2027-ஆம் ஆண்டு பள்ளித் தவணைக்கான முதலாம் ஆண்டில் கால்பதிக்கும் ஆறு வயது மாணவர்களிடமிருந்து 73,386 விண்ணப்பங்கள் மட்டுமே பெறப்பட்டுள்ளன; இது எதிர்பார்க்கப்பட்ட 4,00,000 இலக்கில் சுமார் 18 விழுக்காடு மட்டுமே ஆகும்.

ஆறு வயதுடையோரின் விண்ணப்பங்கள் எதிர்பார்த்ததை விடக் குறைவாக உள்ளதால், ஆசிரியர்களைப் பணியமர்த்தும் எண்ணிக்கையைக் குறைக்க வேண்டிய கட்டாயத்திற்கு அமைச்சு தள்ளப்பட்டுள்ளது என்று கல்வித் துணை அமைச்சர் வோங் கா வோ நாடாளுமன்ற மக்களவையில் தெரிவித்தார்.

ஆரம்பத்தில் 20,000 ஆசிரியர்கள் வரை பணியமர்த்த இலக்கு நிர்ணயிக்கப்பட்டிருந்த நிலையில், தற்போது அடுத்த ஆண்டிற்கு 3,150 ஒப்பந்த ஆசிரியர்களை மட்டுமே நியமிக்க அமைச்சு இலக்குக் கொண்டுள்ளதாக அவர் கூறினார்.

இந்தச் சிறப்புப் பணியமர்த்தல் முறை, அமைச்சின் முக்கிய நீண்டகாலத் திட்டமாக இருக்கும் தொழில்முறை ஆசிரியர் பயிற்சிப் பாதைக்கு மாற்றாக அமையாது.

2027-ஆம் ஆண்டுக்கான முதலாம் ஆண்டு பள்ளிப் பதிவில் ஆறு வயது மாணவர்களைச் சேர்ப்பதற்கான அமைச்சின் ஆயத்தப் பணிகள் குறித்தும், கூடுதல் மாணவர் சேர்க்கையால் ஆசிரியர்களுக்குக் பணிச்சுமை அதிகரிக்காமல் இருப்பதை உறுதி செய்வதற்கான நடவடிக்கைகள் குறித்தும் ஜலாலுதீன் அலியாஸ் (BN–ஜெலிபு) எழுப்பிய கேள்விக்கு வோங் இவ்வாறு பதிலளித்தார்.

2027-ஆம் ஆண்டுத் தவணைக்கான ஒட்டுமொத்த முதலாம் ஆண்டு பள்ளிப் பதிவு தற்போது 4,78,419 மாணவர்களாக உள்ளது; இதில் ஆறு வயதுப் பிரிவைச் சேர்ந்த 73,386 விண்ணப்பதாரர்களும், ஏழு வயதுப் பிரிவைச் சேர்ந்த 4,05,033 மாணவர்களும் அடங்குவர் என்று வோங் தெரிவித்தார்.

இது 2026-ஆம் ஆண்டுத் தவணையுடன் ஒப்பிடும்போது, முதலாம் ஆண்டு மாணவர் சேர்க்கையில் 12.07 விழுக்காடு அதிகரிப்பைக் குறிக்கிறது.

மேலும், நாடு முழுவதும் உள்ள 838 பள்ளிகளில் தொழில்துறை கட்டட அமைப்பு மாடுலர் முறையைப் பயன்படுத்தி 2,596 புதிய வகுப்பறைகளை அமைச்சு தீவிரமாக அமைத்து வருவதாகவும் அவர் தெரிவித்தார்.

இந்த வகுப்பறைகள் நடப்பு ஆண்டிற்குள் நிறைவடையும் என எதிர்பார்க்கப்படுவதாகவும், அமைச்சு தற்போதுள்ள இடவசதிகளைச் சிறந்த முறையில் பயன்படுத்தி வருவதோடு, தேவைப்படும் இடங்களில் இருவேளைப் பள்ளி முறையை அமல்படுத்தவும் தயாராக உள்ளது என்றும் வோங் கூறினார்.

கல்விச் சேவை ஆணையத்திடமிருந்து ஜூலை மற்றும் டிசம்பர் 2025 ஆகிய தவணைகளுக்கான 4,417 காத்திருப்புப் பட்டியல் விண்ணப்பதாரர்களை அமைச்சு தற்போது பரிசீலித்து வருவதாகவும், அவர்களில் 2,633 பேர் விரைவில் பணிநியமனக் கடிதங்களைப் பெறவுள்ளனர் என்றும் அவர் கூறினார்.

கடந்த ஜனவரி 20 அன்று தொடங்கப்பட்ட ‘மலேசிய கல்விப் பெருந்திட்ட வரைவு 2026–2035’-இன் கீழ் அடுத்த ஆண்டு முதல் பாலர் பள்ளிக் கல்வி ஐந்து வயதிலும், முதலாம் ஆண்டு கல்வி ஆறு வயதிலும் தொடங்கும் என்று பிரதமர் அன்வார் இப்ராகிம் அறிவித்திருந்தார்.

இந்த முன்கூட்டிய பள்ளிச் சேர்க்கை என்பது கட்டாயமற்றது சுயவிருப்பத்தின் பேரில் அமைவது ஆகும்; மேலும், முறையான பள்ளிப் படிப்பிற்கு மாணவர்கள் தயாராக உள்ளனரா என்பதைத் தீர்மானிக்க அவர்களுக்கு ஆரம்பகட்ட சோதனைப் பரிசோதனைகள் செய்யப்படும்.

 

 

 

-fmt