தேர்தல் குற்றச் சட்ட(திருத்த) மசோதாவை அவசரப்பட்டு மீட்டுக்கொள்ளவில்லை, தேர்தல் ஆணைய(இசி)த்தின் ஒப்புதலுடன்தான் மீட்டுக்கொள்ளப்பட்டது என இன்று நாடாளுமன்றத்தில் தெரிவிக்கப்பட்டது.
அதை மீட்டுக்கொள்ளுமுன்னர் மாற்றரசுக் கட்சித் தலைவருடனும் இசியுடனும் கலந்தாலோசிக்கப்பட்டதாக பிரதமர்துறை அமைச்சர் முகம்மட் நஸ்ரி அப்துல் அசீஸ் கூறினார்.
ஏப்ரல் 19-இல், மக்களவையில் நிறைவேற்றப்பட்டு மேலவைக்குக் கொண்டுசெல்லப்பட்ட ஒரு சட்டமுன்வரைவு மீட்டுக்கொள்ளப்பட்டதற்கு விளக்கம் தேவை என்று எம்.குலசேகரன்(டிஏபி-ஈப்போ பாராட்) கேட்டுக்கொண்டதைத் தொடர்ந்து நஸ்ரி அவ்வாறு விளக்கமளித்தார்.
“மக்களவையில் அது விவாதத்துக்கு வந்தபோது மூன்று திருத்தங்களைச் செய்தோம்.மேலவையில் அவர்கள்(செனட்டர்கள்)மேலும் இரு திருத்தங்கள் செய்ய விரும்பினர்.ஐந்து திருத்தங்களைச் செய்தால் அது அர்த்தமற்றதாகிவிடும்.
“அதை மீட்டுக்கொள்ளலாமா என்று மாற்றரசுக் கட்சித் தலைவரையும் இசி-யையும் கேட்டோம்”, என்றவர் குலசேகரனுக்கு விளக்கம் கூறினார்.
அமைச்சரவை சட்டத்திருத்தத்துக்குத்தான் ஏற்பாடுதான் செய்தது.சட்டத் திருத்தத்தை வரைவதில் அது சம்பந்தப்படவில்லை என்றும் நஸ்ரி தெரிவித்தார்.
ஏப்ரல் 9-இல், மக்களவை முன்வைக்கப்பட்ட அச்சட்ட முன்வரைவு, தேர்தல் நடைமுறைகளில் பல திருத்தங்கள் செய்வதை நோக்கமாகக் கொண்டிருந்தது.அவற்றுள், வாக்களிப்பு மையங்களைவிட்டு பொதுமக்கள் விலகிநிற்கும் தூரத்தை 50 மீட்டரிலிருந்து 100 மீட்டராக்குவதும் ஒன்று.
-பெர்னாமா
