தாய்மொழி வழிக் கல்வி முறையைப் (vernacular school system) பாதுகாப்பதில் போட்டி போடும் கட்சிகளும் வேட்பாளர்களும் தெளிவான உறுதியை அளிக்க வேண்டும் என்று சீனக் கல்வியாளர் அமைப்புகள் விரும்புகின்றன.

அடுத்து வரவிருக்கும் இரண்டு மாநிலத் தேர்தல்களும், நாட்டின் அரசியல் சூழலையும் பன்முகக் கல்வி முறையின் (multi-stream schooling system) எதிர்காலத்தையும் தீர்மானிப்பதில் முக்கியப் பங்கு வகிக்கும் என்று தொங் ஜியாவ் சோங் (Dong Jiao Zong) தெரிவித்துள்ளது.

நாட்டின் இரு முக்கிய சீனக் கல்வி அமைப்புகள், வரவிருக்கும் ஜொகூர் (Johor) மற்றும் நெகிரி செம்பிலான் (Negeri Sembilan) மாநிலத் தேர்தல்களில் போட்டியிடும் வேட்பாளர்கள் தாய்மொழிப் பள்ளிகள் (vernacular schools) குறித்த தங்களது நிலைப்பாட்டைத் தெளிவுபடுத்த வேண்டும் என்று வலியுறுத்தியுள்ளன.

மலேசிய சீனப் பள்ளி வாரியங்களின் சங்கம் (டொங் சோங் – Dong Zong) மற்றும் மலேசிய சீனப் பள்ளி ஆசிரியர்களின் சங்கம் (ஜியாவ் சோங் – Jiao Zong) ஆகிய இரு அமைப்புகளும், போட்டியிடும் கட்சிகளும் வேட்பாளர்களும் தங்களின் தேர்தல் அறிக்கைகளை வெளியிடும்போது, தாய்மொழிக் கல்வி முறையைப் பாதுகாப்பதற்கான தெளிவான வாக்குறுதியை வழங்க வேண்டும் என்று கேட்டுக்கொண்டன.

கூட்டாக ‘தொங் ஜியாவ் சோங்’ (Dong Jiao Zong) என்று அழைக்கப்படும் இந்த இரு அமைப்புகளும், நாட்டின் பன்முகக் கல்வி முறையின் எதிர்காலத்தையும் அரசியல் சூழலையும் வடிவமைப்பதில் இந்த மாநிலத் தேர்தல்கள் மிக முக்கியப் பங்கு வகிக்கும் என்று தெரிவித்தன.

மலேசியாவின் பன்முகத்தன்மை கொண்ட கல்வி முறையைப் பாதுகாப்பதில் தெளிவான அர்ப்பணிப்பைக் காட்டும் வேட்பாளர்கள் மட்டுமே வாக்காளர்களின் ஆதரவிற்குத் தகுதியானவர்கள் என்று அவை கூறியதாக சின் சியூ (Sin Chew) நாளிதழ் செய்தி வெளியிட்டுள்ளது.

மேலும், அரசியல் மீது அதிருப்தி அடைந்துள்ள வாக்காளர்கள் தேர்தலைப் புறக்கணிக்க வேண்டாம் என்றும், வாக்களிப்பது அவர்களின் குடிமைக்கடமை மற்றும் பொறுப்பு என்றும் அவை வலியுறுத்தின.

“ஜொகூர் மற்றும் நெகிரி செம்பிலான் மாநில வாக்காளர்கள் தற்போதைய சூழ்நிலையில் திருப்தி இல்லை என்பதற்காகத் தங்கள் வாக்குரிமையை வீணடித்துவிடக் கூடாது”.

“அதற்குப் பதிலாக, அவர்கள் தங்களின் வாக்குகளைப் பயன்படுத்தி தாய்மொழிக் கல்வியையும் மலேசியாவின் பன்முகப் பண்பாட்டுப் பாரம்பரியத்தையும் பாதுகாக்க வேண்டும்; தங்களது குடிமைக்கடமையைச் சுறுசுறுப்புடன் நிறைவேற்ற வேண்டும்,” என்று அவை கூறியதாகக் குறிப்பிடப்பட்டுள்ளது.

அதே வேளையில், வேட்பாளர்கள் குறுகிய மற்றும் இனவாத அரசியல் பேச்சுகளைக் கைவிட்டு, மக்களுக்குப் பயனுள்ள மற்றும் நடைமுறையான கொள்கைகளில் கவனம் செலுத்த வேண்டும் என்றும் இந்த சங்கங்கள் கேட்டுக்கொண்டன.

சீனப் பள்ளி ஆர்வலர் குழுக்கள் அரசாங்கத்தின் அதிகாரப்பூர்வ அங்கீகாரத்தைப் பெற தொடர்ந்து அழுத்தம் கொடுத்து வருவதால், சீனத் தனியார் இடைநிலைப் பள்ளிகளின் இறுதித் தேர்வான ஒருங்கிணைந்த தேர்வுச் சான்றிதழ் (UEC) இன்னும் விவாதத்திற்குரிய ஒரு தலைப்பாகவே இருந்து வருகிறது.

கடந்த மே மாதம் பொது உயர் கல்வி நிறுவனங்களில் யு.இ.சி (UEC) பட்டதாரிகள் சேருவதற்கான புதிய வழிகளை அரசாங்கம் அறிவித்திருந்தாலும், இது யு.இ.சி-க்கான முழுமையான அங்கீகாரம் அல்ல என்று உயர் கல்வி அமைச்சு தெளிவுபடுத்தியிருந்தது.

அதே வேளையில், யு.இ.சி-யை அங்கீகரிப்பதற்கான சாத்தியக்கூறுகள் குறித்து 2018 முதல் 2020 வரை நடத்தப்பட்ட ஆய்வு அறிக்கை, ஜூலை மாத இறுதிக்குள் உயர் கல்வி அமைச்சர் சம்ரி அப்துல் காதிரிடம் (Zambry Abdul Kadir) சமர்ப்பிக்கப்பட உள்ளது.