மனித உரிமைகள் ஆணையம் கூறுவதாவது, பெற்றோரின் திருமண நிலை எதுவாக இருந்தாலும், ஒவ்வொரு குழந்தைக்கும் சட்டத்தின் கீழ் சமமான பாதுகாப்பும் பாகுபாடற்ற அணுகுமுறையும் கிடைக்க உரிமை உண்டு.

மலேசியாவின் குடியுரிமை கட்டமைப்பில் இன்னும் நீடிக்கும் குறைபாடுகள் காரணமாக, சில குழந்தைகள் நாடற்ற நிலை மற்றும் நீண்டகால சட்ட நிச்சயமின்மைக்கு ஆளாகும் அபாயத்தில் உள்ளனர் என்று சுஹாகாம் (மலேசிய மனித உரிமைகள் ஆணையம்) தெரிவித்துள்ளது.

மலேசிய மனித உரிமைகள் ஆணையம் (சுஹாகம்), சமீபத்தில் மேல்முறையீட்டு நீதிமன்றம் வழங்கிய தீர்ப்புகளைத் தொடர்ந்து, நாட்டின் குடியுரிமைச் சட்டங்களில் சீர்திருத்தங்களை அரசாங்கம் தொடர்ந்து முன்னெடுக்க வேண்டும் என்று வலியுறுத்தியுள்ளது.

நீதிமன்றத்தின் சுயாதீனத்தை மதிப்பதாக தெரிவித்த சுஹாகம், அதன் தீர்ப்புகள் மலேசியாவின் குடியுரிமை அமைப்பில் இன்னும் இடைவெளிகளை வெளிப்படுத்தியுள்ளதாகக் கூறியது. இந்த குறைபாடுகள் காரணமாக சில குழந்தைகள் நாடற்ற நிலை மற்றும் நீண்டகால சட்ட நிச்சயமற்ற சூழ்நிலைக்கு ஆளாகும் அபாயம் உள்ளதாகவும் தெரிவித்தது.

1995ஆம் ஆண்டு முதல் மலேசியா ஐக்கிய நாடுகள் சபையின் குழந்தைகள் உரிமைகள் உடன்படிக்கையில் (UN Convention on the Rights of the Child) ஒரு உறுப்பினராக இருப்பதாக சுஹாகம் குறிப்பிட்டது. இந்த உடன்படிக்கை, ஒவ்வொரு குழந்தைக்கும் பிறந்தவுடன் பதிவு செய்யப்படுவதற்கும் உடனடியாக ஒரு தேசியத்தைப் பெறுவதற்கும் உரிமை இருப்பதை அங்கீகரிக்கிறது.

“பெற்றோரின் திருமண நிலை அல்லது குழந்தையின் கட்டுப்பாட்டிற்கு அப்பாற்பட்ட சூழ்நிலைகள் காரணமாக எந்தக் குழந்தையும் குடியுரிமை பெறுவதில் பாதிக்கப்படவோ அல்லது மறுக்கப்படவோ கூடாது என்று சுஹாகம் தொடர்ந்து வலியுறுத்தி வருகிறது”.

பெற்றோரின் திருமண நிலையைப் பொருட்படுத்தாமல், ஒவ்வொரு குழந்தைக்கும் சட்டத்தின் கீழ் சமமான பாதுகாப்பும் பாகுபாடற்ற அணுகுமுறையும் கிடைக்க வேண்டும். குழந்தையின் சட்டபூர்வ அடையாளமும் எதிர்காலமும், குழந்தைக்கு எந்தப் பொறுப்பும் இல்லாத சூழ்நிலைகள் அல்லது முடிவுகளின் அடிப்படையில் தீர்மானிக்கப்படக் கூடாது.

