கல்வி அமைச்சர் பத்லினா சிடெக்கை(Fadhlina Sidek) பதவி விலகக் கோரி எதிர்ப்பாளர்கள் குரல் எழுப்பி வரும் நிலையில், அவருக்கு முன் அப்பதவியில் இருந்த முன்னாள் கல்வி அமைச்சர் மஸ்லி மாலிக் (Maszlee Malik), “சர்வதேச மாணவர் மதிப்பீட்டு திட்டத்தின்” (Programme for International Student Assessment 2025) மலேசியாவின் வீழ்ச்சியடைந்த செயல்திறனை எந்தவொரு கல்வி அமைச்சருக்கும் அல்லது அரசாங்கத்திற்கும் எதிராகவும் ஆயுதமாகப் பயன்படுத்தக் கூடாது என்று கூறியுள்ளார்.
கல்வி முடிவுகள் என்பது ஒரே ஒரு அமைச்சரின் பதவிக் காலத்தில் உருவாகுவது அல்ல, மாறாகப் பல ஆண்டுகளாகக் வடிவமைக்கப்படுபவை என்பதால், அவ்வாறு குற்றம் சாட்டுவது நியாயமற்றது மற்றும் பயனற்றது என்று அவர் வாதிட்டார்.
அதே வேளையில், ஏமாற்றமளிக்கும் இந்த எண்களை மறைப்பதற்குச் சாக்குப்போக்குகளைத் தேட வேண்டாம் என எச்சரித்த மஸ்லி, இந்த முடிவுகளை “அமைதி, நேர்மை, நியாயம் மற்றும் பொறுப்புணர்வுடன்,” எதிர்கொள்ள வேண்டும் என்றார்.
கல்வி என்பது ஐந்து ஆண்டு அரசியல் சுழற்சிகளுக்கு ஏற்ப நகர்வதில்லை. 15 வயதில் ‘பிசா’ (PISA) தேர்வெழுதும் ஒரு குழந்தை, தனது தொடக்கப் பள்ளியிலிருந்தும், ஏன் முன்பள்ளிக் கல்வியிலிருந்தும் பெறப்பட்ட கற்றல் அனுபவங்களைத் தன்னகத்தே சுமந்து செல்கிறது.
அதனால்தான் ‘ Pisa 2025’ என்பதை எந்தவொரு கல்வி அமைச்சர் அல்லது கல்வி அமைச்சின் மூத்த அதிகாரிக்கான ‘மதிப்பெண் அட்டை’ (report card) ஆக நான் பார்க்கவில்லை. மாறாக, இது ஒரு நாடாக நமக்கான ‘முன்னேற்ற அறிக்கை’ (progress report),” என்று அவர் மேலும் கூறினார்.
மாணவர்களின் வெளிப்படாத திறன்:
இந்த எண்கள் தீவிர கவனத்தைக் கோருகின்றன என்பதை வலியுறுத்திய மஸ்லி, கணிதத்தில் குறைந்தபட்ச அடிப்படைத் திறனை அடையும் மலேசிய மாணவர்களின் எண்ணிக்கை வெறும் 35 சதவீதமாக உள்ளது என்றும், வாசிப்பில் 44 சதவீதமாகவும், அறிவியலில் 54 சதவீதமாகவும் உள்ளது மிகவும் கவலைக்கிடமானது என்றும் கூறினார்.
என்னைப் பொறுத்தவரை, உலகளாவிய தரவரிசையில் மலேசியாவின் இடம் என்ன என்பது பெரிய கேள்வியல்ல. ‘நமது குழந்தைகளின் ஆழமாக வாசிக்கும் திறன், புரிந்து கொள்ளும் திறன், காரண காரியம் ஆராயும் திறன், சிக்கல்களைத் தீர்க்கும் திறன் மற்றும் அவர்கள் இதுவரை சந்திக்காத சூழ்நிலைகளுக்குப் அறிவைப் பயன்படுத்தும் திறன் ஆகியவற்றிற்கு என்ன நடக்கிறது?’ என்பதே பெரிய கேள்வி.
