சர்ச்சைகளுக்கு மத்தியில், மூன்றாம் தரப்பினரின் உதவியுடன் தனது வளாகத்தில் தெருநாய்களைக் கொன்றதாகக் கூறப்படும் சம்பவத்திற்கு புத்ரா மலேசியா பல்கலைக்கழகம் (UPM) மன்னிப்பு கோரியது.

பல்கலைக்கழகம், காவல்துறை மற்றும் கால்நடை சேவைத் துறையின் விசாரணைகளில் ஒத்துழைக்கவும் உறுதியளித்தது.

“அதிகாரிகளின் விசாரணைகளில் முழுமையாக ஒத்துழைக்க UPM உறுதிபூண்டுள்ளது,” என்று அது இன்று ஒரு அறிக்கையில் தெரிவித்துள்ளது.

விசாரணைகள் முடியும் வரை அதன் தொழில் பாதுகாப்பு மற்றும் சுகாதார மேலாண்மை இயக்குநரைப் பணியிலிருந்து விடுவித்துள்ளதாகவும் பல்கலைக்கழகம் அறிவித்துள்ளது.

கடந்த வாரம், செர்டாங் மாவட்ட காவல்துறைத் தலைவர் பரித் அகமது, இந்த விவகாரம்குறித்து போலீசார் விசாரணையைத் தொடங்கியுள்ளதாகக் கூறினார். விலங்குகளைக் கொல்ல ஒரு தனியார் பூச்சிக் கட்டுப்பாட்டு நிறுவனத்தை நியமித்ததாகக் கூறப்படும் நிறுவனம்மீது புகார்தாரர் அதிருப்தி தெரிவித்தார்.

விலங்குகள் நலச் சட்டம் 2015 இன் பிரிவு 30(1) இன் கீழ் விசாரணை நடத்தப்படுவதாகப் பரித் கூறினார். இது ரிம 20,000 முதல் ரிம 100,000 வரை அபராதம் அல்லது மூன்று ஆண்டுகளுக்கு மிகாமல் சிறைத்தண்டனை அல்லது இரண்டும் விதிக்க வகை செய்கிறது.

மலேசியாவின் தேசிய பாரம்பரியத்தைப் பாதுகாப்பதற்கான அமைப்பு (பெக்கா), செந்தூலை தளமாகக் கொண்ட ஒரு சேவை நிறுவனத்தை நாய்களுக்கு” கொல்ல” ஒரு விலங்குக்கு ரிம 400 என்ற விகிதத்தில் யுபிஎம் ஈடுபடுத்தியதாக முன்னர் குற்றம் சாட்டியிருந்தது.

UPM ஆரம்பத்தில் இந்த விஷயத்தை மறுத்தாலும், பல்கலைக்கழக நிர்வாகத்திடமிருந்து அதன் மாணவர்கள் மற்றும் ஊழியர்களுக்குக் கசிந்த மின்னஞ்சல், அதன் வளாகத்தில் தெருநாய்களால் ஏற்படும் தொந்தரவுகள் தொடர்பான புகார்களைக் கையாள மூன்றாம் தரப்பு ஒப்பந்ததாரர்களை நியமித்துள்ளதாக ஒப்புக்கொண்டது.