மலேசியா ஒரே நாளில் ஓர் விரும்பத்தகாத உலகப் சாதனையைப் படைத்திருக்கக் கூடும். மூன்று முன்னாள் பிரதமர்கள் தனித்தனி வழக்குகளுக்காக இன்று கோலாலம்பூர் நீதிமன்ற வளாகத்திற்கு வருகை தந்தனர்.

அந்த மூவர்: 2009 முதல் 2018 வரை பதவியிலிருந்தவரும், 1MDB ஊழல் மூலமாக மலேசியாவிற்கு அவப்பெயரை ஏற்படுத்தியவருமான நஜீப் அப்துல் ரசாக்; அரசியல் கவிழ்ப்பைத் தொடர்ந்து 17 மாதங்கள் பிரதமராக இருந்த முகிடின் யாசின்; மற்றும் 15 மாதங்கள் மட்டுமே பதவியிலிருந்ததன் மூலம் மிகக் குறைந்த காலம் ஆட்சி செய்த முன்னாள் பிரதமர் என்ற பெயரப் பெற்ற இஸ்மாயில் சப்ரி யாக்கோப்.

பெர்னாமா செய்தியின்படி, நஜிப் இன்று 1MDB மற்றும் அதன் துணை நிறுவனங்கள் தமக்கும் மேலும் சில தனிநபர்களுக்கும் எதிராகத் தொடர்ந்துள்ள US$5.64 பில்லியன் (ரிம 22.7 பில்லியன்) மதிப்பிலான சிவில் வழக்கின் விசாரணைக்காக நீதிமன்றத்தில் ஆஜரானார்.

நீதித்துறை ஆணையர் ரெட்ஸுவான் இட்ருஸ் முன்னிலையில் நடைபெறும் விசாரணையில், முன்னாள் 1MDB தலைமை நிர்வாக அதிகாரி ஷாஹ்ரோல் அஸ்ரல் இப்ராஹிம் ஹல்மி தொடர்ந்து சாட்சியம் அளிக்கிறார்.

நஜீப் நம்பிக்கைத் துரோகம் செய்தார், சட்டப்பூர்வ கடமைகளை மீறினார், அதிகாரத்தைத் தவறாகப் பயன்படுத்தினார் மற்றும் 1MDB நிதியைத் தவறாகப் பயன்படுத்த சதி செய்தார் என அந்த வழக்கு மனுவில் குறிப்பிடப்பட்டுள்ளது.

நூற்றுக்கணக்கான மில்லியன் தொகை தொடர்பான வழக்குகள்

தனித்தனியாக நடைபெறும் உயர் நீதிமன்ற விசாரணைகளில், முகிடின் யாசின் தனது பதவியைத் தவறாகப் பயன்படுத்தியதாகவும், ஜானா விபாவா (Jana Wibawa) திட்டத்துடன் தொடர்புடைய பணமோசடி செய்ததாகவும் தொடரப்பட்ட வழக்கின் விசாரணைக்கு ஆஜராகிறார்.

பெர்சத்து கட்சியின் தலைவரான முகிடின் மொத்தம் ஏழு குற்றச்சாட்டுகளை எதிர்கொள்கிறார்.

பெர்சத்து கட்சியின் தலைவர், ஜனா விக்பாவா (Jana Wibawa) திட்டம் தொடர்பாக, நான்கு நிறுவனங்களிடமிருந்தும் Bukhary Equity Sdn Bhd, Nepturis Sdn Bhd, Mamfor Sdn Bhd மற்றும் KCJ Engineering Sdn Bhd மேலும் Azman Yusoff என்பவரிடமிருந்தும், கட்சிக்காக மொத்தம் RM225.3 மில்லியன் மதிப்பிலான நிதிப் பலனைப் பெற தனது பதவியைப் பயன்படுத்தியதாக நான்கு குற்றச்சாட்டுகளை எதிர்கொள்கிறார்.

முன்னாள் பிரதமர் இஸ்மாயில் சப்ரி யாக்கோப் இன்று நீதிமன்றத்தில்

இஸ்மாயில் சப்ரி, கடந்த ஆண்டு MACC-யிடம் கோடிக்கணக்கான ரிங்கிட் மதிப்புள்ள சொத்துகளை வெளிப்படுத்தத் தவறியதாகக் கூறி, இன்று காலை செஷன்ஸ் நீதிமன்றத்தில் குற்றம் சாட்டப்பட்டார். இதில் தலா 1 கிலோ எடையுள்ள ஐந்து தங்கக் கட்டிகள், 100 கிராம் எடையுள்ள ஒரு வெள்ளிக் கட்டி மற்றும் 999 தூய்மையான 5 கிராம் தங்க நாணயம் ஆகியவையும் அடங்கும்.

பிப்ரவரி 7, 2025 அன்று MACC சட்டத்தின் பிரிவு 36(1)-ன் கீழ் வழங்கப்பட்ட அறிவிப்புக்கு இணங்காத வகையில், உறுதிமொழி அளிக்கப்பட்ட எழுத்துப்பூர்வ வாக்குமூலத்தைக் கொடுத்ததன் மூலம் அவர் இந்தக் குற்றத்தைச் செய்ததாகக் கூறப்படுகிறது.

அவருக்கு ஆகஸ்ட் 7 அன்று குற்றச்சாட்டுகள் சுமத்தப்படவிருந்த நிலையில், சுகாதாரப் பிரச்சினைகள் காரணமாக அவர் தேசிய இதய நிறுவனத்தில் (IJN) அனுமதிக்கப்பட்டதை அடுத்து விசாரணைகள் ஒத்திவைக்கப்பட்டு, இன்று நடைபெற்றது.

அவர் மீதான ஊழல் மற்றும் பணமோசடி விசாரணையின் ஒரு பகுதியாக, MACC அதிகாரிகள் பல்வேறு வெளிநாட்டு நாணயங்களில் ரிம 170 மில்லியன் ரொக்கம் மற்றும் சுமார் ரிம 7 மில்லியன் மதிப்புள்ள 16 கிலோ சுத்தமான தங்கக் கட்டிகளையும் பறிமுதல் செய்தனர்.

இஸ்மாயில் சப்ரியின் கீழ் பணியாற்றிய நான்கு மூத்த அதிகாரிகள் பிப்ரவரி 2025-இல் கைது செய்யப்பட்டதைத் தொடர்ந்து, “பாதுகாப்பான வீடுகள்” (safe houses) என நம்பப்படும் ஒரு குடியிருப்பு மற்றும் அலுவலகத்தில் நடத்தப்பட்ட சோதனைகளின் போது இந்த பொருட்கள் பறிமுதல் செய்யப்பட்டன.