ஏப்ரல் 15-ஆம் தேதி முதல் இந்த கொள்கை நடைமுறைக்கு வந்ததிலிருந்து, மொத்தம் 155,000 அரசு ஊழியர்கள் வீட்டிலிருந்து பணியாற்றப் பதிவு செய்துள்ளனர். இதன் விளைவாக நேற்று வரை சுமார் 334,000 லிட்டர் எரிபொருள் சேமிக்கப்பட்டுள்ளது, இதன் மதிப்பு ரிம 678,000 ஆகும்.
அரசாங்க செய்தித் தொடர்பாளராகவும் பணியாற்றும் தகவல் தொடர்பு அமைச்சர் பஹ்மி பட்சில் கூறுகையில், இன்றைய அமைச்சரவைக் கூட்டத்தின் போது இக்கொள்கையின் முன்னேற்றம் குறித்து அரசாங்கத்தின் தலைமைச் செயலாளர் ஷம்சுல் அஸ்ரி அபு பக்கர் விளக்கமளித்தார் என்றார்.
“உலகளாவிய விநியோக நெருக்கடி குறித்த அமைச்சரவைக் கூட்டத்திற்குப் பின் ஊடகச் சந்திப்பின் போது, ‘அரசு ஊழியர்களுக்கான வீட்டிலிருந்து பணிபுரியும் நடைமுறையின் நிலை குறித்து தலைமைச் செயலாளர் இன்று அமைச்சரவையில் விளக்கமளித்தார்’ என்று பஹ்மி கூறினார்.”
உலகளாவிய விநியோகத் தடைகளின் தாக்கத்தை நிர்வகிப்பதற்கும், அதே வேளையில் வளங்களை மிகவும் திறமையாகப் பயன்படுத்துவதற்கும் அரசாங்கம் எடுத்துள்ள நடவடிக்கைகளில் இக்கொள்கையும் ஒன்று என்பதை அவர் சுட்டிக்காட்டினார்.
தேசிய அளவில் அடையக்கூடிய மொத்த சேமிப்பை மதிப்பிடுவதற்கு, தனியார் துறையிடமிருந்தும் இது தொடர்பான தகவல்களைத் திரட்டுமாறு தலைமைச் செயலாளருக்கு உத்தரவிடப்பட்டுள்ளதாக பஹ்மி மேலும் தெரிவித்தார்.
“எரிபொருள் நுகர்வு மற்றும் செயல்பாட்டுச் செலவுகளைக் குறைப்பதில் வீட்டிலிருந்து பணிபுரியும் முன்முயற்சிகள் எவ்வளவு பயனுள்ளதாக உள்ளன என்பதைப் பற்றிய விரிவான படத்தைப் வழங்க இது முக்கியமானது,” என்று அவர் கூறினார்.
உலகளாவிய நிச்சயமற்ற நிலைக்கு மத்தியில் மிகவும் நிலையான வள நிர்வாகத்தை உறுதி செய்வதற்கான தற்போதைய முயற்சிகளின் ஒரு பகுதியாக, அரசாங்கம் இந்த அணுகுமுறையைத் தொடர்ந்து ஆய்வு செய்து வலுப்படுத்தும் என்று பஹ்மி மேலும் கூறினார்.
மேற்கு ஆசியாவில் நிலவும் மோதல்களைத் தொடர்ந்து, உலகளாவிய விநியோகத் தடைகளை எதிர்கொள்வதில் தேசிய மீள்திறனை (national resilience) வலுப்படுத்துவதற்கான ஒரு மூலோபாய அரசாங்க நடவடிக்கையாக, பொதுத்துறைக்கான ‘வீட்டிலிருந்தே பணியாற்றும்’ (work-from-home) கொள்கை ஏப்ரல் 15 முதல் நடைமுறைக்கு வந்தது.