“பிசா என்பது மனப்பாடம் செய்வதற்கான தேர்வு அல்ல. அங்குதான் அதன் செய்தியை நாம் புரிந்து கொள்ள வேண்டும்,” என்று அவர் மேலும் சேர்த்தார்.
பக்காத்தான் ஹரப்பான் ஆட்சியில் கல்வி அமைச்சராகப் பணியாற்றிய மஸ்லி, இந்த முடிவுகளை வெறும் தோல்வியின் கண்ணோட்டத்தில் மட்டும் பார்க்கக் கூடாது என்றும், மலேசியத் தரவுகளில் ஒரு முக்கியமான கோணமும் அடங்கியுள்ளது என்றும் குறிப்பிட்டார்.
கணிப்பொறி வழிச் சிக்கல் தீர்க்கும் திறனில் (computational problem-solving) நமது மாணவர்களின் செயல்திறன், அவர்களின் கல்வியியல் சாதனையின் அடிப்படையில் எதிர்பார்க்கப்படுவதை விட மிகவும் சிறப்பாக உள்ளது. மேலும், மலேசிய மாணவர்களிடையே அறிவியலைக் கற்றுக்கொள்வதில் ஒப்பீட்டளவில் அதிக அளவிலான ஆர்வமும் ஈடுபாடும் இருப்பதை OECD பதிவிட்டுள்ளது. இது மிகவும் முக்கியமானது!
இதன் பொருள் நமது குழந்தைகளிடம் திறன் இல்லை என்பதல்ல. அவர்களிடம் ஆர்வம், சிக்கலைத் தீர்க்கும் திறன் மற்றும் டிஜிட்டல் உலகிற்கு ஏற்ப மாறும் திறன் உள்ளது. அந்தத் திறனை எவ்வாறு ஆழமான அறிவுத் தேர்ச்சியாக மாற்றுவது என்பதே நமது கல்வி முறைக்கு முன்னால் உள்ள சவால்,” என்று அவர் விளக்கினார்.
கல்வித் துறை விரைவான மாற்றத்திற்கு உள்ளாகி வருவதைக் குறிப்பிட்ட மஸ்லி, பிசா 2025 முடிவுகள் பல நாடுகளில் வாசிப்பு மற்றும் கற்றலில் வீழ்ச்சி ஏற்படுவதைக் காட்டுகின்றன என்றார்.
“இன்றைய தலைமுறையினர் டிக் டாக் (TikTok), குறுஞ்செயலிகள், குறும்படங்கள், ஸ்மார்ட்போன்கள், வழிமுறைகள் (algorithms) மற்றும் செயற்கை நுண்ணறிவு (AI) கொண்ட அமைப்பில் வாழ்கின்றனர். முந்தைய எந்த தலைமுறையையும் விட அவர்கள் அதிக தகவல்களைப் பெறுகிறார்கள், ஆனால் அதற்காக அவர்கள் ஆழமாகப் படிக்கிறார்கள் என்று அர்த்தமல்ல.
அதனால்தான் நமது பதில் நடவடிக்கை என்பது மேலும் பல பயிற்சிகள், அதிகமான தேர்வுகள் அல்லது பள்ளியில் கூடுதல் நேரங்களைச் சேர்ப்பதாக மட்டும் இருக்க முடியாது. நாம் வாசிக்கும் கலாச்சாரத்தையும், விமர்சன ரீதியாக வாசிக்கும் பழக்கத்தையும் மீண்டும் உருவாக்க வேண்டும் என்று அவர் வலியுறுத்தினார்.
ஆசிரியர்கள், செயற்கை நுண்ணறிவு (AI) மற்றும் சமத்துவம்:
நிர்வாகப் பணிகளால் ஆசிரியர்கள் சுமைக்குள்ளாகாமல், அவர்களுக்குக் கற்பிப்பதற்கு அதிக சுதந்திரம் வழங்கப்பட வேண்டும் என்று அழைப்பு விடுத்த மஸ்லி, ஆரம்ப காலத்திலிருந்தே கற்றல் சூழலை வலுப்படுத்த வேண்டியதன் அவசியத்தையும் அழுத்தமாகக் கூறினார்.
