பாதிக்கப்பட்ட ஒருவருக்கு இழப்பீடாக ரிம 2,000 வழங்கப்பட்டது, அதேவேளையில் மன்னிப்பு கோருதல் மற்றும் கொடுமைப்படுத்தியவர்களுக்கான ஆலோசனை ஆகியவை பிற தீர்வுகளில் அடங்கும்.
சட்டம் மற்றும் நிறுவன சீர்திருத்த அமைச்சர் அஸாலினா ஒத்மான் சைத், கேலி வதைக்கு எதிரான தீர்ப்பாயம் (anti-bullying tribunal) தண்டனையை அடிப்படையாகக் கொண்டது, ஆனால் அது பாதிக்கப்பட்டவர்கள் மற்றும் தவறு செய்தவர்களின் நடத்தையை சீரமைப்பதிலும் கவனம் செலுத்துகிறது என்று கூறினார்.
ஜூன் மாதம் தொடங்கப்பட்ட கேலிவதை எதிர்ப்புத் தீர்ப்பாயத்திற்கு (anti-bullying tribunal), செப்டம்பர் 22 நிலவரப்படி 55 புகார்கள் வந்துள்ளதாக சட்ட மற்றும் நிறுவன சீர்திருத்த அமைச்சர் அசலினா ஒத்மான் சாயிட் தெரிவித்துள்ளார்.
பாதிக்கப்பட்டவர்களிடம் மன்னிப்பு கேட்பது, ஆலோசனை பெறுவது அல்லது ஒரு வழக்கில் ரிம 2,000 நஷ்டஈடு வழங்குவது உள்ளிட்ட பல்வேறு தீர்ப்புகளின் மூலம் ஐந்து வழக்குகள் முடித்து வைக்கப்பட்டதாக அவர் கூறினார்.
“இந்த நடவடிக்கைகள் தீர்ப்பாயம் தண்டனையை மையமாகக் கொண்டது மட்டுமல்லாமல், பாதிக்கப்பட்டவர்களை மறுவாழ்வு செய்வதிலும், குற்றவாளிகளின் நடத்தையைச் சீரமைப்பதிலும் கவனம் செலுத்துகிறது என்பதைக் காட்டுகின்றன,” என்று அவர் ஓர் அறிக்கையில் தெரிவித்தார்.
2026-ஆம் ஆண்டின் கேலிவதை எதிர்ப்புச் சட்டமும் (Anti-Bullying Act 2026) இந்தத் தீர்ப்பாயமும், கேலிவதையைக் கையாள்வதற்கு ஒரு குறிப்பிட்ட பொறிமுறையை வழங்குகின்றன. இது வேகமான, குறைந்த செலவிலான மற்றும் சீரமைப்பு அணுகுமுறையைக் கொண்டிருப்பதுடன், பாதிக்கப்பட்டவர்களைப் பாதுகாப்பதற்கும் அவர்களை மறுவாழ்வு செய்வதற்கும் அதிக முக்கியத்துவம் அளிக்கிறது என்று அசலினா கூறினார்.
இருப்பினும், கேலிவதையைத் தடுப்பதற்குச் சட்டங்கள் மட்டுமே போதுமானவை அல்ல என்று அவர் சுட்டிக்காட்டினார்.
“பாதிக்கப்பட்டவர்கள் உதவி பெற முன்வர வேண்டும், அதே வேளையில் கேலிவதையைக் காண்பவர்கள் தைரியமாகப் பேச வேண்டும். ஏனெனில் கேலிவதை என்பது ஒரு வேடிக்கையான விஷயம் அல்ல, அதை எந்தச் சூழ்நிலையிலும் சாதாரணமான ஒன்றாகக் கருதக்கூடாது,” என்று அவர் கூறினார்.
இந்தத் தீர்ப்பாயம், கல்வி நிறுவனங்களால் தங்கள் புகார்கள் சரிவர பரிசீலிக்கப்படவில்லை எனப் கருதும் பாதிக்கப்பட்டவர்களுக்கு இரண்டாவது வழியாகச் செயல்படுகிறது.
மேலும், பள்ளி அமைப்புக்கு வெளியே உள்ள குழந்தைகள் தொடர்பான வழக்குகளையும் இது கையாள்கிறது.
