மத்திய கிழக்கில் நிலவும் மோதலால் தூண்டப்பட்ட உலகளாவிய நெருக்கடியின் “இரண்டாவது அலைக்குள்” உலகம் நுழையும் வேளையில், சில பொருட்களின் விலை மாற்றங்களுக்குத் தயாராக இருக்குமாறு மலேசியர்களுக்கு அறிவுறுத்தப்பட்டுள்ளது.

மலேசியா உட்பட ஒட்டுமொத்த உலகமும் இந்த இரண்டாவது அலை நெருக்கடிக்குள் நுழைந்து வருவதாகத் துணைப் பிரதமர் ஃபாடில்லா யூசோப் தெரிவித்தார். இது எரிசக்தி விலையேற்றத்தில் இருந்து எண்ணெய் மற்றும் எரிவாயு சார்ந்த விநியோகச் சங்கிலி பாதிப்புகளாக மாறிவருவதாக அவர் குறிப்பிட்டார்.

இந்த வளங்கள் முக்கிய பொருளாதாரத் துறைகளுக்கு அடிப்படையாக இருப்பதால், இந்த புதிய கட்டம் ஒட்டுமொத்த பொருளாதாரத்திலும் பரந்த தாக்கங்களை ஏற்படுத்தும் என்றும் அவர் கூறினார்.

அன்றாட வாழ்வில் பரவலாகப் பயன்படுத்தப்படும் உணவுப் பொட்டலங்கள், நுகர்வோர் பொருட்கள், சுகாதாரம் மற்றும் தளவாடங்கள் ஆகியவற்றில் எண்ணெய் மற்றும் எரிவாயு சார்ந்த மூலப்பொருட்கள் முக்கியப் பங்கு வகிக்கின்றன. உலகளாவிய விநியோகம் பாதிக்கப்படும்போது, உற்பத்தி குறைந்து செலவுகள் அதிகரிக்கும்,” என்று உலகளாவிய நெருக்கடி குறித்த இன்றைய நேரலை விளக்கக் கூட்டத்தில் அவர் கூறினார்.

“வரவிருக்கும் காலத்தில் சில பொருட்களின் விலை மாற்றங்களையோ அல்லது தற்காலிக விநியோகத் தடைகளையோ மக்கள் எதிர்கொள்ள நேரிடலாம். மக்களின் வாழ்வாதாரம் பாதுகாக்கப்படுவதையும், இதன் தாக்கத்தைக் கட்டுப்படுத்துவதையும் உறுதி செய்ய அரசாங்கம் இந்த மாற்றங்களை அவசரகால அடிப்படையில் கவனமாகக் கையாண்டு வருகிறது.”

கூடுதல் இறக்குமதிகளை உறுதி செய்தல், சர்வதேச ஒத்துழைப்பை விரிவுபடுத்துதல் மற்றும் விநியோகத்தை நிலைப்படுத்த மாற்று மூலப்பொருட்களை ஆராய்தல் போன்றவற்றின் மூலம் புத்ராஜெயா இதற்குப் பதிலளிக்கும் என்று பாடில்லா கூறினார்.

மக்களின் அடிப்படைத் தேவைகள் எப்போதும் பூர்த்தி செய்யப்படுவதை உறுதி செய்தல், வளங்களை முறையாக நிர்வகிப்பதன் மூலம் விநியோகத்தை நீட்டித்தல் மற்றும் தீவிர கண்காணிப்பு மற்றும் கடுமையான நடவடிக்கைகள் மூலம் அதிக லாபம் ஈட்டுவதைத் தடுத்தல் ஆகிய மூன்று முக்கிய உத்திகளில் அரசாங்கம் கவனம் செலுத்தி வருகிறது.

மேலும், ஹார்முஸ் நீர்சந்தியில் நிலவும் நிச்சயமற்ற நிலை மற்றும் எண்ணெய், எரிவாயு உற்பத்தியில் ஏற்பட்டுள்ள நிலையற்ற தன்மையால் உலகளாவிய உற்பத்தி பாதிக்கப்பட்டுள்ளதால், பிளாஸ்டிக் விநியோகத்தில் இடையூறுகள் ஏற்படக்கூடும் என்றும் அவர் எச்சரித்தார்.

“உற்பத்தி செயல்முறையானது எண்ணெய் மற்றும் எரிவாயுவிலிருந்து பெறப்படும் நாப்தா, அம்மோனியா, எத்திலீன் மற்றும் புரோப்பிலீன் போன்ற மூலப்பொருட்களைச் சார்ந்துள்ளது,” என்று அவர் கூறினார்.

இருப்பினும், உள்நாட்டு விநியோகம் குறைந்தது இன்னும் இரண்டு மாதங்களுக்கு நிலையாக இருக்கும் என்று பாடில்லா பொதுமக்களுக்கு உறுதியளித்தார்.

பிப்ரவரி 28 அன்று ஈரானின் அப்போதைய உச்ச தலைவர் அயதுல்லா அலி காமேனி உட்பட தெஹ்ரானின் பல உயர்மட்டத் தலைவர்கள் கொல்லப்பட்ட அமெரிக்க-இஸ்ரேல் தாக்குதல்கள், மத்திய கிழக்கில் இந்த மோதலைத் தூண்டின.

இதற்குப் பதிலடியாக, இஸ்ரேல் மற்றும் அமெரிக்கத் தளங்கள் மீதும், வளைகுடா நாடுகள் உட்பட மத்திய கிழக்கிலுள்ள அமெரிக்காவின் நட்பு நாடுகள் மீதும் ஈரான் தாக்குதல்களை நடத்தியது.

உலக எரிசக்தி விநியோகத்தில் சுமார் 20% கொண்டு செல்லும் முக்கியப் பாதையான ஹார்முஸ் நீர்சந்தியைத் தெஹ்ரானும் மூடியது. இது எண்ணெய் விலையில் பெரும் உயர்வை ஏற்படுத்தி, உலகளாவிய எரிசக்தி நெருக்கடியைத் தூண்டியது.

இந்த மாத தொடக்கத்தில் பாகிஸ்தானில் நடந்த அமைதிப் பேச்சுவார்த்தைகள் தோல்வியடைந்த நிலையில், 14 நாள் போர்நிறுத்தம் எட்டப்பட்டது. பேச்சுவார்த்தைகள் தொடர இருப்பதால் இந்த போர்நிறுத்தம் நீட்டிக்கப்பட்டுள்ளது. இருப்பினும், அமெரிக்கா அந்த நீர்சந்தியில் கடற்படை முற்றுகையை ஏற்படுத்தியுள்ளது.

 

 

 

 

-fmt