33 வயதுடைய அந்தப் பெண், அவரது சோதனைக்காக ஒப்படைக்கப்பட்ட பயணப் பையில் சுமார் ரிம 830,000 மதிப்புள்ள போதைப்பொருட்கள் கண்டுபிடிக்கப்பட்டதைத் தொடர்ந்து கைது செய்யப்பட்டார்.

சனிக்கிழமையன்று ஹாங்காங் சர்வதேச விமான நிலையத்தில் மேற்கொள்ளப்பட்டக் கைது நடவடிக்கை, ஜூலை மாதத்தில் அவ்விமான நிலையத்தில் மலேசியர்கள் சம்பந்தப்பட்ட மூன்று ஒத்த சம்பவங்களைத் தொடர்ந்து நடந்துள்ளது.

ஹாங்காங் சர்வதேச விமான நிலையத்தில், சோதனையிடப்பட்ட லக்கேஜில் (Checked baggage) சுமார் 8 கிலோ எடையுள்ள கஞ்சா கைப்பற்றப்பட்டதை அடுத்து, 33 வயது மலேசியப் பெண் ஒருவர் கைது செய்யப்பட்டுள்ளார். இதன் மதிப்பு சுமார் 1.6 மில்லியன் ஹாங்காங் டாலர் (மலேசிய மதிப்பில் ரிம 830,000) என மதிப்பிடப்பட்டுள்ளது.

செப்டம்பர் 12 அன்று தாய்லாந்தின் பாங்காக்கில் இருந்து வந்திறங்கிய அந்தப் பெண், சுங்கச் சோதனையின் போது கைது செய்யப்பட்டதாக ஹாங்காங் சுங்கத்துறை தெரிவித்துள்ளது.

“சுங்கச் சோதனையின் போது, அதிகாரிகள் அவரது லக்கேஜுக்குள் சுமார் 8 கிலோ எடையுள்ள கஞ்சா மொட்டுகள் (Cannabis buds) இருப்பதாகச் சந்தேகிக்கப்படும் போதைப்பொருளைக் கண்டறிந்தனர். அதைத் தொடர்ந்து அவர் கைது செய்யப்பட்டார்,” என்று ஒரு அறிக்கையில் தெரிவிக்கப்பட்டுள்ளது.

ஹாங்காங்கின் ஆபத்தான போதைப்பொருள் சட்டத்தின் (Dangerous Drugs Ordinance) கீழ், ஆபத்தான போதைப்பொருட்களைக் கடத்துவது குற்றம் என நிரூபிக்கப்பட்டால், அதிகபட்சமாக 5 மில்லியன் ஹாங்காங் டாலர் அபராதமும் (மலேசிய மதிப்பில் ரிம 2.6 மில்லியன்) ஆயுள் தண்டனையும் விதிக்கப்படலாம்.

ஜூலை மாதத்தில் நடந்த மூன்று சம்பவங்கள் உட்பட, விமான நிலையத்தில் கஞ்சாவுடன் மலேசியர்கள் கைதான இதேபோன்ற சம்பவங்களைத் தொடர்ந்து இந்த தற்போதைய கைது நடவடிக்கை நடந்துள்ளது:

ஜூலை 30: பாங்காக்கில் இருந்து வந்த 27 வயது மலேசிய ஆடவர் ஒருவர், தனது லக்கேஜில் HK$600,000 (ரிம 311,000) மதிப்பிலான சுமார் 3 கிலோ கஞ்சா வைத்திருந்ததற்காகக் கைது செய்யப்பட்டார்.

ஜூலை 16: பிலிப்பைன்ஸின் மணிலா வழியாக பாங்காக்கில் இருந்து வந்த 19 வயது மலேசிய இளைஞர் ஒருவர், தனது லக்கேஜில் HK$2 மில்லியன் (ரிம 1.04 மில்லியன்) மதிப்பிலான சுமார் 11 கிலோ கஞ்சா வைத்திருந்ததற்காகக் கைது செய்யப்பட்டார்.

ஜூலை 9: சிங்கப்பூர் வழியாக கோலாலம்பூரில் இருந்து வந்த மற்றொரு 19 வயது மலேசிய இளைஞர், தனது லக்கேஜில் HK$500,000 (ரிம 260,000) மதிப்பிலான சுமார் 3 கிலோ கஞ்சாவுடன் கைது செய்யப்பட்டார்.