புகார்களில் நீண்ட நேரக் காத்திருப்பு மற்றும் திறமையான பணியாளர்கள் பற்றாக்குறை ஆகியவை அடங்கும்.
பெட்டாலிங் ஜெயாவில் அமைந்துள்ள மலாயா பல்கலைக்கழக மருத்துவ மையம் (Universiti Malaya Medical Centre), மலேசியாவின் முன்னணி மூன்றாம் நிலை பரிந்துரை மற்றும் கல்வி மருத்துவ மையங்களில் ஒன்றாகும்.
மலேசியாவின் தலைமைச் செயலாளர் ஷம்சுல் அஸ்ரி அபு பக்கர், மலாயா பல்கலைக்கழக மருத்துவ மையத்தில் (UMMC) பாதிக்கப்பட்டுள்ள பல முக்கியமான சேவைப் பிரச்சினைகளைத் தீர்க்க உடனடி நடவடிக்கைகள் எடுக்கப்பட வேண்டும் என்று உத்தரவிட்டுள்ளார்.
ஒரு முகநூல் பதிவில், ஷம்சுல் இன்று UMMC நோயாளிகளிடமிருந்து வந்த புகார்கள் குறித்து கலந்துரையாடல் நடத்தியதாக தெரிவித்தார். அவற்றில் நீண்ட நேரம் காத்திருக்க வேண்டிய நிலை, மருத்துவ சேவைகளை வழங்குவதில் உள்ள சவால்கள், மேலும் திறமையான பணியாளர்கள் மற்றும் நிபுணத்துவம் பெற்ற மருத்துவர்களின் கிடைப்புத் தொடர்பான பிரச்சினைகள் அடங்கும்.
“கலந்துரையாடலில் எடுக்கப்பட்ட முடிவுகளை நடைமுறைப்படுத்த உடனடி நடவடிக்கை எடுக்குமாறு நான் உத்தரவிட்டுள்ளேன்,” என்று அவர் கூறினார்.
“UMMC ஒரு கற்பித்தல் மருத்துவமனை (Teaching Hospital) ஆகும். எனவே, அதன் சேவைகள் ஒரு கற்பித்தல் மருத்துவமனையின் திறன் மற்றும் வசதிகளுக்கு ஏற்ப அமைந்திருக்க வேண்டும்,” என்றும் அவர் தெரிவித்தார்.
இந்த கலந்துரையாடலில் உயர்கல்வி அமைச்சு மற்றும் சுகாதார அமைச்சின் செயலாளர்கள், மலாயா பல்கலைக்கழகத்தின் துணைவேந்தர், மேலும் UMMC நிர்வாகக் குழுவினர் ஆகியோர் கலந்து கொண்டனர்.
