மலாக்கா மாநிலத் தேர்தலை முன்னிட்டு வாக்குகளைப் பெறுவதற்காக, டாக்ஸி, வாடகை கார் மற்றும் பள்ளிப் பேருந்து ஓட்டுநர்களுக்கான 1,000 ரிங்கிட் சிறப்பு நிதியுதவி வழங்கப்படுவதாகக் கூறப்படுவதை போக்குவரத்து அமைச்சர் அந்தோணி லோக் சியூ ஃபூக் இன்று மறுத்துள்ளார்.

நாடாளுமன்றத்தில் 2027ஆம் ஆண்டுக்கான வரவுசெலவுத் திட்டத்தைத் தாக்கல் செய்தபோது பிரதமர் அன்வார் இப்ராகிம் அறிவித்ததைத் தொடர்ந்து, இந்த ஊக்கத்தொகை நாடு முழுவதும் உள்ள டாக்ஸி, வாடகை கார் மற்றும் பள்ளிப் பேருந்து ஓட்டுநர்களுக்கும் நீட்டிக்கப்படும் என்று அவர் கூறினார்.

மலாக்காவில் மட்டும் ஏன் இந்த உதவி வழங்கப்படுகிறது என்று சிலர் கேட்கும் கேள்விக்கு நான் பதிலளிக்க விரும்புகிறேன். உண்மை என்னவென்றால், இந்த சிறப்பு நிதியுதவி மலாக்காவில் உள்ளவர்களுக்கு மட்டுமல்ல, நாடு முழுவதும் உள்ள அனைத்து ஓட்டுநர்களுக்குமானது என்று அவர் கூறினார்.

கடந்த வாரம் நான் நெகிரி செம்பிலானில் இருந்தேன், அடுத்த வாரம் கெடாவுக்குச் செல்லவிருக்கிறேன். நாடு முழுவதும் உள்ள ஒவ்வொரு மாநிலத்திலும் உள்ள ஓட்டுநர்கள் இந்த உதவியைப் பெறுவார்கள், என்று மலாக்கா, ஆயர் கெரோவில் இந்த உதவியை வழங்கிய பின்னர் அவர் கூறியதாக செய்தி நிறுவனம் மேற்கோள் காட்டியுள்ளது.

இந்த நிகழ்வில் மொத்தம் 283 ஓட்டுநர்கள் தலா 1,000 ரிங்கிட் மதிப்புள்ள வவுச்சர்களைப் பெற்றனர்.

முன்னதாக இன்று, மாநிலத் தேர்தலுக்கு முன்னதாக மலாக்காவில் உள்ள டாக்ஸி ஓட்டுநர்களுக்கு தலா 1,000 ரிங்கிட் வழங்கப்படும் என்ற லோக்கின் அறிவிப்பு குறித்து தேர்தல் ஆணையமும் (EC) மலேசிய ஊழல் தடுப்பு ஆணையமும் விசாரணை நடத்த வேண்டும் என்று பெர்சாமா தலைவர் லீ சியான் சுங் வலியுறுத்தினார்.

மலாக்காவில் உள்ள டாக்ஸி ஓட்டுநர்களுக்கு மட்டும் இந்த உதவி ஏன் வரையறுக்கப்பட்டுள்ளது, நாடு முழுவதும் உள்ள சக ஓட்டுநர்களுக்கு இது ஏன் நீட்டிக்கப்படவில்லை என்று பெட்டாலிங் ஜெயா முன்னாள் எம்பி கேள்வி எழுப்பினார்.

மேலும், இந்த அறிவிப்பு போக்குவரத்து அமைச்சகத்தின் அதிகாரப்பூர்வ சேனல்கள் மூலமாக வெளியிடப்படாமல், பக்காத்தான் ஹராப்பான் பிரச்சாரக் கூட்டத்தில் ஏன் வெளியிடப்பட்டது என்றும் லீ கேள்வி எழுப்பினார். இதனை தேர்தலுக்கு முந்தைய பண விநியோகத்திற்கான தெளிவான உதாரணங்களில் ஒன்று என்றும் அவர் விவரித்தார்.

இந்த நடவடிக்கை 1954 தேர்தல் குற்றங்கள் சட்டத்தை மீறாமல் இருக்கலாம், ஆனால் நவம்பர் 14 தேர்தலுக்கு முன்னதாக அரசாங்க வளங்களை கட்சி நலன்களிலிருந்து பிரித்து வைப்பது குறித்த கவலைகளை லோக்கின் இந்த அறிவிப்பு எழுப்பியுள்ளதாக அவர் கூறினார்.

இந்த வாரம் சுமார் 12,000 டாக்ஸி, வாடகை கார் மற்றும் பள்ளிப் பேருந்து ஓட்டுநர்கள் இந்தச் சிறப்பு நிதியுதவியைப் பெறுவார்கள் என்று எதிர்பார்ப்பதாக லோக் இன்று தெரிவித்தார்.

இந்த உதவி நாடு முழுவதும் கிடைக்கிறது. நிலப் பொதுப் போக்குவரத்து முகமையால் சரிபார்க்கப்பட்ட செல்லுபடியாகும் ஓட்டுநர் அட்டையை அவர்கள் வைத்திருக்கும் வரை அவர்களின் பெயர்களை கணினியில் பதிவு செய்து, அவர்கள் RM1,000 பெறலாம்,’ என்று அவர் கூறினார்.

 

 

 

-fmt