தென் பிலிப்பீன்சிலிருந்து போராளிக் கும்பலொன்று லஹாட் டத்துவுக்குள் ஊடுருவல் செய்ய சதித்திட்டம் போட்டவர்கள் மூன்று பக்காத்தான் ரக்யாட் தலைவர்கள் என்பதைத் தற்காப்பு அமைச்சு  கண்டுபிடித்துள்ளது.

இதனைத் தெரிவித்த அதன் அமைச்சர் அஹ்மட் ஜாஹிட் ஹமிடி, இது தொடர்பான எல்லாத் தகவல்களும் விவரங்களும் சட்டத்துறை தலைவர் அலுவலகத்துக்கு அனுப்பி வைக்கப்படும் என்றார்.

“அவர்களில் இருவர் தீவகற்பத்தைச் சேர்ந்தவர்கள் இன்னொருத்தர் சாபாவைச் சேர்ந்தவர்”, என்று அஹ்மட் ஜாஹிட் கூறினார். அவர், இன்று அலோர் ஸ்டாரில் உள்ள அரச மலேசிய ஆகாயப்படை கல்லூரிக்கு வருகை புரிந்த பின்னர், செய்தியாளர்களிடம் பேசினார்.

ஆனால், சம்பந்தப்பட்ட மாற்றரசுக் கட்சித் தலைவர்களின் பெயர்களை அவர் வெளியிடவில்லை.

சில தரப்பினர் இதை பிஎன்னின் அரசியல் திட்டம் என்றும்  அம்னோவின் அரசியல் நாடகம் என்றும்  கூறக்கூடும் என்பதால் அதைத் தவிர்ப்பதற்கு ஊடுருவல் தொடர்பான நடவடிக்கைகள் 13வது பொதுத் தேர்தலுக்குப் பின்னரே மேற்கொள்ளப்படும் என்றாரவர்.

“ஆதாரங்களைத் திரட்டிய பின்னரே சட்ட நடவடிக்கை மேற்கொள்ள முடியும். இப்போது ஆதாரங்கள் கைவசம் உள்ளன”, என்றவர் சொன்னார்.

-பெர்னாமா