முன்னதாக, வாகனங்கள் வடக்கு-தெற்கு விரைவுச்சாலையின் மத்திய இணைப்புச் சாலை (North-South Expressway Central Link) வழியாக விரைவுச்சாலையிலிருந்து திருப்பிவிடப்பட்டன.

ஷா ஆலாம் பகுதியில் உள்ள புதிய கிள்ளான் பள்ளத்தாக்கு விரைவுச்சாலையின் (NKVE) வெள்ளத்தால் பாதிக்கப்பட்ட பகுதிகள்.

ஷா ஆலாம் மற்றும் செட்டியா ஆலாம் இடையிலான புதிய கிள்ளான் பள்ளத்தாக்கு விரைவுச்சாலையின் (NKVE) இரு திசைகளிலும், கிலோமீட்டர் 8.7 முதல் 9.3 வரையிலான பகுதிகளில் இன்று அதிகாலை ஏற்பட்ட திடீர் வெள்ளம் காரணமாக மூடப்பட்டிருந்த சாலைகள், தற்போது அனைத்து வாகனப் போக்குவரத்துக்கும் மீண்டும் திறக்கப்பட்டுள்ளன.

வெள்ளப்பெருக்கின்போது, சுபாங்கிலிருந்து ஷா ஆலாம் நோக்கி தெற்கு திசையில் பயணித்த வாகனங்கள், வடக்கு-தெற்கு விரைவுச்சாலையின் மத்திய இணைப்புப் பாதையான எலைட் (ELITE) வழியாகத் திருப்பிவிடப்பட்டதாக PLUS Malaysia Berhad (PLUS) தெரிவித்துள்ளது என பெர்னாமா செய்தி வெளியிட்டுள்ளது.

அதேவேளை, புக்கிட் ராஜாவிலிருந்து சுபாங் நோக்கி வடக்கு திசையில் பயணித்த வாகனங்கள், செட்டியா ஆலாம் சந்திப்பில் திருப்பிவிடப்பட்டன. செட்டியா ஆலாமிலிருந்து வந்த வாகனங்கள் புக்கிட் ராஜா நோக்கித் திருப்பிவிடப்பட்டன என்றும் தெரிவிக்கப்பட்டது.

நெடுஞ்சாலையைப் பயன்படுத்துவோர், அண்மைய போக்குவரத்துத் தகவல்களை அறிந்துகொள்ள PLUS நிறுவனத்தின் அதிகாரப்பூர்வ X தளமான @PLUSTrafik மற்றும் அதன் அதிகாரப்பூர்வ சமூக ஊடகப் பக்கங்களைப் பார்வையிடுமாறு கேட்டுக்கொள்ளப்படுகின்றனர்.

மேலும், PLUSLine சேவையை 1-800-88-0000 என்ற தொலைபேசி எண்ணில் தொடர்புகொள்ளலாம்.