சிறையில் உள்ள இண்ட்ராப் தலைவர் பி.உதயகுமாரின் மருத்துவ தேவைகளுக்கு உரிய கவனம் செலுத்தப்படுவதில்லை என்று கூறிய அவரின் துணைவியார் எஸ். இந்திரா தேவி, அதனால் உதயா முடக்குவாதத்தால் பாதிக்கப்படலாம் என்று கவலை கொண்டுள்ளார்.

இன்று பிரிக்பீல்ட்சில் செய்தியாளர் கூட்டமொன்றில் பேசிய இந்திரா, தம் கணவர் கடுமையான முதுகுவலியை உண்டுபண்ணும் முதுகுத்தண்டு தட்டுப்பிதுக்கத்தால் (prolapsed disc) பாதிக்கப்பட்டிருக்கிறார் என்றார். உதயாவுக்கு நீரிழிவு நோயும் உண்டு.

“அவருக்கு வலி மாத்திரைகளைத்தான் கொடுக்கிறார்கள். நீரிழிவு நோயாளிக்கு வலி மாத்திரைகள் தொடர்ந்து கொடுக்கப்பட்டால் சிறுநீரகம் செயலிழந்து போகும்.

“அவரை யுனிவர்சிடி கெபாங்சான் மலேசியா மருத்துவமனைக்கு அனுப்ப வேண்டும். அவர்களுக்குத்தான் தெரியும் அவருக்கு என்ன மருந்து தேவை என்பது”, என்றாரவர்.