முறையான அனுமதியின்றி கட்டப்பட்டதாகக் கூறப்படும் இந்து கோவில்களை இடிப்பதற்கு அரசாங்கம் ஆறு மாத கால இடைக்காலத் தடையை (moratorium) விதிக்க வேண்டும் என்று தேசிய இந்து கோவில் வழிநடத்தல் குழு கோரிக்கை விடுத்துள்ளது.

இன்று முதன்முறையாகக் கூடிய இக்குழு, இந்தத் தற்காலிக நிறுத்தம் முறையான சரிபார்ப்பு, கலந்தாலோசனை மற்றும் தீர்வுகளைக் கண்டறிய உதவும் என்றும், இது தேவையற்ற பதற்றத்தைத் தவிர்த்து முறையான நிர்வாகத்தை உறுதி செய்யும் என்றும் தெரிவித்தது.

கோவிலை அகற்றுவது தவிர்க்க முடியாத பட்சத்தில், இடிப்பு நடவடிக்கைக்கு முன்னதாக, நிறுவப்பட்ட மத நடைமுறைகளின்படி தெய்வங்களை இடமாற்றம் செய்வதற்கான முறையான மதச் சடங்குகள் முதலில் நடத்தப்பட வேண்டும்.

இந்த செயல்முறைகள் மரியாதையுடனும் அமைதியுடனும் மேற்கொள்ளப்படுவதை உறுதி செய்ய, அதிகாரிகளுக்கு ஒருங்கிணைப்பு பணிகளில் உதவ குழு தயாராக உள்ளது,” என்று அந்த அறிக்கையில் கூறப்பட்டுள்ளது.

மலேசிய இந்து சங்கமும், மஇகாவும் இணைந்து மேற்கொண்ட முயற்சியின் மூலம், இந்து அரசு சாரா நிறுவனங்கள் மற்றும் சிவில் சமூகக் குழுக்களின் ஆதரவுடன் இக்குழு உருவாக்கப்பட்டது.

கோவில்கள் என்பவை வெறும் கட்டிடங்கள் மட்டுமல்ல, அவை சமூகத்தின் புனிதமான வழிபாட்டுத் தலங்கள் என்பதைக் கருத்தில் கொண்டு, அமலாக்க முகமைகள் கலாச்சார மற்றும் மத ரீதியான உணர்திறனுடன் செயல்பட வேண்டும் என்றும் இக்குழு வலியுறுத்தியது.

“பாதிக்கப்பட்ட கோவில்களுக்கு நடைமுறைச் சாத்தியமான தீர்வுகளைக் கண்டறியும் நோக்கில், ஆறு மாத காலத்திற்குள் முறையான கோவில் நில வரன்முறைப்படுத்தும் முயற்சியை மேற்கொள்ளப்போவதாக இக்குழு தெரிவித்தது.

இந்தச் செயல்முறையின் ஒரு பகுதியாக, கோவில்கள் அவற்றின் நிலம் மற்றும் நிர்வாக நிலை குறித்த தகவல்களைச் சமர்ப்பிக்க வேண்டும்.

சரிபார்க்கப்பட்ட தரவுகளின் அடிப்படையில், கோவில்கள் அவற்றின் சட்டபூர்வ நிலைக்கு ஏற்ப நான்கு பிரிவுகளாக வகைப்படுத்தப்படும்.

அதன்பிறகு, இக்குழு பாதிக்கப்பட்ட கோவில்களுக்கு நேரடியாகச் சென்று கலந்தாலோசனைகளை மேற்கொள்ளும்; மேலும், சட்டபூர்வமான மற்றும் ஆக்கபூர்வமான வழிகளில் சிக்கல்களைத் தீர்க்க சம்பந்தப்பட்ட தரப்பினர் மற்றும் அதிகாரிகளுடன் இணைந்து செயல்படும் என்று அந்த அறிக்கையில் மேலும் கூறப்பட்டுள்ளது.

நாடு முழுவதும் உள்ள இந்து கோவில்கள் நில உரிமை மற்றும் ஒழுங்குமுறை சவால்களை எதிர்கொள்வது குறித்த கவலைகள் அதிகரித்து வரும் நிலையில், இக்குழு தனது முதல் கூட்டத்தை இன்று நடத்தியுள்ளது.

இந்தக் கோவில்களில் பல நவீன திட்டமிடல் மற்றும் நில நிர்வாகக் கட்டமைப்புகள் உருவாவதற்கு முன்பே அமைக்கப்பட்டவை என்று அக்குழு கூறியது. இதன் விளைவாக ஏற்பட்டுள்ள சட்ட மற்றும் நிர்வாக சிக்கல்களுக்கு கவனமான, சட்டபூர்வமான மற்றும் மனிதாபிமான முறையிலான தீர்வு தேவைப்படுகிறது என்றும் அது குறிப்பிட்டது.

கடந்த வாரம் சிலாங்கூர் ரவாங்கில் ஒரு கோவிலின் ஒரு பகுதியை இடித்ததாகக் கூறப்படும் நான்கு பேரை போலீசார் கைது செய்தனர். அவர்களிடமிருந்து ஒரு மண் அள்ளும் இயந்திரம் பறிமுதல் செய்யப்பட்டது.

கோவில் நிர்வாகத்திடம் ஆலோசிக்காமலோ அல்லது உள்ளூர் அதிகாரிகளுக்குத் தெரிவிக்காமலோ சந்தேக நபர்கள் இச்செயலில் ஈடுபட்டது விசாரணையில் தெரியவந்துள்ளது.

-fmt