“குழந்தை கர்ப்பமடைந்ததால் ஏற்பட்ட துயரத்தை அலட்சியப்படுத்த முடியாது என்று புத்ராஜெயா பாலியல் குற்றவியல் நீதிமன்றம் தெரிவித்துள்ளது.”
46 வயது நபர் தனது குற்றத்தை ஒப்புக்கொண்டதை அடுத்து, புத்ராஜெயா பாலியல் குற்றவியல் நீதிமன்றம் அவருக்கு தண்டனை விதித்தது.”
தன் மகளையே பாலியல் வன்புணர்வு செய்ததற்காக, 46 வயதுடைய நபர் ஒருவருக்கு 39 ஆண்டுகள் சிறைத்தண்டனையும், 10 பிரம்படிகளும் விதித்து நீதிமன்றம் தீர்ப்பளித்துள்ளது. இந்த கொடூரச் செயலால் அந்த சிறுமி கர்ப்பமடைந்துள்ளார்.
இந்த மூன்று குற்றச்சாட்டுகளையும் அந்த நபர் ஒப்புக்கொண்டதை அடுத்து, புத்ராஜெயா பாலியல் குற்றவியல் நீதிமன்ற நீதிபதி எம். குணசுந்தரி இந்த தண்டனையை வழங்கியதாக ‘கோஸ்மோ’ (Kosmo) ஊடகம் செய்தி வெளியிட்டுள்ளது.
“12 வயது முதல் அந்த குழந்தை அனுபவித்த வேதனையை நாம் சாதாரணமாக கடந்துவிட முடியாது. குற்றம் சாட்டப்பட்டவரின் இந்த செயல், ‘பெற்ற பிள்ளையையே ஹருவான் (ஒரு வகை மீன்) தின்பதற்கு சமம்’,” என்று நீதிபதி ஒரு மலாய் பழமொழியைக் குறிப்பிட்டு, தன் சொந்தக் குழந்தையையே வேட்டையாடும் ஒரு கொடூரனை விவரித்தார்.
சிறைத்தண்டனை மற்றும் பிரம்படிகளுடன் சேர்த்து, அந்த நபர் சிறையில் இருக்கும் காலம் முழுவதும் மறுவாழ்வு ஆலோசனைகளைப் பெற வேண்டும் என்றும், விடுதலைக்குப் பிறகு இரண்டு ஆண்டுகளுக்கு காவல் துறையின் கண்காணிப்பில் இருக்க வேண்டும் என்றும் நீதிபதி குணசுந்தரி உத்தரவிட்டார்.
அந்த நபர் இக்குற்றங்களை 2024-ஆம் ஆண்டின் தொடக்கம், 2024-ஆம் ஆண்டின் இறுதி மற்றும் நடப்பு ஆண்டின் ஜூன் மாதம் ஆகிய காலகட்டங்களில், நள்ளிரவு முதல் நண்பகல் வரையிலான நேரங்களில் செய்துள்ளார்.
குற்றம் சாட்டப்பட்டவர் அந்த சிறுமியை மருத்துவப் பரிசோதனைக்காக மருத்துவமனைக்கு அழைத்துச் சென்றபோதே இந்த கொடூரம் வெளிச்சத்திற்கு வந்தது. அப்போது அச்சிறுமி ஆறு வாரங்கள் மற்றும் நான்கு நாட்கள் கர்ப்பமாக இருப்பதை மருத்துவர்கள் கண்டறிந்தனர்.
இவ்வழக்கில் அரசுத் தரப்பில் துணை அரசு வழக்கறிஞர் வி. சுலோஷனி ஆஜரானார். குற்றம் சாட்டப்பட்ட நபர் தரப்பில் வழக்கறிஞர் எவரும் ஆஜராகவில்லை.
