தங்கள் அன்புக்குரியவர்களின் சட்டபூர்வ நிலையைத் தீர்மானிக்க முயற்சி செய்து வரும் நிலையில், அவர்களின் கடன்கள் மற்றும் பிற நிதிப் பொறுப்புகளுக்கு தற்காலிகத் தடை விதிக்குமாறு நெருங்கிய உறவினர்கள் கோரிக்கை விடுத்துள்ளனர்.

ஆகஸ்ட் 26 அன்று திபெத் எல்லைக்கு அருகிலுள்ள நேபாளப் பகுதியில் திடீர் வெள்ளம் மற்றும் மண்சரிவு ஏற்பட்டதைத் தொடர்ந்து, 54 மலேசியர்களின் நிலைமை குறித்து இதுவரை தகவல் கிடைக்கவில்லை.

கடந்த மாதம் நேபாளத்தில் ஏற்பட்ட திடீர் வெள்ளத்தில் இன்னும் காணாமல் போயுள்ள மலேசியர்களின் குடும்பங்களுக்கு உதவ வங்கிகள் தயாராக உள்ளன.

மலேசியாவின் மத்திய வங்கியான Bank Negara Malaysia, சட்டப்பூர்வ நடவடிக்கைகள் முடிவடையும் வரை, கடன் தவணைகளை ஒத்திவைத்தல், கட்டணங்கள் மற்றும் வசூல்களைத் தள்ளுபடி செய்தல், மேலும் தேவையான ஆவணங்களை சமர்ப்பிப்பதில் நெகிழ்வுத்தன்மை வழங்குதல் போன்ற உதவிகள் அல்லது மனிதாபிமான நடவடிக்கைகள் மேற்கொள்ளப்படலாம் என்று தெரிவித்துள்ளது.

“நிதி நிறுவனங்கள் காப்பீட்டு அல்லது சான்றிதழ்களின் நிலையைச் சரிபார்த்து உறுதிப்படுத்தும் பணிகளுக்கு முன்னுரிமை அளிக்கலாம். மேலும், காப்பீடு மற்றும் தகாஃபுல் கோரிக்கைகளுக்கான தொகைகளை விரைவாக வழங்குவதுடன், பாதிக்கப்பட்ட குடும்பங்களின் குறிப்பிட்ட தேவைகளுக்கு ஏற்ப பிற உதவிகளையும் வழங்கலாம்,” என்று அது பெர்னமா  செய்தி நிறுவனத்துக்கு அளித்த அறிக்கையில் தெரிவித்தது.

இந்த துயரச் சம்பவத்தால் பாதிக்கப்பட்டவர்களுக்கு உரிய நேரத்தில் உதவிகள் கிடைப்பதை உறுதி செய்வதற்காக, நிதி நிறுவனங்களுடன் நெருக்கமாக இணைந்து செயல்படுவதாக மத்திய வங்கி தெரிவித்துள்ளது. மேலும், காணாமல் போனவர்களின் குடும்பத்தினர் சம்பந்தப்பட்ட நிதி நிறுவனங்களைத் தொடர்புகொள்ளுமாறு அறிவுறுத்தியுள்ளது.

அக்டோபர் 1ஆம் தேதி முன்னதாக தொடர்புகொள்ள முடியாமல் இருந்த ஒருவர் மலேசியத் தூதரகத்தில் காத்மாண்டுவில் நேரில் வந்து சேர்ந்ததைத் தொடர்ந்து, இந்தச் சம்பவத்தில் இன்னும் 54 மலேசியர்கள் காணாமல் போயுள்ளதாக தெரிவிக்கப்பட்டுள்ளது.

அந்த மலேசியர் நேபாளத்தில் தனியாகப் பயணம் செய்துகொண்டிருந்தார். ஆகஸ்ட் 25ஆம் தேதி அவர் நாக்தாலி(Nagthali) பகுதியில் இருந்தார். அதற்கு அடுத்த நாளான ஆகஸ்ட் 26ஆம் தேதி வெள்ளம் ஏற்பட்டது.

செப்டம்பர் 27ஆம் தேதி, காணாமல் போன தங்களுடைய குடும்ப உறுப்பினர்கள் தொடர்பான சட்ட மற்றும் பிற விவகாரங்களைத் தீர்க்கும் வரை, கடன்கள் மற்றும் பிற நிதிப் பொறுப்புகளுக்கான தவணைகளை ஒத்திவைக்குமாறு குடும்பத்தினர் கோரிக்கை விடுத்தனர்.

எனினும், தங்களுடைய கடன்களை முழுமையாகத் தள்ளுபடி செய்யுமாறு தாங்கள் கோரவில்லை என்று குடும்பத்தினர் தெரிவித்தனர்.

“எங்கள் அன்புக்குரியவர்களின் சட்டப்பூர்வ நிலை தெளிவாகும் வரை, குடும்பங்கள் மேலும் நிதிச் சுமையை எதிர்கொள்வதைத் தடுப்பதே எங்கள் நோக்கம். தாமதக் கட்டணங்கள், வசூல் நடவடிக்கைகள் அல்லது பிற சிக்கல்கள் ஏற்படாமல் இருப்பதற்காகவே இந்தக் கோரிக்கையை முன்வைக்கிறோம்,” என்று அவர்கள் கூட்டாக வெளியிட்ட அறிக்கையில் தெரிவித்தனர்.