கடத்தல்காரர்களைச் சுட்டுக் கொல்லுவது உள்ளிட்ட அதிரடி நடவடிக்கைகளை காவல்துறை எடுக்க வேண்டும் என்று கெடா முதல்வர் சனுசி நோர் வலியுறுத்தியுள்ளார்.

போதைப்பொருள் கடத்தல்காரர்கள் அச்சுறுத்தலாக விளங்கினால் அல்லது தப்பியோட முயன்றால், காவல்துறையினரால் அவர்களைக் கைது செய்ய முடியாத பட்சத்தில், அவர்களைச் சுட்டுக் கொல்லலாம் என்று சனுசி கூறினார். அதே வேளையில், தனது இந்த ஆலோசனை சர்ச்சைக்குரியது என்பதையும் அவர் ஒப்புக்கொண்டார்.

போதைப்பொருள் பழக்கம் கெடா மாநிலத்திலும் நாட்டிலும் ஒரு தீவிரமான பிரச்சினையாகத் தொடர்வதாகவும், இது குடும்பங்களையும், இந்த போதைப்பொருட்களுக்கு அடிமையாகும் மலேசிய இளைஞர்களின் எதிர்காலத்தையும் சீரழித்து வருவதாகவும் ஹரியான் மெட்ரோ செய்தி வெளியிட்டுள்ளது.

“எந்தவொரு போதைப்பொருள் கடத்தல்காரர்களையும் பாதுகாக்க வேண்டாம், அவர்கள் அனைவரையும் கைது செய்யுங்கள். அவர்களைக் கைது செய்ய முடியாவிட்டால், சுட்டுக் கொல்லுங்கள். போதைப்பொருள் கடத்தலின் தீவிரத்தன்மையைக் கருத்தில் கொண்டு, இது சர்ச்சையாக இருந்தாலும் பரவாயில்லை” என்று அவர் கூறினார்.

லங்காவி தீவை போதைப்பொருள் விநியோகத்திற்கான ஒரு போக்குவரத்து மையமாக கடத்தல் கும்பல்கள் பயன்படுத்தி வருவதாகத் தனக்குத் தகவல் கிடைத்துள்ளதாகச் சனுசி மேலும் குறிப்பிட்டார்.

இதற்கிடையில், லங்காவியில் காவல்துறை அதிகாரி ஒருவர் தலைமையிலான போதைப்பொருள் கடத்தல் வலையமைப்பு செயல்பட்டு வருவதாகக் கூறப்படும் குற்றச்சாட்டு குறித்து விசாரணைகள் நடத்தப்பட்டு வருவதாகக் காவல்துறை தலைமை இயக்குனர் காலித் இஸ்மாயில் தெரிவித்துள்ளார்.

சுமார் ஆறு ஆண்டுகளுக்கு முன்பு, “மாட் நகார்” என்று அழைக்கப்படும் உள்ளூர் போதைப்பொருள் தலைவனின் மரணத்திற்குப் பிறகு, இந்த கடத்தல் வலையமைப்பு லங்காவியில் உருவெடுத்ததாகக் கூறப்படுகிறது.

“மிஸ்டர் A” என்று அடையாளம் காணப்பட்ட ஒரு காவல்துறை அதிகாரி இந்த கும்பலை வழிநடத்துவதாகவும், முன்பு மாட் நகாரின் கடத்தல் குழுவோடு தொடர்புடைய பல நபர்கள் இந்த புதிய செயல்பாட்டில் இணைந்துள்ளதாகவும் கூறப்படுகிறது.

 

 

-fmt