அனுமதியின்றி அரசு நிலத்தில் கட்டப்பட்டதாகக் கூறி, பெர்லிஸ் (Perlis) மாநில அதிகாரிகளால் கடந்த வியாழக்கிழமை இடிக்கப்பட்ட இந்து கோவிலைப் பாதுகாத்துப் பேசிய டிஏபி (DAP) நாடாளுமன்ற உறுப்பினர் ஆர்.எஸ்.என். ராயருக்கு (RSN Rayer) எதிராக, அந்த கட்சியின் அடிமட்டத் தலைவர்கள் குழு ஒன்று கண்டனம் தெரிவித்துள்ளது.

சிறந்த தீர்வைக் காண்பதற்குப் பேச்சுவார்த்தைகள் ஊக்குவிக்கப்பட வேண்டும் என்றாலும், சட்டவிரோதச் செயல்பாடுகளை ஆதரிக்கக் கூடாது என்று அவர்கள் கூறினர்.

மேலும், ஒரு சமூகத்தின் நலன்கள் சட்டத்துடன் முரண்படும்போது, தலைவர்கள் உண்மைகளைச் சரிபார்த்து, நடுநிலையான நிலையை எடுக்க வேண்டும் என்றும் அவர்கள் தெரிவித்தனர்.

“சட்ட மீறல் தொடர்பான ஒரு பிரச்சினை எழும்போது, பொறுப்புள்ள ஒரு தலைவர் அத்தகைய நடவடிக்கையைப் பாதுகாப்பதற்குப் பதிலாக, சமுதாயத்திற்குப் புரிய வைக்க வேண்டும்”.

சட்டத்திற்கு மேலாக யாரும் இல்லை; நாட்டின் உயர்மட்டத் தலைவர்களும் இதற்கு விதிவிலக்கல்ல. ஒவ்வொரு மலேசியருக்கும் வழிகாட்டும் அடிப்படைக் கொள்கை இதுவாகும்

“இந்த விஷயத்தில் நாம் நிலையான கொள்கையைக் கொண்டிருக்க வேண்டும்; இரட்டை நிலைகளைப் பின்பற்றக் கூடாது” என்று 14 டிஏபி உறுப்பினர்கள் கையெழுத்திட்ட அறிக்கையில் தெரிவிக்கப்பட்டுள்ளது.

கையெழுத்திட்டவர்களில் சிலாங்கூர் டிஏபி இளைஞரணி துணைத் தலைவர் நூர் ரஹீம் நாசிர் (Nur Rahim Nasir), டிஏபி கிளைத் தலைவர்கள் ஷாகீர் அமீர் மொகிதீன் (Shakir Ameer Mohideen – செத்தியா இம்பியான்), பர்ஹான் ஹாசிக் (Farhan Haziq – பண்டார் பாரு பாங்கி), அப்துல் மஜித் அப்த் அஜீஸ் (Abdul Majid Abd Aziz – பெக்கான் பாலோ), நோர் மிஸ்வாரி ரம்லி (Nor Miswary Ramli – புசாத் பண்டார் ஷா ஆலம்), இஸுல் அஃபிக் (Izzul Afiq – தாமான் கெமுன்சாக்), அஸ்லம் அகமத் ரம்லி (Aslam Ahmad Ramli – கம்போங் துங்கு SS1), அலட்ரின் எங் (Aldrin Ng – கம்போங் பாரு பாகிர் பிஞ்சி) மற்றும் முன்னாள் டுசுன் துவா சட்டமன்ற உறுப்பினர் எட்ரி பைசால் யூசோஃப் (Edry Faizal Yusof) ஆகியோர் அடங்குவர்.

அவர்களது அறிக்கையில் ராயரின் பெயர் குறிப்பிடப்படவில்லை என்றாலும், கங்காரில் உள்ள புக்கிட் லாகியில் இருந்த வீரமாகாளியம்மன் கோவில் இடிக்கப்பட்டதற்கு ஜெலுத்தோங் நாடாளுமன்ற உறுப்பினர் தெரிவித்த கண்டனத்தோடு இது தொடர்புடையதுதான் என்பதை இதில் கையெழுத்திட்ட சிலர் மலேசியாகினியிடம் (Malaysiakini) உறுதிப்படுத்தினர்.

பொறுப்பற்ற அறிக்கை குழப்பத்தை ஏற்படுத்தக்கூடும் என்றும், மதத்தின் பெயரால் நில ஆக்கிரமிப்பு நடவடிக்கைகளைப் பாதுகாப்பது போன்ற செய்தியை அனுப்புவது மலேசியாவின் பல்லின சமூகத்திற்கு ஆபத்தானது என்றும் அந்த குழு கூறியது.

இது குறித்து கருத்து கேட்க மலேசியாகினி ராயரைத் தொடர்பு கொண்டுள்ளது.

