மலேசியா தற்போது ஒவ்வொரு மாதமும் ஆயிரக்கணக்கான இணையவழித் தாக்குதல் முயற்சிகளை எதிர்கொண்டு வருவதாகவும், புதிய ஆயிரமாண்டின் பாதுகாப்பு அச்சுறுத்தல்களை எதிர்கொள்வதற்கு பாதுகாப்புப் படைகள் விரைவான மற்றும் வலுவான முன்னெச்சரிக்கைத் தயார்நிலையைக் கொண்டிருக்க வேண்டியது அவசியம் என்றும் பிரதமர் அன்வார் இப்ராஹிம் தெரிவித்துள்ளார்.

நாட்டின் பாதுகாப்புச் சூழல் தற்போது வழக்கமான இராணுவ அச்சுறுத்தல்களுடன் மட்டும் நின்றுவிடவில்லை என்றும், இணையவழித் தாக்குதல்கள், கணினி அமைப்புகளுக்குள் ஊடுருவுதல் மற்றும் பயங்கரவாதக் குழுக்களின் நடமாட்டம் ஆகியவை இன்றைய காலகட்டத்தில் மிக முக்கியமான சவால்களாக மாறியுள்ளன என்றும் அவர் கூறினார்.

“ஒரே மாதத்தில் ஆயிரக்கணக்கான தாக்குதல் முயற்சிகளை நாம் எதிர்கொள்கிறோம். எனவே, நமது தற்காப்புத் திறனை வலுப்படுத்த வேண்டும். கடந்த வாரம் மலேசிய ஆயுதப் படைகளின் உயர்மட்டத் தலைவர்களைச் சந்தித்து, ஆயுதப் படைகளுக்குள் இணையப் பாதுகாப்புப் பிரிவை மேலும் வலுப்படுத்துவது குறித்து விவாதித்தேன்,” என்று அவர் தெரிவித்தார்.

இன்று கோலாலம்பூரில் உள்ள 515 ஆவது பிராந்திய இராணுவப் படைப்பிரிவின் முகாமில், தேசிய சேவைப் பயிற்சித் திட்டத்தின் இளம் தேசிய வீரர்களுடனான ‘Temu Anwar’ சந்திப்பு நிகழ்ச்சியில் பங்கேற்பாளர் ஒருவரின் கேள்விக்குப் பதிலளித்தபோது அவர் இதனைத் தெரிவித்தார்.

இந்த அச்சுறுத்தலின் தீவிரத்தை விளக்குவதற்காக, அமெரிக்காவில் அண்மையில் விமான நிலையத்தின் செயல்பாடுகள் பாதிக்கப்பட்ட சம்பவத்தையும் அன்வார் சுட்டிக்காட்டினார். அந்த வல்லரசு நாட்டின் தொலைத்தொடர்பு அமைப்பில் ஏற்பட்ட பிரச்சினையே இதற்குக் காரணமாக இருந்ததாக அவர் குறிப்பிட்டார்.

“அனைத்துத் தொழில்நுட்ப வசதிகளும் மேம்பட்ட நிலையில் இருக்கும் அமெரிக்காவால்கூட இந்தப் பிரச்சினைக்கான காரணத்தைக் கண்டறிய முடியவில்லை என்பதைச் சிந்தித்துப் பாருங்கள். தொலைத்தொடர்பு அமைப்பின் மீது நடத்தப்பட்ட தாக்குதலால் அந்த அமைப்பு செயலிழந்தது. இதுதொடர்பான இறுதி அறிக்கைக்காக நாம் இன்னும் காத்திருக்கிறோம்,” என்றார்.

இதற்கிடையில், ஆளில்லா விமானங்களின் (ட்ரோன்கள்) பயன்பாடு போன்ற நவீனத் தொழில்நுட்பங்களின் வளர்ச்சிக்கு ஏற்ப, நாட்டின் தற்காப்பு உத்திகளும் பாதுகாப்பு உபகரணங்களைக் கொள்முதல் செய்யும் முறைகளும் விரைவாக மாற்றியமைக்கப்பட வேண்டும் என்று பிரதமர் வலியுறுத்தினார். அதேவேளை, வழக்கமான தற்காப்பு அம்சங்களையும் புறக்கணிக்கக் கூடாது என்றும் அவர் கூறினார்.

தற்காப்பின் இந்த இரு பரிமாணங்களையும் வலுப்படுத்த வேண்டிய அவசரத் தேவையைச் சுட்டிக்காட்டிய நிதியமைச்சருமான அன்வார், வரலாற்றிலேயே இல்லாத அளவுக்கு பாதுகாப்பு அமைச்சுக்கான நிதி ஒதுக்கீட்டை அரசாங்கம் உயர்த்தியுள்ளதாகத் தெரிவித்தார்.

கல்வி அமைச்சு மற்றும் சுகாதார அமைச்சு ஆகியவற்றுக்கு அடுத்தபடியாக, அதிக நிதி ஒதுக்கீட்டைப் பெறும் அமைச்சுகளில் பாதுகாப்பு அமைச்சும் ஒன்றாக இருப்பதாக அவர் குறிப்பிட்டார்.

கடற்படைக் கப்பல்கள், விமானங்கள் மற்றும் கவச வாகனங்கள் உள்ளிட்ட பாதுகாப்புப் படைகளின் காலாவதியான பல்வேறு பாரம்பரிய தற்காப்பு உபகரணங்களை மாற்றியமைப்பதற்கு இந்தப் பெருமளவிலான நிதி ஒதுக்கீடு மிகவும் அவசியமானது என்றும் அவர் தெரிவித்தார்.

பயன்பாட்டுக்கு ஒவ்வாத பழைய விமானங்கள் மற்றும் பழுதடைந்த பீரங்கி வாகனங்கள் (டாங்கிகள்) காரணமாக, அவற்றை மாற்றுவதற்காக நாம் பெருமளவில் செலவிட வேண்டியுள்ளது.

காலாவதியான விமானங்கள் மற்றும் பழுதடைந்த பீரங்கிகள் காரணமாக, அவை அனைத்திற்கும் நாம் செலவு செய்கிறோம். இருப்பினும், இந்தக் கொள்முதல்கள் தொடர்பாக, கடந்த காலங்களில் ஏற்பட்ட பிரச்சினைகள் , அதாவது பல மில்லியன் ரிங்கிட் மதிப்பிலான கப்பல் திட்டங்கள் கைவிடப்படுவதற்குக் காரணமான இடைத்தரகர்களின் பயன்பாடு மற்றும் அதிகப்படியான கமிஷன்கள் போன்றவை  மீண்டும் நிகழாமல் இருப்பதை உறுதி செய்யவும் அரசாங்கம் விரும்புகிறது என்று அவர் வலியுறுத்தினார்