இத்தாலியில் கோவிட்-19 பாதிக்கப்பட்டவர்களில் இறப்பு எண்ணிக்கை சனிக்கிழமை 10,000 உயிர்களைத் தாண்டியுள்ளது. இதனால் நாட்டின் முடக்க உத்தரவு தொடர வாய்ப்புள்ளது என்று சர்வதேச ஊடகங்கள் செய்தி வெளியிட்டுள்ளன.
24 மணி நேரத்திற்குள் 889 பேர் இறந்ததாக இத்தாலிய அதிகாரிகள் கூறியுள்ளனர். இதனால் மொத்த உயிரிழப்புகளின் எண்ணிக்கையை 10,023 ஆகக் கொண்டு வந்துள்ளது.
உறுதிப்படுத்தப்பட்ட பாதிப்புகள் சுமார் 6,000 அதிகரித்து 92,472 பாதிப்புகளாக அதிகரித்துள்ளன, இது அமெரிக்காவிற்கு அடுத்தபடியாக இரண்டாவது இடத்தில் உள்ளது.
நாடு தழுவிய ஊரடங்கு உத்தரவு அமல்படுத்தப்படாவிட்டால் இந்த நோய்த்தொற்றுகளின் எண்ணிக்கை மோசமாக இருக்கும் என்று அதிகாரிகள் தெரிவித்தனர்.
“இந்த நடவடிக்கை இல்லாமல், நாங்கள் மிகவும் மோசமான எண்ணிக்கையைக் காணக்கூடும். மேலும் எங்கள் சுகாதார சேவைகள் மிகவும் மோசமான சூழ்நிலையில் இருக்கும். நாங்கள் கட்டுப்படுத்த முடியாத சூழ்நிலையில் இருப்போம்” என்று இத்தாலிய பொது பாதுகாப்பு இயக்குனர் ஏஞ்சலி பொரெல்லி கூறினார்.
ஐந்து வாரங்களுக்கு முன்னர் பாதிப்பு தொடங்கிய பின்னர் பொது நடமாட்டத்திற்கு எதிராக கடுமையான தடைகளை அறிமுகப்படுத்திய மேற்கு நாடுகளின் முதல் நாடு இத்தாலி.
அப்போதிருந்து, கோவிட்-19 நோய்த்தொற்றுகள் இத்தாலியில் தொடர்ந்து அதிகரித்து வருகின்றன. சமீபத்திய முன்னேற்றங்களை கணக்கில் எடுத்துக்கொண்டு அடுத்த வெள்ளிக்கிழமை முடிவடையும் ஊரடங்கு உத்தரவு நீட்டிக்கப்படும் என்று எதிர்பார்க்கப்படுகிறது.