ஆரம்பப் பள்ளி ஆண்டுகளிலிருந்தே எழுத்து மற்றும் எண் அறிவை (literacy and numeracy) நாம் வலுப்படுத்த வேண்டும். எனவே, நூலகங்கள், புத்தகங்கள், விவாதங்கள், பரிசோதனைகள், கலைகள், விளையாட்டுகள் மற்றும் பாடநெறி நடவடிக்கைகள் ஆகியவற்றைத் தேர்வுகளுக்கான துணைப் பொருட்களாகப் பார்க்காமல், கற்றல் அமைப்பின் ஒரு பகுதியாக மாற்ற வேண்டும்.
செயற்கை நுண்ணறிவு (AI) நம்மைப் பயன்படுத்துவதற்கு அனுமதிக்காமல், AI-ஐ எவ்வாறு பயன்படுத்துவது என்பதை நாம் குழந்தைகளுக்குக் கற்பிக்க வேண்டும். இன்று AI அறிவு என்பது வெறும் தூண்டுதல்களை (prompts) எழுதுவது மட்டுமல்ல. AI உருவாக்கிய பதில்களைக் கேள்வி கேட்கவும், ஆதாரங்களைச் சரிபார்க்கவும், பிழைகளைக் கண்டறியவும், உண்மையை உரையிலிருந்து வேறுபடுத்திப் பார்க்கவும், இயந்திரங்களைச் சார்ந்திருக்காமல் சிந்திக்கும் திறனைத் தக்கவைத்துக் கொள்ளவும் குழந்தைகள் கற்றுக்கொள்ள வேண்டும் என்று அவர் மேலும் கூறினார்.
சமத்துவம் என்ற கேள்விக்குத் திரும்பிய மஸ்லி, மலேசியாவில் சமூக-பொருளாதாரப் பின்னணி என்பது கல்விச் சாதனையோடு நெருங்கிய தொடர்புடைய ஒன்றாகவே உள்ளது என்றார்.
ஏற்கனவே முன்னணியில் இருப்பவர்களை மட்டுமே உயர்த்திப் பிடிக்கும் கல்விச் சீர்திருத்தம் உண்மையான சீர்திருத்தம் அல்ல.
நகர்ப்புற ஏழைகள் வாழும் பகுதிகள், கிராமப்புறங்கள் மற்றும் வாய்ப்புகள் குறைந்த சமூகங்களில் உள்ள பள்ளிகளுக்குச் சிறந்த ஆசிரியர்கள், சிறந்த தலைமைத்துவம், சிறந்த வாசிப்புப் பொருட்கள் மற்றும் சிறந்த கற்றல் ஆதரவு ஆகியவை கிடைக்க வேண்டும் என்று அவர் கூறினார்.
நீடித்த கல்விச் சீர்திருத்தம்:
பிசா 2025 முடிவுகளுக்கு “மற்றொரு அவசரத் திட்டம் அல்லது புதிய முழக்கத்துடன்” கல்வி அமைச்சு பதிலளிக்கக் கூடாது எனக் கேட்டுக் கொண்ட மஸ்லி, மாறாக ஆதார அடிப்படையிலான மீட்புத் திட்டத்தை (evidence-based recovery plan) உருவாக்குவதில் கவனம் செலுத்த வேண்டும் என்றார்.
