11 வயதான நூர் கைரா அலிஷா அஹ்மத் இலுவான் தனது மூன்று மாத வயதிலிருந்தே இதயத் தொடர்பான பிரச்சினைகளால் பாதிக்கப்பட்டிருந்தார். அவரது உடல்நிலை காரணமாக, பள்ளியில் நடைபெறும் விளையாட்டு நடவடிக்கைகளில் இருந்து அவருக்கு விலக்கு அளிக்கப்பட்டிருந்தது.

இருப்பினும், அவரது பெற்றோரின் கூற்றுப்படி, ஏப்ரல் 15 அன்று நடைபெற்ற ஓட்டப் போட்டியில் பங்கேற்குமாறு நான்காம் வகுப்பு மாணவியான நூர் கைராவிடம் ஒரு ஆசிரியர் கூறியுள்ளார். அவரது உடல்நிலை குறித்த மருத்துவக் கடிதம் ஏற்கனவே பள்ளிக்கு வழங்கப்பட்டிருந்ததாகவும் பெற்றோர் தெரிவித்தனர்.

நூர் கைரா செவ்வாய்க்கிழமை கெடாவில் உள்ள சுல்தானா பஹியா மருத்துவமனையில் உயிரிழந்தார்.

தனது மகள் ஏப்ரல் 24 அன்று மருத்துவமனையில் அனுமதிக்கப்பட்டதாக அவரது தாயார் நோர்லெலா ஷாரி மலேசியக்கினியிடம் தெரிவித்தார். ஓட்டப்போட்டியில் பங்கேற்ற பின்னர் வீட்டுக்குத் திரும்பிய நூர் கைரா மிகவும் சோர்வாக இருந்ததுடன், குமட்டல் இருப்பதாகவும் கூறியிருந்தார். பின்னர் அவருக்கு தொடர்ந்து வாந்தி ஏற்பட்டதுடன், கண்களைச் சுற்றி வீக்கமும் ஏற்பட்டது.

மருத்துவப் பரிசோதனையில், நூர் கைராவுக்கு விரிவடைந்த இதயத் தசைநோய் (dilated cardiomyopathy) காரணமாக மோசமடைந்த இதய செயலிழப்பு (decompensated heart failure) ஏற்பட்டிருப்பது தெரியவந்தது.

குழந்தைகள் இதயநோய் நிபுணர் பரிசோதித்தபோது, அவரது இதயத்தைச் சுற்றி திரவம் தேங்கியிருந்தது. இதன் காரணமாக அவரது கண்களிலும் முகத்திலும் வீக்கம் ஏற்பட்டதாக நோர்லெலா கூறினார்.

அவர் மேலும் கூறியதாவது:

அதன் பிறகு அதிகமாக அசையக்கூடாது என்று மருத்துவர் கூறினார். அவர் சக்கர நாற்காலியைப் பயன்படுத்த வேண்டியிருந்தது.

வீக்கம் மீண்டும் ஏற்படாமல் இருக்க, தினமும் ஒரு லிட்டர் தண்ணீர் மட்டுமே குடிக்க வேண்டும் என்றும் மருத்துவர் கட்டுப்பாடு விதித்தார்.

மறுமையில் இதற்கான கணக்கு இருக்கும்.

நூர் கைரா இறப்பதற்கு ஒன்பது நாட்களுக்கு முன்பு, ஆகஸ்ட் 16 அன்று நோர்லெலா முக்நூலில் ஒரு பதிவை வெளியிட்டிருந்தார்.

அதில், தனது மகள் சுறுசுறுப்பான குழந்தை என்றும், பள்ளிக்குச் செல்வதை மிகவும் விரும்பியவர் என்றும் அவர் குறிப்பிட்டிருந்தார்.

மருத்துவக் கடிதம் பள்ளிக்கு வழங்கப்பட்டிருந்த போதிலும், விளையாட்டு அணிக்கான தேர்வு செயல்முறைக்காக ஆசிரியர் தனது மகளை ஓடச் சொன்னது அலட்சியமான செயல் என்று அவர் குற்றம்சாட்டினார்.

அந்த ஓட்டத்திற்குப் பிறகு நூர் கைரா படுத்த படுக்கையான நிலைக்கு மாறி, உடல் செயல்பாடுகளைச் செய்ய முடியாத நிலை ஏற்பட்டதாகவும், வாழ்நாள் முழுவதும் ஆக்சிஜன் தேவைப்படும் நிலைக்கு தள்ளப்பட்டதாகவும் அவர் கூறினார்.

“ஆசிரியரின் மனிதநேயம் எங்கே? என் மகள் அந்த ஆசிரியர் மீது மனக்கசப்பு கொண்டிருக்கிறார். இது இந்த உலகத்தில் நடக்கும் ஒரு விஷயம் மட்டுமே… மறுமையில் இதற்கான கணக்கு இருக்கும்,” என்று அவர் தனது பதிவில் குறிப்பிட்டிருந்தார்.

அந்தப் பதிவுடன், மருத்துவமனைப் படுக்கையில் மிகவும் மெலிந்த நிலையில், முகத்தில் ஆக்சிஜன் முகக்கவசத்துடன் இருந்த நூர் கைராவின் வேதனையான புகைப்படங்களும் வெளியிடப்பட்டிருந்தன.

அரசு விசாரணை

கல்வி அமைச்சர் பத்லினா சிடெக்

இதற்கிடையில், இந்தச் சம்பவம் குறித்து கெடா மாநிலக் கல்வித் துறை விசாரணையைத் தொடங்கியுள்ளது.

கல்வி அமைச்சர் பட்லினா சிடெக், அமைச்சின் நேர்மை மற்றும் ஒழுக்கப் பிரிவுக்கும் (Integrity Unit) உரிய நடவடிக்கை எடுக்குமாறு உத்தரவிட்டதாக தெரிவித்தார்.

அவர் முகநூல் பதிவில் கூறியதாவது:

“நூர் கைராவின் குடும்பத்தினர் அளித்த புகாரைத் தொடர்ந்து, கெடா கல்வித் துறை விசாரணை நடத்தியிருப்பதாக எனக்குத் தெரிவிக்கப்பட்டுள்ளது.”

அனைவருக்கும் சட்டத்திற்கும் நீதிக்கும் உட்பட்டு, அடுத்தகட்ட நடவடிக்கைகளை எடுக்குமாறு நேர்மைப் பிரிவுக்கும் நான் உத்தரவிட்டுள்ளேன்.

“மாணவர்களின் பாதுகாப்பு மற்றும் நலன் தொடர்பான ஒவ்வொரு விவகாரத்தையும் அமைச்சு மிகவும் தீவிரமாக எடுத்துக்கொள்கிறது,” என்றும் கல்வி அமைச்சர் தெரிவித்தார்.