69-வது தேசிய தினக் கொண்டாட்டங்களை முன்னிட்டு, தற்காலிக வான்வெளி மூடப்படுவதைத் தொடர்ந்து, கோலாலம்பூர் சர்வதேச விமான நிலையத்தின் (KLIA) முனையம் 1-க்கு வருகை தரும் மற்றும் அங்கிருந்து புறப்படும் தேர்ந்தெடுக்கப்பட்ட விமானங்களின் நேரத்தை மலேசியா ஏர்லைன்ஸ் நிறுவனம் மாற்றியமைக்க உள்ளது.

தேசிய தின ஒத்திகைகள் மற்றும் 2026-ஆம் ஆண்டிற்கான வான்வழி அணிவகுப்பை எளிதாக்குவதற்காக இந்த தற்காலிக வான்வெளி மூடல்கள் மேற்கொள்ளப்படுவதாக தேசிய விமான நிறுவனத்தை மேற்கோள் காட்டி வட்டாரங்கள் செய்தி வெளியிட்டுள்ளது.

இதன் காரணமாக, குறிப்பிட்ட சில கால இடைவெளிகளில் KLIA விமான நிலையத்தில் திட்டமிடப்பட்ட விமானங்களின் புறப்பாடுகளும் மற்றும் வருகையிறங்குதல்களும் தற்காலிகமாக நிறுத்தி வைக்கப்படும்.

பாதிக்கப்பட்ட பயணிகளுக்கு அவர்களின் பதிவு செய்யப்பட்ட தொடர்பு விவரங்கள் மூலம் தகவல் தெரிவிக்கப்படும். எனவே, பயணிகள் விமான நிலையத்திற்குப் புறப்படுவதற்கு முன்னதாக மலேசியா ஏர்லைன்ஸ் இணையதளம் அல்லது அதன் மொபைல் செயலி வழியாகத் தங்களது தற்போதைய விமான நிலவரத்தைச் சரிபார்த்துக் கொள்ளுமாறு கேட்டுக்கொள்ளப்படுகிறார்கள்.

அடுத்து வரவிருக்கும் பள்ளி விடுமுறை மற்றும் ஆகஸ்ட் 26 முதல் செப்டம்பர் 6 வரையிலான அதிகளவிலான பயணக் காலத்தைக் கருத்தில் கொண்டு, KLIA முனையம் 1-லிருந்து புறப்படும் பயணிகள் விமான நிலைய நடைமுறைகளைச் சீராக முடிக்க ஏதுவாக, தங்களின் திட்டமிடப்பட்ட விமானப் புறப்பாடு நேரத்திற்கு குறைந்தது நான்கு மணி நேரத்திற்கு முன்பாகவே வந்து சேருமாறு அறிவுறுத்தப்படுகிறார்கள்,”என்று அந்த நிறுவனம் தனது X தளப் பதிவில் குறிப்பிட்டுள்ளது.

தற்காலிக வான்வெளி மூடல்கள் ஆகஸ்ட் 26 முதல் 28 வரை காலை 11:00 மணி முதல் மதியம் 12:00 மணி வரையிலும், ஆகஸ்ட் 29 மற்றும் 31 ஆகிய தேதிகளில் காலை 8:45 மணி முதல் 9:45 மணி வரையிலும் திட்டமிடப்பட்டுள்ளன. இந்த வான்வெளி மூடல்கள் முறையே சாதாரண ஒத்திகைகள், முழு ஒத்திகை மற்றும் தேசிய தின வான்வழி அணிவகுப்பு ஆகியவற்றுடன் ஒத்துப்போகின்றன.

உள்நாட்டு மற்றும் சர்வதேச விமானங்கள் இரண்டிற்கும், திட்டமிடப்பட்ட புறப்பாடு நேரத்திற்கு 60 நிமிடங்களுக்கு முன்பாகவே பயணப்பதிவு கவுண்டர்கள் மூடப்படும் என்றும், புறப்படுவதற்கு 30 நிமிடங்களுக்கு முன்பாகவே விமானப் காத்திருக்கும் வாயில்கள் மூடப்படும் என்றும் மலேசியா ஏர்லைன்ஸ் பயணிகளுக்கு நினைவூட்டியுள்ளது.

மேலும், அதிகளவிலான பயணிகள் வருவார்கள் என எதிர்பார்க்கப்படுவதால், பயணப்பதிவு கவுண்டர்கள், குடிவரவுத்துறை மற்றும் பாதுகாப்பு சோதனை ஆகியவற்றில் காத்திருப்பு நேரம் 45 நிமிடங்களுக்கும் மேலாக நீடிக்கலாம் என்பதால் பயணிகள் அதற்கு தயாராக இருக்குமாறும் அது கூறியுள்ளது.

 

 

 

 

-fmt