சமீபத்தில் தொடங்கப்பட்ட புதிய கல்வித் திட்டத்தின் அடிப்படையில் 5 முதல் 10 ஆண்டுகளுக்கான இலக்குகளை நிர்ணியுங்கள். பல்கலைக்கழகங்கள் மற்றும் சுயாதீன ஆராய்ச்சியாளர்கள் அதை மதிப்பீடு செய்ய இடம் கிடைக்கும் வகையில் தரவுகள் வெளிப்படையாக வெளியிடப்பட வேண்டும். அந்தத் தரவுகளின் அடிப்படையில், தங்கள் மாணவர்களின் சமூக-பொருளாதாரப் பின்னணிகளைக் கடந்து வெற்றி பெற்ற பள்ளிகளிடமிருந்து மற்ற பள்ளிகள் கற்றுக் கொள்வதைக் கல்வி அமைச்சு ஊக்குவிக்க வேண்டும். முக்கியமாக, கல்விப் பணியைச் செய்வதற்குப் பள்ளிகளுக்கும் ஆசிரியர்களுக்கும் நிலைத்தன்மை வழங்கப்பட வேண்டும்.
கல்விச் சீர்திருத்தத்திற்குத் தொடர்ச்சி தேவை. ஒரு அமைச்சர் மாறும்போது நல்ல கொள்கைகள் அழிந்துவிடக் கூடாது. அதேபோல, அதிகாரத்தில் உள்ள அரசாங்கத்தால் அறிமுகப்படுத்தப்பட்டது என்பதற்காகவே செயலற்ற கொள்கைகளைப் பாதுகாக்கவும் கூடாது.
பிசா 2025 என்பது நாம் ஒருவரையொருவர் விரல் நீட்டிக் குற்றம் சாட்டுவதற்கான சாக்கல்ல. மாறாக கல்வியிலிருந்து நாம் உண்மையிலேயே என்ன விரும்புகிறோம் என்பதை மீண்டும் நாமே கேட்டுக்கொள்வதற்கான ஒரு தேசிய அழைப்பாக இது இருக்க வேண்டும் என்று அவர் கூறினார்.
சரியான பதில்களை அளிக்கும் குழந்தைகளை உருவாக்குவதுடன் நின்றுவிடாமல், சரியான கேள்விகளைக் கேட்கும், உலகை விமர்சன ரீதியாக வாசிக்கும், சிக்கல்களைத் தீர்க்கும், ஆர்வத்துடன் இருக்கும் மற்றும் அவர்கள் வாழும் உலகை மேம்படுத்துவதற்கான தைரியமும் மதிப்புகளும் கொண்ட குழந்தைகளை வளர்க்கும் ஒரு கல்வி முறையை உருவாக்குவதன் முக்கியத்துவத்தையும் மஸ்லி அடிக்கோடிட்டுக் காட்டினார்.
2018 ஆம் ஆண்டில், கல்வி அமைச்சுப் பொறுப்பு என்னிடம் ஒப்படைக்கப்பட்டபோது, தேர்வை மையமாகக் கொண்ட கலாச்சாரத்திலிருந்து கற்றலை மையமாகக் கொண்ட கலாச்சாரத்திற்குச் அமைப்பை மெதுவாக மாற்ற முயன்றோம். விசாரணை அடிப்படையிலான கற்றல் (inquiry-based learning), ஆசிரியர் சுயாட்சி, பள்ளிகளில் மகிழ்ச்சி, நிர்வாகச் சுமையைக் குறைத்தல், முதற்கட்ட (Level 1) மாணவர்களுக்கான தேர்வுகளை ரத்து செய்தல் மற்றும் அர்த்தமுள்ள மதிப்பீடு ஆகியவற்றைப் பற்றி நாங்கள் பேசினோம்.
இவை தேர்வுகள் முக்கியமற்றவை என்பதற்காகச் செய்யப்படவில்லை. கல்வி என்பது தேர்வுகளைவிட மிகப் பெரியது என்பதற்காகவே இவை செய்யப்பட்டன. இன்றைய PISA முடிவுகள், இந்தக் கல்விச் சீர்திருத்தப் பணிகள் இன்னும் தொடர வேண்டிய அவசியம் இருப்பதை நமக்கு நினைவூட்டுகின்றன என்று அவர் மேலும் கூறினார்.
