சூதாட்ட  மன்னர்  எனக் கூறப்படும்  பால்  புவாவுக்குப் பரிந்து உள்துறை  அமைச்சர்  அமெரிக்கப்  புலனாய்வுத்  துறை(எப்பிஐ)க்கு  எழுதிய  கடிதத்துக்கு மேலும்  கண்டனம்  தெரிவிக்கப்பட்டுள்ளது.

அக்கடிதம்  எழுதியது  ஒரு தவறான  செயல்  அல்லவென்று  கடந்த வாரம்   கூறிய   அஹ்மட் ஜாஹிட்  ஹமிடி, அதிகாரத்துவ  இரகசியச்  சட்டத்தைச்  சுட்டிக்காட்டி  அது பற்றி  மேலும்  விளக்கமளிக்க  மறுத்ததுடன்  “எதிரணி-ஆதரவு  வலைத்தளங்கள்”தான்  அதைப்  பெரிதுபடுத்திவிட்டன  என்றும் குறைகூறி  இருந்தார்.

கடிதம்  பற்றிக் கருத்துத்துரைக்க  விரும்பாமல்  இப்போதைய  போலீஸ்  படைத்  தலைவர்  காலிட்  அபு  பக்கார்    மவுனம் காக்கும்  வேளையில்  முன்னாள்  போலீஸ்  படைத்  தலைவர்  அப்துல்  ரஹிம்  நூர்  அது  பற்றிக்  கருத்துரைத்துள்ளார்.

அமெரிக்காவில்  வழக்கை   எதிர்நோக்கும்   ஒரு  மலேசியரான  புவா-வின்  நிலையைத்  தெளிவுப்படுத்தத்தான்  அக்கடிதம்  எழுதப்பட்டது  என்றாலும்கூட  ஜாஹிட்  அதை  எழுதியிருக்கக்  கூடாது  என்று  ரஹிம்  குறிப்பிட்டார்.

புவா  14கே  இரகசியக்  கும்பல்  உறுப்பினரா  என்பதை  விளக்குமாறு  புவாவின்  வழக்குரைஞர்கள்  மலேசியாவைக் கேட்டுக்  கொண்டிருந்தாலும்  போலீஸ்  கூட  அப்படிப்பட்ட  ஒரு  கடிதத்தை  எழுத  வேண்டிய  அவசியமில்லை.

“அமைச்சர்  அதில்  சம்பந்தப்பட்டிருக்கக்  கூடாது.  போலீசும்கூட  சம்பந்தப்பட  வேண்டியதில்லை.

“அமைச்சரைப்   பிரதிநிதிக்காமல்  ஒரு  வழக்குரைஞர்  அதை  எழுதியிருந்தாலே  போதுமானது”, என்று ரஹிம்  கூறியதாக  சினார்  ஹரியான்  அறிவித்துள்ளது.

மேலும்  கருத்துரைத்த  ரஹிம், புவா தேசிய  பாதுகாப்பு விவகாரங்களில்  சம்பந்தப்பட்டிருந்தாரா  என்பதை  ஜாஹிட்  வெளியிட்டிருக்க வேண்டிய  அவசியமில்லை  என்றும்   தெரிவித்தார்.

மலேசியாவில்  14கே  இரகசியக்  கும்பல்  செயல்படுகிறதா, புவா  அதில்  உறுப்பினரா  என்பதற்கு  மட்டுமே  பதில்  அளித்திருக்க  வேண்டும்.

“புவா  தேசிய  பாதுகாப்பு  விவகாரங்களில்  ஒத்துழைத்தாரா  என்று  கேட்கப்பட்டிருந்தால்கூட  அதற்குப்  பதில் அளித்திருக்கக்  கூடாது.  ஏனென்றால்  அது  அமெரிக்காவுக்கு  அவசியமில்லாதது”, என்று ரஹிம்  கூறினார்.