தடுப்புக் காவலில் இருந்த என். தர்மேந்திரனைக் கொன்றதாக மூன்று போலீஸ் அதிகாரிகள்மீது இன்று கோலாலும்பூர் மெஜிஸ்ரேட் நீதிமன்றத்தில் குற்றம் சுமத்தப்பட்டது.

குற்றம் சாட்டப்பட்ட ஜப்ரி ஜாப்பார்,44, முகம்மட் நஹார் அப்துல் ரஹ்மான்,45, முகம்மட் ஹஸ்வாதி ஜம்ரி ஷாரி, 32, ஆகிய மூவரும் குற்றச்சாட்டை எதிர்த்து வாதிடவில்லை.

ஜப்ரி, நஹார், ஹஸ்வாதி ஆகிய மூவருடன் இன்னும் பிடிபடாமல் இருக்கும் மேலும் ஒருவர்மீதும்  குற்றவியல் சட்டத்தின் 302வது பிரிவின்கீழ் தர்மேந்திரனைக்  கொலை செய்ததாகக் குற்றம் சாட்டப்பட்டது.

இச்சட்டம், குற்றம் சாட்டப்பட்டோர் குற்றவாளிகள் என்று நிரூபிக்கப்பட்டால் மரண தண்டனை விதிக்க வகை செய்கிறது. இவ்வழக்கு உயர் நீதிமன்றத்தில் விசாரிக்கப்படும்.

31-வயது தர்மேந்திரன் கோலாலும்பூர் போலீஸ் தலைமையகத்தின் லாக்-அப்பில் இறந்து கிடக்கக் காணப்பட்டார். துப்பாக்கி ஏந்தி கொலை முயற்சியில் ஈடுபட்டார் என்ற சந்தேகத்தின்பேரில் தர்மேந்திரன் மே 11-ஆம் தேதி கைது செய்யப்பட்டு மே 12-இலிருந்து விசாரணைக்காக தடுத்து வைக்கப்பட்டிருந்தார். தடுப்புக் காவலில் இருந்தபோது அவர் இறந்தார்.