ஆகஸ்ட் 20 அன்று, இந்த இடிப்புச் சம்பவம் மிகவும் வருந்தத்தக்கது என்று வருணித்த ராயர், பெரிகாத்தான் நேஷனல் (PN) கூட்டணி கூட்டாட்சி ஆட்சியைக் கைப்பற்ற மலேசியர்கள் அனுமதிக்கக் கூடாது என்றும், அந்த கூட்டணி “பல்லின சமூகம், பிற இனக் குழுக்கள் மற்றும் மதங்கள் குறித்து உணர்ச்சியற்ற மற்றும் கவனமற்ற ஒன்று,” என்றும் எச்சரித்தார்.

பெர்லிஸ் மாநிலத்தைப் ஆட்சி செய்யும் PN நிர்வாகம் தனது நடவடிக்கையை நியாயப்படுத்தியுள்ளது. மாநிலத்தின் எக்ஸ்கோ (exco) உறுப்பினர் இசிசாம் இப்ராஹிம் (Izizam Ibrahim) கூறுகையில், இடிப்புக்கு முன்னர் கோவில் நிர்வாகக் குழுவுடன் மாநில அரசு பல கட்டப் பேச்சுவார்த்தைகளை நடத்தியதாகவும், பொருத்தமான மாற்று இடத்தைக் கண்டறிய அறிவுறுத்தியதாகவும் தெரிவித்தார்.

ராயரின் அறிக்கை பக்கத்தான் ஹராப்பான் (Pakatan Harapan) மற்றும் அதன் கூட்டாட்சி அம்னோ (Umno) ஆகிய கட்சிகளுக்குள்ளும் உள்ள அரசியல் தலைவர்களிடமிருந்து விமர்சனங்களை ஈர்த்துள்ளது.

உண்மையை உண்மையாகப் பேசுங்கள்

எட்ரியைத் தொடர்பு கொண்டபோது, அரசியல்வாதிகள் பிரபலத்திற்கு முன்னுரிமை அளிப்பதற்குப் பதிலாக உண்மையை நிலைநாட்டும் பொறுப்பைக் கொண்டுள்ளனர் என்று கூறினார்.

தலைவர்கள் உண்மையைப் பற்றிப் பேச வேண்டும், தவறானதை தவறு என்று தைரியமாகச் சொல்ல வேண்டும் என்று அவர் வலியுறுத்தினார்.

DAP உறுப்பினர் எட்ரி ஃபைசல் யூசோஃப்

“ஒரு விஷயம் தவறு என்றால், அது தவறு என்று நாம் சொல்ல வேண்டும். ஆனால் அதே நேரத்தில், ஒரு சுமுகமான தீர்வுக்கு நாம் அழைப்பு விடுக்கிறோம்”.

ஆனால் சில நேரங்களில் அத்தகைய அறிக்கையை நாம் கேட்பதில்லை. நில ஆக்கிரமிப்புப் பிரச்சினையில், அது தவறு என்று சொல்லும் அறிக்கை எதுவும் இல்லை, அதைச் சரியாகத் தீர்க்க வேண்டும் என்று மட்டுமே கோரப்படுகிறது.

“ஒரு விஷயம் சட்டத்திற்குப் புறம்பானது என்றால், அது சட்டத்திற்குப் புறம்பானது என்று நாம் சொல்ல வேண்டும்,” என்று அவர் கூறினார்.

இத்தகைய ஒருதலைப்பட்சமான அணுகுமுறைதான், சட்டவிரோத கட்டுமானங்கள் மற்றும் குடியிருப்பு வீடுகளின் மாற்றங்களுக்கு எதிராக அதிகாரிகள் நடவடிக்கை எடுக்கும்போது பலர் அதிகாரிகளைக் கண்டிக்கும் நிலையை உருவாக்கியுள்ளது என்று முன்னாள் சட்டமன்ற உறுப்பினர் சுட்டிக்காட்டினார்.

சட்டத்தை உயர்த்த பிடிக்கும் கொள்கை அனைத்து தரப்பினருக்கும் மற்றும் சூழ்நிலைகளுக்கும் பொருந்தும், வழிபாட்டுத் தலங்களுக்கு மட்டும் அல்ல என்று எட்ரி கூறினார்.

சமீபத்தில் ஒரு அரசியல் கட்சி சட்டவிரோதமாக அமைக்கப்பட்டதாகக் கூறப்படும் ஒரு கடையை அதிகாரிகளால் இடிக்கப்படாமல் பாதுகாத்த ஒரு சம்பவம் நடந்ததாக அவர் கூறினார்.

“நாம் எப்போதும் அரசியல் செய்ய விரும்பினால், எது சரி, எது தவறு என்று மக்களுக்கு எப்படி புரிய வைக்கப் போகிறோம்?” என்று அவர் கேள்வி எழுப்பினார்.