மலேசிய ஊழல் எதிர்ப்பு ஆணையம் (MACC) விசாரணையின்போது அல்லது குற்றச்சாட்டுகளுக்குப் பிறகு எடுக்கும் ஒவ்வொரு நடவடிக்கையும் சுதந்திரமான, வெளிப்படையான மற்றும் தொழில்முறை கொள்கைகளின் அடிப்படையில் சட்டத்தின் விதிகளின்படி இருக்கும் என்றும், அரசியல் காரணங்களுக்காக எந்தவொரு தனிநபருக்கும் அழுத்தம் கொடுப்பதை ஒருபோதும் நோக்கமாகக் கொண்டிருக்கவில்லை என்றும் உறுதிப்படுத்தியுள்ளது.

MACC தனது பெயரைக் களங்கப்படுத்தும் நோக்கில் வேண்டுமென்றே விசாரணையை இட்டுக்கட்டியதாக முன்னாள் அமைச்சர் ஒருவர் கூறியது குறித்து இன்று வெளியிட்டுள்ள அறிக்கையில், அந்த அறிக்கை முற்றிலும் உண்மைக்குப் புறம்பானது என்றும், ஆணையத்தின் நற்பெயருக்கு களங்கம் ஏற்படுத்தியுள்ளது என்றும் MACC தெரிவித்துள்ளது.

நேற்று, முன்னாள் உள்துறை அமைச்சர் டத்தோஸ்ரீ ஹம்சா ஜைனுடின், தொழிலதிபர் சிம் சூ தியாம்(Sim Choo Thiam) தொடர்பான வழக்கு, அவரது பெயரையும் இழுத்துச் சென்றது, பெர்சத்து மற்றும் பெரிகத்தான் நேஷனல் (PN) ஆகியவற்றின் நல்ல பெயரைக் கெடுக்கும் நோக்கம் கொண்டது என்று கூறினார்.

அதே நாளில் கோலாலம்பூர் செஷன்ஸ் நீதிமன்றத்தில் தொழிலதிபர் சம்பந்தப்பட்ட வழக்கு தொடர்பாகச் சாட்சியமளிக்க MACC யால் தனக்கு நேற்று சம்மன் அனுப்பப்பட்டதை ஹம்சா உறுதிப்படுத்தினார்.

“MACC அனைத்து விசாரணைகளும் இந்த ஆணையத்தால் பெறப்பட்ட உண்மையான தகவல்கள் மற்றும் ஆதாரங்களை அடிப்படையாகக் கொண்டவை என்பதை வலியுறுத்த விரும்புகிறது”.

“MACC சட்டம் 2009 இன் கீழ் குற்றங்களின் கூறுகள் கண்டறியப்பட்டு முடிக்கப்பட்ட விசாரணை ஆவணங்கள் மற்றும் அது தொடர்பான செயல்கள் முறையான ஆய்வு மற்றும் பரிசீலனைக்காக அட்டர்னி ஜெனரல் துறைக்கு அனுப்பப்படுகின்றன,” என்று ஆணையம் தெரிவித்துள்ளது.