மக்களின் சுமையைக் குறைக்க உதவும் முயற்சியில் மலேசியாவில் ஊழியர்களின் சம்பளத்தை உயர்த்த உதவ அரசாங்கம் நிதி வழங்கத் திட்டமிட்டுள்ளது என்று பிரதமர் அன்வார் இப்ராஹிம் கூறினார்.

ரிம1 பில்லியன் வரை இலாபம் ஈட்டிய நிறுவனங்கள் உள்ளன, ஆனால் அவற்றின் தொழிலாளர்களின் ஊதியம் இன்னும் அதிகரிக்கப்படவில்லை என்பதைக் கணக்கில் எடுத்துக் கொண்ட பின்னர் இந்த விவகாரம் அமைச்சரவையில் விவாதிக்கப்பட்டதாக அவர் கூறினார்.

“வாழ்க்கைச் செலவு மற்றும் பணவீக்கம் குறைவாக இருந்தாலும், அது இன்னும் மக்களுக்குச் சுமையாக இருக்கிறது என்று நாங்கள் கூறினோம்”.

“எனவே, நாங்கள் ஒரு முன்மொழிவை முன்வைத்துள்ளோம் மற்றும் ஆய்வின் இறுதி கட்டத்தில் இருக்கிறோம், ஏனென்றால் தொழிலாளர் ஊதியத்தை உயர்த்துமாறு நிறுவனங்களை நாங்கள் கட்டாயப்படுத்த முடியாது, ஆனால் குறைந்தபட்ச ஊதியம் போன்ற வழிமுறைகளைப் பயன்படுத்தலாம்”.

“சகோதர சகோதரிகளே, நான் உங்களுக்குச் சொல்ல விரும்புகிறேன், PN (பெரிகாத்தான் நேசனல்) ஒருபோதும் சிந்திக்காத ஒரு ஆச்சரியமான திட்டத்தை நாங்கள் கொண்டு வந்துள்ளோம். அது என்ன? சம்பளத்தை உயர்த்துவதற்கான வழியைக் கண்டுபிடிக்க ரிம1 பில்லியனுக்கும் ரிம2 பில்லியனுக்கும் இடையில் வழங்குவோம்”.

அரசாங்கம் வழங்கும் நிதியிலிருந்து தொழிலாளர்களின் ஊதியத்தை ரிம2,000 லிருந்து ரிம2,200 ஆக உயர்த்த இந்த முன்மொழிவு உதவும் என்று நிதியமைச்சரான அன்வார் கூறினார்.

கோலா சிலாங்கூரில் நேற்று நடந்த ஜெலாஜா பெர்படுவான் மதானி கிராண்ட் ஃபைனலில்(Jelajah Perpaduan Madani Grand Finale) அவர் பேசினார்.

இதற்கிடையில், பக்காத்தான் ஹராப்பான் மற்றும் BN கூட்டணி இந்தச் சனிக்கிழமை மாநிலத் தேர்தல்களில் சிலாங்கூர், நெகிரி செம்பிலான் மற்றும் பினாங்கு ஆகியவற்றைப் பாதுகாக்கவும், மேலும் ஒன்று அல்லது இரண்டு மாநிலங்களைப் பெறவும் முடிந்தால் அரசாங்கம் தேசிய வளர்ச்சியில் சிறப்பாகக் கவனம் செலுத்த முடியும் என்று அன்வார் கூறினார்.

“சிலாங்கூர் அரசாங்கத்தை வலுப்படுத்தி, நெகிரி செம்பிலான் மற்றும் பினாங்கில் வெற்றி பெற்று, ஒன்று அல்லது இரண்டு மாநிலங்களில் ஊடுருவ முடிந்தால், நாம் (நாடு)  A வகுப்பில் இருப்போம், ஏனெனில் நாம் நம் நாட்டின் வளர்ச்சியில் கவனம் செலுத்த முடியும்”.

எனவே நண்பர்களே, எங்களுக்கு அதிக நேரம் இல்லை, தயவுசெய்து எங்களைக் காப்பாற்றுங்கள், அலட்சியமாக இருக்காதீர்கள், இது நம்மையும், நம் குடும்பத்தையும், நமது மாநிலத்தையும், நாட்டையும் காப்பாற்றுவதாகும்,” என்று அவர் கூறினார்.

சிலாங்கூர், நெகிரி செம்பிலான், பினாங்கு, கெடா, திரெங்கானு மற்றும் கிளந்தான் ஆகிய இடங்களில் ஆகஸ்ட் 12 ஆம் தேதியைத் தேர்தல் ஆணையம் வாக்குப்பதிவு நாளாக நிர்ணயித்துள்ளது.