காசாவிற்கு மனிதாபிமான உதவிகளை ஏற்றிச் சென்ற கப்பல்களில் இருந்தவர்கள் எதிர்கொள்ளும் அவலநிலை இஸ்ரேலின் “கொடூரமான மற்றும் நாகரிகமற்ற தத்துவத்தை,” உலகிற்குக் காட்டியதால், பிரதமர் அன்வார் இப்ராஹிம், Global Sumud Flotilla (GSF) ஒரு வெற்றிகரமான பணி என்று பாராட்டியுள்ளார்.

இஸ்ரேலிய ஆக்கிரமிப்பின் கீழ் காசாவை அடைவது எளிதல்ல என்பதை அறிந்திருந்தும், இந்தப் பணியில் பங்கேற்ற தைரியத்திற்காக GSF பங்கேற்பாளர்களை அன்வார் இன்று தனது சமூக ஊடகப் பக்கங்களில் பதிவேற்றிய காணொளியில் பாராட்டினார்.

“அவர்கள் குறிப்பிடத் தக்க பங்களிப்பைச் செய்துள்ளனர் – இந்த இஸ்ரேலிய ஆட்சி ‘வன்முறை குழுக்கள்’ என்று அவர்கள் அழைப்பதற்கு எதிராக நடவடிக்கை எடுப்பது மட்டுமல்ல என்பதை உலகெங்கிலும் உள்ள கோடிக்கணக்கான மக்களிடையே விழிப்புணர்வை ஏற்படுத்துகிறது,” என்று பிரதமர் கூறினார்.

“எங்களைப் பொறுத்தவரை, இது பாலஸ்தீனம் மற்றும் காசா விடுதலைக்கான ஒரு இயக்கம், ஆனால் (இஸ்ரேல்) எந்தவொரு மனிதாபிமான உதவியையும் கண்டிப்பாகத் தடை செய்தது.”

“மிகவும் கொடூரமான மற்றும் நாகரிகமற்ற தத்துவத்தால் வழிநடத்தப்பட்டு ஆளப்படும் ஒரு நாட்டில் மட்டுமே இது நடக்கும். ஒரு நாகரிக நாடு, குறைந்தபட்சம், மனிதாபிமான உதவியை அனுமதிக்கும்,” என்று அவர் மேலும் கூறினார்.

அக்டோபர் 1 முதல் அக்டோபர் 3 வரை, சியோனிச ஆட்சியின் முற்றுகையை உடைத்து பாலஸ்தீனியர்களுக்கு மனிதாபிமான உதவிகளை வழங்கும் முயற்சியாகக் காசா நோக்கிப் பயணித்த 42 படகுகளை இஸ்ரேல் தடுத்து வைத்தது.

சர்வதேச கடல் பகுதியில் படகுகளில் இருந்த 462 ஆர்வலர்களை இஸ்ரேலிய இராணுவம் தடுத்து நிறுத்தி, இஸ்ரேலின் அஷ்டோட் துறைமுகத்திற்கு கொண்டு வந்து, பின்னர் கெட்ஜியோட் முகாம் என்ற தடுப்பு முகாமில் வைத்திருந்ததாகக் கூறப்படுகிறது.

இன்று முன்னதாக, வெளியுறவு அமைச்சர் முகமது ஹசன், யூத யோம் கிப்பூர் மத கொண்டாட்டம் காரணமாக, இஸ்ரேலிய தடுப்புக்காவலிலிருந்து ஜிஎஸ்எஃப்-ன் ஒரு பகுதியாக இருக்கும் 23 மலேசிய ஆர்வலர்களை விடுவிப்பதற்கான செயல்முறை தாமதமாகியுள்ளது என்றார்.

இஸ்ரேலிலிருந்து நாடு கடத்தப்படுவதை உறுதி செய்வதற்காக அனைத்து மலேசிய ஆர்வலர்களும் தொடர்புடைய படிவங்களில் கையெழுத்திட்டுள்ளனர் என்றும் முகமது மேலும் கூறினார். அவர்கள் நாடு கடத்தப்படுவதற்கு முன்பு ஒரு நடைமுறையாக இஸ்ரேலுக்குள் அத்துமீறி நுழைந்ததாகக் கூறப்படும் குற்றச்சாட்டின் பேரில் அவர்கள் விசாரணையை எதிர்கொள்வார்கள்.

மலேசியக் கைதிகள் இஸ்தான்புல்லுக்குச் செல்கின்றனர்

மலேசியர்களை இஸ்தான்புல்லுக்கு அழைத்து வருவதற்கு துருக்கிய ஜனாதிபதி ரெசெப் தையிப் எர்டோகனின் ஒப்புதலைப் பெற்றுள்ளதாக அன்வார் இன்று தெரிவித்தார். கைதுச் செய்யப்பட்டவர்கள் இப்போது தெற்கு இஸ்ரேலில் உள்ள ரமோன் விமான நிலையத்திற்கு கொண்டு செல்லப்படுவார்கள், பின்னர் ஒரு சிறப்பு விமானம் அவர்களைத் துருக்கிய நகரத்திற்கு அழைத்துச் செல்லும்.

துருக்கி ஜனாதிபதி ரிசெப் தையிப் எர்டோகன்

இஸ்ரேலிலிருந்து நாடுகடத்தப்படும் உத்தரவில் கையெழுத்திட மூன்று மலேசியர்கள் ஓரளவு தயக்கம் காட்டிய போதிலும், எதிர்கால உத்திகளைத் திட்டமிட அனுமதிக்க அவர்கள் அதற்கு ஒப்புக்கொண்டு திரும்பிச் செல்ல வேண்டும் என்ற கருத்தைப் புத்ராஜெயா கொண்டிருந்தது என்று பிரதமர் குறிப்பிட்டார்.

