இரகசிய   காப்பு   உறுதிமொழியை   மீறினார்   என்று  கூறப்படுவது  தொடர்பில்  தம்பூன்   எம்பி  அஹ்மட்   ஹுஸ்னி   ஹனாட்ஸ்லாமீது   விசாரணை   நடத்துவது   அரசமைப்புக்கு    விரோதமானது    என்கிறார்   எதிரணித்  தலைவர்   டாக்டர்   வான்   அசிசா   வான்   இஸ்மாயில்.

கூட்டரசு   அரசமைப்பின்   சட்டப்பிரிவு  63(2),  “நாடாளுமன்றத்தின்   இரண்டு   அவைகளிலும்   அதன்   குழுக்களிலும்   கூறப்படும்    எதற்காகவும்   எவர்மீதும்  நீதிமன்ற   நடவடிக்கை   எடுக்கவியலாது”   என்று   கூறுவதை   அவர்   சுட்டிக்காட்டினார்.

இந்த   நாடாளுமன்ற    சட்ட விலக்களிப்புக்கும்   விதிவிலக்கு   உண்டு    என்று  குறிப்பிட்ட   வான்  அசிசா,   1948ஆம்   ஆண்டு  தேச  நிந்தனைச்  சட்டத்தின்கீழ்  தொடுக்கப்படும்   வழக்குகளில்   சட்டவிலக்களிப்பு    செல்லாது   என்றார்.

“ஒரு  விசயம்    தெளிவாகத்   தெரிகிறது.  தம்பூன்   எம்பி  மட்டுமல்லாது   பாகோ  எம்பி (முகைதின்  யாசின்)யும்  சம்பூர்ணா   எம்பி(முகம்மட்  ஷாபி  அப்டால்)யும்   1எம்டிபி  பற்றிப்  பேசியதற்கும்  தேசநிந்தனைச்   சட்டத்துக்கும்   எவ்விதத்  தொடர்புமில்லை.

“அதிகாரத்துவ    இரகசியச்   சட்டம்  1972கூட   இங்கு  பொருந்தாது.  அரசாங்கத்தின்  அதிகாரப்பூர்வமான  இரகசிய  ஆவணங்கள்   வெளிப்படுத்தப்படும்   இடங்களில்      மட்டுமே     அது  பயன்படும்.

“1எம்டிபியில்   மிகப்   பெரிய   ஊழல்    நடந்துள்ளதால்     அதன்மீதான   விவாதங்களைத்   தேசிய   நலன்  சம்பந்தப்பட்ட    விவாதங்களாகக்  கருத   வேண்டும் ,    அது   குறித்து    விவாதிக்க  இடமளிக்க   வேண்டும்,  குறிப்பாக   நாடாளுமன்றத்தில்”,  என்று  வான்  அசிசா   ஓர்   அறிக்கையில்   கூறினார்.

நேற்று   ஹுஸ்னி   புக்கிட்   அமான்   போலீசாரால்   விசாரிக்கப்பட    விருந்தார்.  ஆனால்,   விசாரணை   பின்னர்  ஒத்திவைக்கப்பட்டது.