மதானி கொள்கையின் கீழ் மக்களின் நலன் மற்றும் நல்வாழ்வுக்கு எப்போதும் முன்னுரிமை அளிக்கப்படுவதை உறுதி செய்வதற்காக எதிர்க்கட்சிகள் தலைமையிலான மாநில அரசுகளுடன் ஒரு நல்ல உறவை உருவாக்க மத்திய அரசு எப்போதும் பாடுபடுகிறது.

அரசியல் வேறுபாடுகளைப் பொருட்படுத்தாமல், மாநில அரசுகளின் எந்தவொரு அவசரத் தேவைகள் அல்லது கோரிக்கைகளுக்கும் கூட்டாட்சி அரசாங்கம் தொடர்ந்து முன்னுரிமை அளிக்கும்போது இது நிரூபிக்கப்பட்டுள்ளது என்று பிரதமர் அன்வார் இப்ராஹிம் கூறினார்.

எடுத்துக்காட்டாக, பெரிக்காத்தான் நேசனல் (PN) தலைமையிலான மாநிலத்தில் பரவலான வெள்ளத் துயரங்களைத் தொடர்ந்து, கிளந்தானின் சுங்கை கோலோக்கில் வெள்ளத் தணிப்புத் திட்டத்தைத் தீவிரப்படுத்த புத்ராஜெயா ஒப்புக்கொண்டதாக அவர் கூறினார்.

“வெள்ளப் பிரச்சினை தீவிரமானது, ஏனென்றால் கிளந்தானில் வெள்ளம் பெர்மாத்தாங் பாவ்வை விட மிகவும் மோசமாக உள்ளது”.

“எனவே இங்குள்ள மக்களுக்கு எங்களால் உதவ முடிந்தாலும், கிளந்தான் வேறு கட்சியால் வழிநடத்தப்பட்டாலும் கூட அவர்களுக்கு முன்னுரிமை கொடுக்க வேண்டும். இது ஒரு உண்மை,” என்று அவர் இன்று மஸ்ஜித் மெங்குவாங் திதி திட்டத்தைத்(Masjid Mengkuang Titi) தொடங்கி வைத்தார்.

கிளந்தான் மந்திரி பெசாருடனான சந்திப்பின்போது, முன்மொழியப்பட்ட மேம்பாடுகள் குறித்தும் தான் கவனித்ததாக அன்வார் கூறினார், அவற்றில் சிலவற்றை அவர் ஒப்புக் கொண்டார் மற்றும் உடனடி நடவடிக்கை எடுக்குமாறு சம்பந்தப்பட்ட தரப்பினருக்கு அறிவுறுத்தினார்.

மேலும் கருத்து தெரிவித்த அன்வார், மாநில அரசுகளுடனான நல்லுறவு நாளைத் திரங்கானு பயணத்தில் பிரதிபலிக்கும் என்று கூறினார்.

“அப்படித்தான் மத்திய அரசு மாநிலங்களுடன் ஒத்துழைக்கிறது. தேர்தலின்போது ‘போராடலாம்’, ஆனால் அதன் பிறகு, நாங்கள் சமாதானம் செய்கிறோம், அப்போதுதான் மக்களைக் கவனித்துக் கொள்ள முடியும்,”என்று அவர் கூறினார்.

மாநிலங்களுக்கு நியாயமான ஒதுக்கீடுகளை வழங்கவில்லை என்ற கதை இருந்தபோதிலும், PN தலைமையிலான நான்கு மாநிலங்களுக்கான ஒதுக்கீடுகள் 2023 பட்ஜெட்டில் இன்னும் அதிகரிக்கப்பட்டுள்ளன என்பதே உண்மை என்று அன்வார் கூறினார்.

“கிளந்தான், பெர்லிஸ், திரங்கானு மற்றும் கெடாவுக்கான ஒதுக்கீடுகளும் அதிகரிக்கப்பட்டுள்ளன,” என்று அவர் கூறினார்.

முன்னதாக, பிரதமர் தனது உரையில், நம்பிக்கையை வலுப்படுத்துவதற்கான தளமாக மசூதிகள் முக்கிய பங்கு வகிக்கின்றன, எனவே, மசூதி குழுக்கள் இஸ்லாத்தைப் பற்றிய அதிக புரிதலை ஊக்குவிக்கும் மற்றும் பிரிவினையைத் தவிர்க்கும் நடவடிக்கைகளுடன் வழிபாட்டு இல்லத்தை உயிர்ப்பிக்க வேண்டும் என்று கூறினார்.

மசூதி என்பது இஸ்லாத்தின் அடையாளமாகவும், முஸ்லிம் சமூகத்தின் வாழ்க்கையாகவும் திகழ்கிறது. இது வெறுமனே தற்பெருமை காட்டுவதற்கோ அல்லது காண்பிப்பதற்கோ கட்டப்படவில்லை, மாறாக அல்லாஹ்வின் மீதான நமது நம்பிக்கையை வலுப்படுத்துவதற்காகக் கட்டப்பட்டுள்ளது,”என்று அவர் கூறினார்.

இரண்டு மாடி மஸ்ஜித் மெங்குவாங் திதி திட்டம்(Masjid Mengkuang Titi) மத்திய அரசாங்கத்திடமிருந்து ரிம5.4 மில்லியன் மற்றும் மாநில அரசாங்கத்திடமிருந்து ரிம1.1 மில்லியன் ஒதுக்கீடுடன் செயல்படுத்தப்படுகிறது.

பினாங்கு இஸ்லாமிய சமயப் பேரவைக்கு சொந்தமான 3.2 ஏக்கர் நிலப்பரப்பில் கட்டப்படும் இந்த மசூதியில் எந்த நேரத்திலும் 1,500 கூட்டத்தினர் தங்க முடியும்.

2019 ஆம் ஆண்டில் முன்மொழியப்பட்ட திட்டத்தின் கட்டுமானம் கூடிய விரைவில் தொடங்கும் என்று அன்வார் கூறினார்.