“இஸ்ரேலியப் படைகளின் கொடூரமான நடத்தை மற்றும் கொடூரமான ஆட்சியால் ஏற்பட்ட அதிர்ச்சி மற்றும் மன அழுத்தம் காரணமாக, அவர்கள் (சம்பந்தப்பட்ட அனைத்து மலேசிய ஆர்வலர்களும்) இஸ்தான்புல்லில் அரை நாள் அல்லது ஒரு நாள் சுகாதாரப் பரிசோதனைக்காகத் தங்குவது நல்லது.”

“நாளை இரவு அல்லது மறுநாள் அவர்கள் வீடு திரும்புவதற்கான ஏற்பாடுகள் செய்யப்பட்டு வருகின்றன,” என்று அன்வார் உறுதிப்படுத்தினார்.

முன்னதாக, Sumud Nusantara Command Centre (SNCC) இயக்குநர் ஜெனரல் சானி அரபி அப்துல் அலிம் அரபி, மலேசிய ஆர்வலர்கள் பாதுகாப்பாக இருக்கும்போது, ​​இஸ்ரேல் கைதிகளை ஐந்து மணி நேரம் ஜிப்-கட்டுடன் மண்டியிடக் கட்டாயப்படுத்தியதாக SNCCக்கு ஒரு அறிக்கை கிடைத்தது என்று கூறினார்.

“கைதிகளில் சிலர் ‘சுதந்திர பாலஸ்தீனம்’ என்று கோஷமிட்ட பிறகு இது நடந்தது. கைதிகளுக்குத் தண்ணீர், கழிப்பறைகள் மற்றும் வழக்கறிஞர்கள் மறுக்கப்பட்டுள்ளதாகவும் எங்களுக்குத் தெரிவிக்கப்பட்டது,” என்று அவர் இன்று ஒரு செய்தியாளர் கூட்டத்தில் கூறினார்.

முன்னதாக, இஸ்ரேலிய வெளியுறவு அமைச்சகம், மிஷன் கப்பல்களில் கைது செய்யப்பட்ட ஆர்வலர்கள் ஐரோப்பாவிற்கு நாடு கடத்தப்படுவார்கள் என்று கூறியது, மேலும் தடுத்து வைக்கப்பட்டுள்ள பயணிகள் அனைவரும் பாதுகாப்பாகவும் நல்ல ஆரோக்கியத்துடனும் இருப்பதாகவும் கூறினார்.

இன்னொரு படகு வந்து கொண்டிருக்கிறது.

இஸ்ரேலின் கடற்படை முற்றுகையை சவால் செய்யும் மற்றொரு முயற்சியாக, 11 கப்பல்களைக் கொண்ட ஒரு புதிய கடற்படை காசாவை நோக்கிச் செல்ல முயற்சிக்கிறது, செப்டம்பர் 27 அன்று இத்தாலியிலிருந்து 10 படகுகள் புறப்பட்டன.

ஒன்பது மலேசிய தன்னார்வலர்களை ஏற்றிச் சென்ற கான்சைன்ஸ் என்ற பாய்மரக் கப்பல் செப்டம்பர் 30 அன்று இத்தாலியின் போர்டோ ஓட்ரான்டோவிலிருந்து ஏவப்பட்டதாகக் கூறப்படுகிறது.

மலேசியர்கள், உலகம் முழுவதிலுமிருந்து சுமார் 100 தன்னார்வலர்கள் கொண்ட குழுவில் ஒரு பகுதியாக உள்ளனர், அவர்கள் சுதந்திர புளோட்டிலா கூட்டணி மற்றும் காசாவிற்கு ஆயிரம் மேட்லீன்கள் முயற்சியின் பதாகையின் கீழ் பயணம் செய்கிறார்கள்.

பங்கேற்பாளர்களில் மருத்துவர்கள், அரசியல்வாதிகள், பத்திரிகையாளர்கள் மற்றும் சர்வதேச ஆர்வலர்கள் அடங்குவர்.

இரண்டு படகுகளில் இருந்த ஒன்பது மலேசிய ஆர்வலர்கள் மற்றும் தன்னார்வலர்களுடன் பேசும் வாய்ப்பு தனக்குக் கிடைத்ததாக அன்வார் இன்று குறிப்பிட்டார், அந்தப் படகுகள் இப்போது மத்தியதரைக் கடலின் நடுவில் இருப்பதாகவும், மஞ்சள் மண்டலத்திற்குள் நுழைந்துவிட்டதாகவும் அவர் கூறினார்.

“நான் அவர்களுக்கு ஊக்கமளிக்கும் வார்த்தைகளை வழங்கினேன், மேலும் காசாவை நோக்கிய அவர்களின் பயணமும் பணியும் எளிதாக்கப்பட வேண்டும் என்று பிரார்த்தனை செய்தேன்”.

“மனிதகுலக் கொள்கைகளை நிலைநிறுத்துவதில் அவர்களின் தியாகங்கள் அனைத்து மலேசியர்களுக்கும், குறிப்பாக இளைய தலைமுறையினருக்கு, தைரியம், உறுதிப்பாடு மற்றும் உறுதியான ஒற்றுமையின் உண்மையான அர்த்தத்திற்கு ஒரு சிறந்த எடுத்துக்காட்டு,” என்று அவர் ஒரு தனி பதிவில் மேலும் கூறினார்.