மலேசியா இந்திய மக்கள் கட்சி (MIPP) லுகுட் தொகுதி வேட்பாளர் என். சதீஷ் குமார், இஸ்லாமிய கட்சியான பாஸ்  கட்சி அனைத்து சமூகங்களையும் மதிக்கிறது என்றும், தனது மதக் கொள்கைகளைத் தங்களின் கூட்டணி கூட்டணிக் கட்சிகள் மீது திணிக்காது என்றும் கூறி, இந்திய வாக்காளர்கள் பாஸ் கட்சியைக் கண்டு பயப்பட வேண்டாம் என்று வலியுறுத்தியுள்ளார்.

பெரிக்காத்தான் நேசனல் சின்னத்தில் நெகிரி செம்பிலான் தேர்தலில் போட்டியிடும் சதீஷ் குமார், பாஸ் கட்சி மத விஷயங்களில் இந்தியர்களை அடிப்படையாகக் கொண்ட மலேசியா இந்திய மக்கள் கட்சி (MIPP) கட்சிக்கு எந்தவொரு அழுத்தமும் கொடுக்காமல் இணைந்து செயல்படுவதாகக் கூறினார்.

பாஸ் என்பது ஒரு இஸ்லாமிய கட்சிதான், ஆனால் அது முஸ்லிம்களையும் மற்ற சமூகங்களையும் சமமாகப் பாதுகாக்கிறது, என்று பெரிக்காத்தான் கூட்டணியில் பாஸ் கட்சியின் அதிகரித்து வரும் செல்வாக்கு குறித்து இந்திய வாக்காளர்களிடையே உள்ள கவலைகள் பற்றி கேட்டபோது அவர் இவ்வாறு தெரிவித்தார்.

எங்களுடன் வந்து எங்களுக்கு ஆதரவளிக்கவும். பாஸ் கட்சியைச் சேர்ந்த நமது நண்பர்கள் இஸ்லாமிய மதத்தை அரசியலுக்குள் கொண்டு வரமாட்டார்கள் என்று நான் உங்களுக்கு உறுதியளிக்கிறேன். அவர்கள் ஒன்றிணைந்து செயல்பட்டு நமக்கு உதவுவார்கள்.

நெகிரி செம்பிலான் மாநில தேர்தல் பிரச்சாரம் சமீபத்தில் இனரீதியான சொல்லாடல்களுக்குள் தள்ளப்பட்டது. பாஸ் கட்சியின் துணைத் தலைவரும், பெரிக்காத்தான் தேர்தல் இயக்குநருமான சனுசி நோர், மலாய்க்காரர்களுக்கு வேறு தாயகம் இல்லை என்றும், அதே நேரத்தில் மலேசிய சீனர்களுக்கும் இந்தியர்களுக்கும் முறையே சீனா மற்றும் இந்தியா இருப்பதாக ஒரு பிரச்சாரக் கூட்டத்தில் பேசியதாகக் கூறப்பட்டதைத் தொடர்ந்து இந்த சர்ச்சை எழுந்தது.

லுகுட் தொகுதிக்கான முக்கோணப் போட்டியில், தற்போதைய சட்டமன்ற உறுப்பினர் பிகேஆர் கட்சியின் சூ கென் ஹுவா மற்றும் சுயேச்சை வேட்பாளர் தியோ செங் லீ ஆகியோரை சதீஷ் எதிர்கொள்கிறார்.

சூ 2018 முதல் இந்தத் தொகுதியைத் தன் வசம் வைத்துள்ளார், அதே நேரத்தில் முன்னாள் டிஏபி சட்டமன்ற உறுப்பினர் ஈயான் யோங் ஹியான் வா 2008 முதல் 2013 வரை இந்த கலப்புத் தொகுதியை பிரதிநிதித்துவப்படுத்தினார்.

மேலும், லுகுட்டில் தனக்கு ஆதரவளிக்குமாறு இந்திய வாக்காளர்களுக்கு கோரிக்கை விடுத்த சதீஷ், தான் தேர்ந்தெடுக்கப்பட்டால் அனைத்து சமூகங்களின் நலன்களுக்காகவும் பாடுபடுவேன் என்றும், அதே வேளையில் இந்தியர்களைப் பாதிக்கும் பிரச்சினைகளில் தனி கவனம் செலுத்துவேன் என்றும் கூறினார்.

நான் எனது சிறந்த பங்களிப்பை வழங்குவேன், குறிப்பாக நான் அதே சமூகத்தைச் சேர்ந்தவன் என்பதால் இந்திய சமூகத்திற்காக உழைப்பேன். ஆனால் இந்தியர்களுக்கு மட்டுமல்ல, பெரிக்காத்தான் பிரதிநிதியாக நான் மற்ற சமூகங்களுக்கும் சேவை செய்வேன்.

லுகுட் தொகுதி டிஏபி கட்சியின் கோட்டையாகக் கருதப்பட்ட போதிலும், தற்போதைய அரசாங்கத்தின் மீதான அதிருப்தி குறிப்பாக சீன வாக்காளர்களிடையே அதிகரித்து வருவதாக சதீஷ் கூறினார்.

அலை மாறியிருக்கிறது, ஏனென்றால் நாங்கள் செல்லும் ஒவ்வொரு வீட்டிலும் மற்றும் ஒவ்வொரு இடத்திலும், குறிப்பாக சீன வாக்காளர்களிடையே, அவர்கள் தற்போதைய அரசாங்கத்தின் மீது சலிப்படைந்துள்ளதை நாங்கள் காண்கிறோம். அவர்கள் மாற்றத்தை விரும்புகிறார்கள்.

பக்காத்தான் ஹரப்பான் மீது பெரும் கோபம் இருப்பதை என்னால் பார்க்க முடிகிறது. எனவே வரவிருக்கும் தேர்தலில் சீன வாக்காளர்கள் எனக்கு வாக்களிப்பார்கள் என்று நம்புகிறேன், என்று அவர் கூறினார்.

 

 

-fmt