“குடியுரிமை என்பது வெறும் சட்ட அந்தஸ்து மட்டுமல்ல; அது கல்வி, சுகாதாரம், சமூகப் பாதுகாப்பு, வேலைவாய்ப்பு மற்றும் சமூகத்தில் முழுமையாக பங்கேற்பது போன்ற பல அடிப்படை உரிமைகளை அனுபவிப்பதற்கான வாயிலாகும்,” என்று அது அறிக்கையில் தெரிவித்தது.

எனவே, சமத்துவம் மற்றும் குழந்தையின் சிறந்த நலன் ஆகிய கொள்கைகளுக்கு ஏற்ப மலேசியாவின் குடியுரிமைச் சட்டங்கள் படிப்படியாக சீர்திருத்தப்பட வேண்டும் என்று சுஹாகம் கூறியது.

வெளிநாட்டு துணையுடன் வாழும் மலேசிய தாய்மார்கள் வெளிநாட்டில் பிறக்கும் தங்களது குழந்தைகளுக்கு குடியுரிமையை வழங்க அனுமதிக்கும் வகையில் அரசாங்கம் அரசியலமைப்பில் திருத்தம் செய்துள்ள போதிலும், மேலும் பல சீர்திருத்தங்கள் அவசியம் என அது தெரிவித்தது.

“விரிவான சீர்திருத்தங்கள் நடைமுறைக்கு வரும் வரை, குழந்தைகள் நாடற்றவர்களாக மாறுவதைத் தடுக்கும் நோக்கில் உருவாக்கப்பட்ட கூட்டாட்சி அரசியலமைப்பின் பிரிவு 15A-ன் கீழ் உள்ள தற்போதைய அரசியலமைப்பு மற்றும் நிர்வாக வழிமுறைகளை அரசாங்கம் தொடர்ந்து பயன்படுத்த வேண்டும் என்று சுஹாகம் கேட்டுக்கொள்கிறது”.

“நிர்வாக அதிகாரம் குழந்தையின் சிறந்த நலனை கருத்தில் கொண்டு பயன்படுத்தப்பட வேண்டும். மேலும், குழந்தைகளின் தவறின்றி அவர்கள் நாடற்ற நிலைக்கு தள்ளப்படுவதைத் தடுக்க வேண்டும்,” என்றும் அது கூறியது.

இரண்டு வாரங்களுக்கு முன்பு, மலேசியாவில் பிறந்த 25 வயது இளைஞர் ஒருவர் சட்டத்தின் மூலம் மலேசிய குடிமகன் என்ற நிலையை நிரூபிக்கத் தவறியதாக மேல்முறையீட்டு நீதிமன்றம் தீர்ப்பளித்தது. அதற்கு பதிலாக அவர் இயல்பாக்கம் (naturalisation) முறையின் மூலம் குடியுரிமை பெற விண்ணப்பிக்கலாம் என்றும் நீதிமன்றம் தெரிவித்தது.

2001ஆம் ஆண்டு ஈப்போவில் பிறந்த அந்த இளைஞர், தான் மலேசியாவில் பிறந்ததால் மற்றும் தனது உயிரியல் தந்தை மலேசிய குடிமகன் என்பதால் குடியுரிமைக்கு தகுதியானவர் என்று வாதிட்டார். அவரது தாய் தாய்லாந்து நாட்டைச் சேர்ந்தவர். ஆனால் அவரது பெற்றோர் திருமணம் செய்து கொள்ளவில்லை.

கடந்த மாதம், மற்றொரு மேல்முறையீட்டு நீதிமன்ற அமர்வு, உயிரியல் பெற்றோர் தெரியாத ஒரு குழந்தை மலேசியாவில் பிறந்ததன் காரணத்தால் மட்டும் தானாகவே மலேசிய குடியுரிமையைப் பெற முடியாது என்று தீர்ப்பளித்தது. மேலும், அந்தக் குழந்தைக்கு வேறு எந்த நாட்டின் குடியுரிமையும் இல்லை என்பதற்கான ஆதாரம் இருக்க வேண்டும் என்றும் நீதிமன்றம் கூறியது.