மலாக்கா மாநிலத் தேர்தலுக்குப் பிறகு பெர்சத்து கட்சிக்கு எதிராக ஒழுங்கு நடவடிக்கை எடுப்பதா என்பது குறித்து பெரிக்காத்தான் நேஷனல் முடிவு செய்யும்.

பெர்சத்து கட்சியின் நடத்தை குறித்துக் கூட்டணியின் உறுப்புக் கட்சிகளிடமிருந்து புகார்கள் வந்துள்ளதாக பெரிக்காத்தான் நேஷனல் தலைவர் அகமட் சம்சுரி மொக்தார் தெரிவித்தார்.

எங்கள் உச்சமன்றக் கூட்டத்தில் இது குறித்து விவாதிப்போம், என்று அவர் கூறினார்.

கடந்த ஆகஸ்ட் மாதம் நடைபெற்ற நெகிரி செம்பிலான் மாநிலத் தேர்தலுக்கு முன்னரும் பின்னரும் நடந்த நிகழ்வுகள் தொடர்பாகவே இந்தப் புகார்கள் அமைந்துள்ளதாக சம்சுரி கூறினார்.

இருப்பினும், இது குறித்து மேலும் விவரிக்க அவர் மறுத்துவிட்டார்.

கூட்டணியின் அரசியலமைப்பை மீறியதாகவும், நெகிரி செம்பிலான் தேர்தலில் பெரிக்காத்தான் நேஷனலுக்கு எதிராகப் போட்டியிட்டதாகவும் கூறப்படும் குற்றச்சாட்டுகளின் பேரில் பெர்சத்து கட்சிக்கு எதிராக ஒழுங்கு நடவடிக்கை எடுக்கப்படும் என்று பொதுச்செயலாளர் தகியுதீன் ஹசன் முன்னதாகத் தெரிவித்திருந்தார்.

மேலும், அக்கட்சிக்கு எதிராகக் குற்றச்சாட்டுகள் தயாரிக்கப்படும் என்றும், தன்னைத் தற்காத்துக் கொள்ள பெர்சத்து கட்சிக்குப் போதிய அவகாசம் வழங்கப்படும் என்றும் அவர் கூறியிருந்தார்.

பெர்சத்து கட்சிக்கு எதிராக ஒழுங்கு நடவடிக்கை எடுக்க பெரிக்காத்தான் திட்டமிட்டுள்ளதை விசித்திரமானது மற்றும் அபத்தமானது என்று வர்ணித்த பெர்சத்து தலைவர் முஹிடின் யாசின், தங்கள் கட்சி எந்த விதிகளையும் மீறவில்லை என்று திட்டவட்டமாகக் கூறினார்.

மேலும், பெரிக்காத்தான் நேஷனலுக்குள் பாஸ் கட்சி விதிமீறல்களில் ஈடுபட்டதாகக் கூறப்படும் விவகாரம் குறித்து சங்கங்களின் பதிவாளரிடம் பெர்சத்து புகார் அளித்துள்ளதாகவும், அதன் மீது நடவடிக்கை எடுக்கப்பட்டுள்ளதாகவும் முஹிடின் சுட்டிக்காட்டினார்.

 

 

 

-fmt