உக்ரேனின் கிழக்குப் பகுதியில் ரஷ்யப் படைகள் வேகமாக முன்னேறி வருவதைத் தொடர்ந்து, ரஷ்யப் படைகளிடம் சிக்காமல் இருப்பதற்காக லுஹான்ஸ்க் பகுதியில் இருந்து உக்ரேனியப் படைகள் பின்வாங்க வேண்டியிருக்கும் என்று அதிகாரி ஒருவர் கூறியுள்ளார்.
அப்படி உக்ரேன் படைகள் அங்கிருந்து பின்வாங்கினால், உக் ரேனின் லுஹான்ஸ்க், டோனெட்ஸ்க் ஆகிய பகுதிகளை முழுமையாகக் கைப்பற்ற வேண்டும் என்ற ரஷ்ய அதிபர் விளாடிமிர் புட்டினின் இலக்கை ரஷ்யப் படைகள் எளிதில் அடைந்துவிடலாம்.
ஆனால் லுஹான்ஸ்க் நகர ஆளுநரான செர்ஹி கெய்டாயோவோ, தங்கள் பகுதியை ரஷ்யப் படைகளால் கைப்பற்ற முடியாது என்கிறார்.
அதேசமயம் டோன்பாஸ் நகரத்தின் சீவிரோடோனெட்ஸ்க் பகுதியில் ரஷ்யப் படைகள் நுழைந்துவிட்டதாகவும் அவர் கூறினார்,
ரஷ்யத் தாக்குதலில் லுஹான்ஸ்க் வட்டாரத்தில் கிட்டத்தட்ட 90 விழுக்காட்டுக் கட்டடங்கள் சேதமடைந்துவிட்டன.
10,000 ரஷ்யப் படையினர் கிழக்குப் பகுதியில் உள்ளதாகக் கூறப்படுகிறது.
டோன்பாஸ் பகுதியைக் கைப்பற்ற ரஷ்யா தன்னிடம் உள்ள அனைத்து படை பலத்தையும் பயன்படுத்துவதாக உக்ரேனிய அதிபர் ஸெலன்ஸ்கி சொன்னார். அங்கு நிலைமை மிகவும் மோசமாக உள்ளதாகவும் அவர் கூறினார்.
மரியபோல் எஃகு ஆலையில், சிக்கியிருந்த உக்ரேனிய வீரர்கள் பல வார பேச்சுவார்த்தைக்குப் பிறகு ரஷ்யாவிடம் சரணடைந்தது குறிப்பிடத்தக்கது.
இதற்கிடையே, டோனெட்ஸ்க் வட்டாரத்தில் உள்ள லைமன் நகரம் முழுமையாக தங்கள் கட்டுப்பாட்டிற்குள் வந்துவிட்டதாக ரஷ்யத் தற்காப்பு அமைச்சு சொன்னது.
லைமன் சிறிய நகரம் என்றாலும் உக்ரேனில் ரஷ்யப் படைகள் முன்னேறி வருவதை இது காட்டுவதாகக் கருதப்படுகிறது.
இந்நிலையில், உக்ரேனைப் பலப்படுத்த விரைந்து ஆயுத உதவி செய்யுமாறு பிரிட்டிஷ் பிரதமர் போரிஸ் ஜான்சனை, உக்ரேன் அதிபர் ஸெலன்ஸ்கி கேட்டுக் கொண்டுள்ளார்.
Tamilmurasu
