பிரதமர் நஜிப் அப்துல் ரசாக்கின் நிர்வாகம் “பிரச்னைகளும் குறைபாடுகளும் நிரம்பியது” என்பதால் அவரின் ஒரு மாதச் சம்பளம் பிடித்தம் செய்யப்பட வேண்டும் என்று கோரும் தீர்மானம் ஒன்றை மாற்றரசு நாடாளுமன்ற உறுப்பினர் தியான் சுவா பதிவு செய்துள்ளார்.
அக்டோபர் 27-இல் சமர்பிக்கப்பட்ட அத்தீர்மானம் நாளைக் காலை மணி 11.30க்குக் கேள்வி நேரத்துக்குப் பின்னர் விவாதிக்கப்படும் என்று தெரிகிறது.
இன்று நாடாளுமன்ற வளாகத்தில் செய்தியாளர்களிடம் பேசிய தியான் சுவா (பிகேஆர்-பத்து), நஜிப்பின் ஒரு மாதச் சம்பளத்தை நிறுத்தி வைக்க வேண்டும் என்றார்.
“2009-இல் நஜிப் பதவி ஏற்றதிலிருந்து பல பிரச்னைகள், பல விவகாரங்கள் தலைதூக்கித் தீர்வுகாணப்படாமல் இருக்கின்றன”, என்றாரவர்.
“இது, மறைமுகமாக பிரதமரின் தலைமைத்துவம் நிர்வாகம் ஆகியவற்றின்மீது கொண்டுவரப்படும் நம்பிக்கை இல்லாத் தீர்மானம் போன்றதுதான்”, என்று தியான் சுவா குறிப்பிட்டார்.
