமதிப்பதும் நமது கல்வி முறையில் விழுமியங்களையும் முறையான நடத்தையையும் புகட்டுவதில் இன்னும் குறைபாடுகள் உள்ளதையே காட்டுகின்றன, என்று அவர் கூறினார்.

கல்வி அமைச்சகம் உறுதியாகவும் தீர்க்கமான முறையிலும் நடவடிக்கை எடுக்க உத்தரவிடப்பட்டுள்ளது. ஆசிரியர்களும் கல்வியாளர்களும் நமது குழந்தைகளைப் பாதுகாப்பதில் உதவ வேண்டும், என்று ஒரு தொழில்முனைவோர் திட்டத் தொடக்க விழாவில் அவர் கூறினார்.

குர்ஆனின் போதனைகளைப் புரிந்துகொண்டு பின்பற்றுதல், தொழுகை செய்தல் மற்றும் பெற்றோர், ஆசிரியர்கள், சக நண்பர்களை மதித்தல் உள்ளிட்ட மதக் கல்வியின் முக்கியத்துவத்தையும் அன்வர் வலியுறுத்தினார். போதைப்பொருள் பயன்பாடு மற்றும் குற்றங்கள் போன்ற சமூகப் பிரச்சினைகளுக்குத் தீர்வு காண, இளைஞர்கள் ஆரோக்கியமான சூழலில் வளர்வதை உறுதி செய்யும் ஒரு விரிவான அணுகுமுறை தேவை என்றும் அவர் குறிப்பிட்டார்.

பாரம்பரிய இஸ்லாமிய மதப் பள்ளிகள் முதல் பல்கலைக்கழகம் வரை

அரசு பாரம்பரிய இஸ்லாமிய மதப் பள்ளிகள் பல்கலைக்கழக நிலை வரை உயர்கல்வியைத் தொடர்வதற்கான வாய்ப்புகளை உருவாக்குவதில் உறுதியாக இருப்பதாக அன்வார் கூறினார்.

இந்த நிறுவனங்கள் ஓரங்கட்டப்படாமல், அதற்குப் பதிலாக அங்கீகரிக்கப்பட்டு வலுப்படுத்தப்படுவதை உறுதி செய்ய இந்நடவடிக்கை முக்கியமானது என்றும், இதன் மூலம் இம்மாணவர்கள் தங்களின் இஸ்லாமிய கல்வி அடித்தளங்களை சமரசம் செய்யாமல் தேசிய வளர்ச்சியின் வேகத்திற்கு ஏற்ப முன்னேற முடியும்.

இதனைச் சாத்தியமாக்குவதற்கான திட்ட முன்மொழிவுகளை உருவாக்குமாறு பல இஸ்லாமிய அறிஞர்களிடம் பொறுப்பு ஒப்படைக்கப்பட்டுள்ளது, என்று இங்குள்ள லுபுக் தபாவில் உள்ள ஒரு மதரஸாவில் தொழுகைக்குப் பிறகு அவர் கூறினார்.

மத விழுமியங்கள், அடையாளம் மற்றும் தேசிய நல்லிணக்கத்தைப் பாதுகாப்பதில் பொன்டோக் பள்ளிகள் முக்கியப் பங்கு வகிப்பதாக அவர் தெரிவித்தார்.

 

 

-fmt